ਭਾਜਪਾ ਨੂੰ ਮੁੰਬਈ ਦਾ ਪਹਿਲਾ ਮੇਅਰ ਮਿਲਣ ਦੀ ਉਮੀਦ, ਰਿਤੂ ਤਾਵੜੇ ਨੇ ਦਾਖਲ ਕੀਤਾ ਨਾਮਜ਼ਦਗੀ ਪੱਤਰ

ਮੁੰਬਈ : ਭਾਰਤੀ ਜਨਤਾ ਪਾਰਟੀ (ਭਾਜਪਾ) ਮੁੰਬਈ 'ਚ ਆਪਣਾ ਪਹਿਲਾ ਮੇਅਰ ਬਣਾਉਣ ਦੀ ਤਿਆਰੀ 'ਚ ਹੈ, ਜਿਸ ਨਾਲ ਇਸ ਸ਼ਹਿਰ ਦੇ ਨਗਰ ਨਿਗਮ 'ਚ ਠਾਕਰੇ ਪਰਿਵਾਰ ਦਾ ਪਿਛਲੇ 25 ਸਾਲਾਂ ਤੋਂ ਚੱਲ ਰਿਹਾ ਦਬਦਬਾ ਖ਼ਤਮ ਹੋ ਜਾਵੇਗਾ। ਭਾਜਪਾ ਕੌਂਸਲਰ ਰਿਤੂ ਤਾਵੜੇ ਨੇ ਸ਼ਨੀਵਾਰ ਨੂੰ ਮੇਅਰ ਦੇ ਅਹੁਦੇ ਲਈ ਆਪਣਾ ਨਾਮਜ਼ਦਗੀ ਪੱਤਰ ਦਾਖਲ ਕਰ ਦਿੱਤਾ ਹੈ।

ਮਹਾਯੁਤੀ ਦਾ ਪਲੜਾ ਭਾਰੀ 

ਮਹਾਯੁਤੀ ਗਠਜੋੜ 'ਚ ਭਾਜਪਾ ਦੀ ਸਹਿਯੋਗੀ ਸ਼ਿਵ ਸੈਨਾ (ਸ਼ਿੰਦੇ ਧੜੇ) ਨੇ ਸੰਜੇ ਘਾਡੀ ਨੂੰ ਡਿਪਟੀ ਮੇਅਰ ਦੇ ਅਹੁਦੇ ਲਈ ਉਮੀਦਵਾਰ ਬਣਾਇਆ ਹੈ। ਸੰਜੇ ਘਾਡੀ 15 ਮਹੀਨਿਆਂ ਤੱਕ ਇਸ ਅਹੁਦੇ 'ਤੇ ਰਹਿਣਗੇ, ਕਿਉਂਕਿ ਸ਼ਿਵ ਸੈਨਾ ਆਪਣੇ ਹੋਰ ਕੌਂਸਲਰਾਂ ਨੂੰ ਵੀ ਮੌਕਾ ਦੇਣਾ ਚਾਹੁੰਦੀ ਹੈ। ਚੋਣਾਂ 11 ਫਰਵਰੀ ਨੂੰ ਹੋਣਗੀਆਂ। 227 ਮੈਂਬਰੀ ਬੀ.ਐੱਮ.ਸੀ. 'ਚ ਬਹੁਮਤ ਲਈ 114 ਸੀਟਾਂ ਦੀ ਲੋੜ ਹੈ, ਜਦੋਂ ਕਿ ਸੱਤਾਧਾਰੀ ਗਠਜੋੜ ਕੋਲ 118 ਕੌਂਸਲਰ (ਭਾਜਪਾ 89 ਅਤੇ ਸ਼ਿਵ ਸੈਨਾ 29) ਹਨ।

ਕੌਣ ਹੈ ਰਿਤੂ ਤਾਵੜੇ? 

ਰਿਤੂ ਤਾਵੜੇ 2012 'ਚ ਭਾਜਪਾ 'ਚ ਸ਼ਾਮਲ ਹੋਈ ਸੀ ਅਤੇ ਘਾਟਕੋਪਰ ਪੂਰਬ (ਵਾਰਡ 132) ਤੋਂ 2 ਵਾਰ ਕੌਂਸਲਰ ਚੁਣੀ ਗਈ ਹੈ। ਆਪਣੇ ਕਾਰਜਕਾਲ ਦੌਰਾਨ ਉਹ ਸਿੱਖਿਆ ਕਮੇਟੀ ਦੀ ਚੇਅਰਪਰਸਨ ਰਹੀ ਹੈ ਅਤੇ ਬੁਨਿਆਦੀ ਢਾਂਚੇ ਤੇ ਜਨਤਕ ਸੁਰੱਖਿਆ ਦੇ ਮੁੱਦਿਆਂ 'ਤੇ ਸਰਗਰਮ ਰਹੀ ਹੈ। ਭਾਜਪਾ ਆਗੂਆਂ ਦਾ ਕਹਿਣਾ ਹੈ ਕਿ ਮੁੰਬਈ ਨੂੰ 44 ਸਾਲਾਂ ਬਾਅਦ ਭਾਜਪਾ ਦਾ ਮੇਅਰ ਮਿਲੇਗਾ ਅਤੇ ਇਹ ਮੇਅਰ 'ਮਰਾਠੀ, ਮਾਲਵਣੀ, ਕੋਕਣੀ ਅਤੇ ਹਿੰਦੂ' ਹੋਵੇਗਾ।

ਵਿਰੋਧੀ ਧਿਰ ਦੀ ਸਥਿਤੀ 

ਦੂਜੇ ਪਾਸੇ, ਸ਼ਿਵ ਸੈਨਾ (UBT) ਨੇ 65 ਸੀਟਾਂ ਜਿੱਤੀਆਂ ਹਨ, ਜਦਕਿ ਕਾਂਗਰਸ ਨੂੰ 24, AIMIM ਨੂੰ 8 ਅਤੇ ਮਨਸੇ ਨੂੰ 6 ਸੀਟਾਂ ਮਿਲੀਆਂ ਹਨ। ਜ਼ਿਕਰਯੋਗ ਹੈ ਕਿ ਬੀ.ਐੱਮ.ਸੀ. ਦਾ ਸਾਲ 2025-26 ਦਾ ਬਜਟ 74,450 ਕਰੋੜ ਰੁਪਏ ਰੱਖਿਆ ਗਿਆ ਹੈ, ਜੋ ਕਈ ਛੋਟੇ ਰਾਜਾਂ ਦੇ ਕੁੱਲ ਬਜਟ ਨਾਲੋਂ ਵੀ ਜ਼ਿਆਦਾ ਹੈ। ਮਾਰਚ 2022 ਤੋਂ ਨਿਗਮ ਦਾ ਕੰਮਕਾਜ ਪ੍ਰਸ਼ਾਸਕ ਦੇ ਹੱਥਾਂ 'ਚ ਸੀ, ਜੋ ਹੁਣ ਚੁਣੀ ਹੋਈ ਸਰਕਾਰ ਦੇ ਹੱਥ ਆਉਣ ਵਾਲਾ ਹੈ।