ਨਵੀਂ ਦਿੱਲੀ : ਸੰਸਦ ਮੈਂਬਰ ਰਾਘਵ ਚੱਢਾ ਨੇ ਸੋਮਵਾਰ ਨੂੰ ਰਾਜ ਸਭਾ 'ਚ ਮੋਬਾਈਲ ਡਾਟਾ ਦੇ ਨਿਯਮਾਂ ਨੂੰ ਤਰਕਸੰਗਤ ਬਣਾਉਣ ਦੀ ਜ਼ੋਰਦਾਰ ਵਕਾਲਤ ਕੀਤੀ। ਉਨ੍ਹਾਂ ਮੰਗ ਕੀਤੀ ਕਿ ਵੱਡੀਆਂ ਟੈਲੀਕਾਮ ਕੰਪਨੀਆਂ ਨੂੰ ਅਣਵਰਤੇ (unused) ਡਾਟਾ ਨੂੰ ਅਗਲੇ ਦਿਨ ਲਈ ਅੱਗੇ ਭੇਜਣ (Rollover) ਅਤੇ ਇਸਨੂੰ ਪਰਿਵਾਰ ਤੇ ਦੋਸਤਾਂ ਵਿੱਚ ਟ੍ਰਾਂਸਫਰ ਕਰਨ ਦੀ ਲੋੜੀਂਦੀ ਵਿਵਸਥਾ ਕਰਨੀ ਚਾਹੀਦੀ ਹੈ।
ਡਾਟਾ ਜ਼ਬਤ ਕਰਨ ਨੂੰ ਦੱਸਿਆ 'ਧੋਖਾ'
ਸਦਨ 'ਚ 'ਜਨਤਕ ਹਿੱਤ ਦਾ ਮੁੱਦਾ' ਉਠਾਉਂਦੇ ਹੋਏ ਚੱਢਾ ਨੇ ਕਿਹਾ ਕਿ ਟੈਲੀਕਾਮ ਕੰਪਨੀਆਂ ਅੱਧੀ ਰਾਤ ਤੋਂ ਬਾਅਦ ਗਾਹਕਾਂ ਦਾ ਬਚਿਆ ਹੋਇਆ ਡਾਟਾ ਜ਼ਬਤ ਕਰ ਲੈਂਦੀਆਂ ਹਨ। ਉਨ੍ਹਾਂ ਕਿਹਾ ਕਿ ਗਾਹਕ ਪੂਰੇ ਡਾਟਾ ਲਈ ਭੁਗਤਾਨ ਕਰਦਾ ਹੈ, ਪਰ ਦਿਨ ਦੇ ਅੰਤ 'ਚ ਕੰਪਨੀ ਅਣਵਰਤਿਆ ਡਾਟਾ ਵਾਪਸ ਲੈ ਲੈਂਦੀ ਹੈ, ਜੋ ਕਿ ਇੱਕ "ਗੈਰ-ਨੈਤਿਕ" ਅਭਿਆਸ ਹੈ। ਉਨ੍ਹਾਂ ਪੈਟਰੋਲ, ਡੀਜ਼ਲ ਅਤੇ ਬਿਜਲੀ ਵਰਗੀਆਂ ਸੇਵਾਵਾਂ ਦੀ ਉਦਾਹਰਣ ਦਿੰਦਿਆਂ ਕਿਹਾ ਕਿ ਉਪਭੋਗਤਾ ਜੋ ਵਰਤਦੇ ਹਨ ਉਸੇ ਲਈ ਭੁਗਤਾਨ ਕਰਦੇ ਹਨ, ਪਰ ਮੋਬਾਈਲ ਡਾਟਾ ਦੇ ਖੇਤਰ ਵਿੱਚ ਉਨ੍ਹਾਂ ਨਾਲ "ਧੋਖਾ" ਹੋ ਰਿਹਾ ਹੈ।
ਤਿੰਨ ਪ੍ਰਮੁੱਖ ਮੰਗਾਂ
ਰਾਘਵ ਚੱਢਾ ਨੇ ਟੈਲੀਕਾਮ ਉਪਭੋਗਤਾਵਾਂ ਦੇ ਹੱਕ 'ਚ ਤਿੰਨ ਮੰਗਾਂ ਪੇਸ਼ ਕੀਤੀਆਂ:
1. ਡਾਟਾ ਰੋਲਓਵਰ: ਜੋ ਡੇਟਾ ਦਿਨ ਦੇ ਅੰਤ ਵਿੱਚ ਬਚ ਜਾਂਦਾ ਹੈ, ਉਸਨੂੰ ਅਗਲੇ ਦਿਨ ਦੀ ਡਾਟਾ ਲਿਮਿਟ ਵਿੱਚ ਜੋੜਿਆ ਜਾਣਾ ਚਾਹੀਦਾ ਹੈ।
2. ਛੋਟ ਜਾਂ ਐਡਜਸਟਮੈਂਟ: ਜੇਕਰ ਕੋਈ ਗਾਹਕ ਲਗਾਤਾਰ ਆਪਣੇ ਡਾਟਾ ਦੀ ਘੱਟ ਵਰਤੋਂ ਕਰਦਾ ਹੈ, ਤਾਂ ਉਸ ਮੁੱਲ ਨੂੰ ਅਗਲੇ ਮਹੀਨੇ ਦੇ ਰੀਚਾਰਜ ਵਿੱਚੋਂ ਘਟਾਇਆ ਜਾਣਾ ਚਾਹੀਦਾ ਹੈ।
3.ਡਾਟਾ ਟ੍ਰਾਂਸਫਰ: ਉਪਭੋਗਤਾਵਾਂ ਨੂੰ ਆਪਣੇ ਰਿਸ਼ਤੇਦਾਰਾਂ ਅਤੇ ਦੋਸਤਾਂ ਨੂੰ ਅਣਵਰਤਿਆ ਡੇਟਾ ਟ੍ਰਾਂਸਫਰ ਕਰਨ ਦੀ ਇਜਾਜ਼ਤ ਮਿਲਣੀ ਚਾਹੀਦੀ ਹੈ।
ਡਾਟਾ ਨੂੰ ਦੱਸਿਆ 'ਡਿਜੀਟਲ ਜਾਇਦਾਦ'
ਉਨ੍ਹਾਂ ਜ਼ੋਰ ਦੇ ਕੇ ਕਿਹਾ ਕਿ ਅਣਵਰਤੇ ਡਾਟਾ ਨੂੰ ਉਪਭੋਗਤਾ ਦੀ 'ਡਿਜੀਟਲ ਜਾਇਦਾਦ' ਵਜੋਂ ਦੇਖਿਆ ਜਾਣਾ ਚਾਹੀਦਾ ਹੈ। ਉਨ੍ਹਾਂ ਕਿਹਾ ਕਿ ਜਿਵੇਂ ਅਸੀਂ 'ਡਿਜੀਟਲ ਇੰਡੀਆ' ਦਾ ਨਿਰਮਾਣ ਕਰ ਰਹੇ ਹਾਂ, ਇੰਟਰਨੈੱਟ ਤੱਕ ਪਹੁੰਚ ਅਜਿਹੇ ਡਾਟਾ 'ਤੇ ਨਿਰਭਰ ਨਹੀਂ ਹੋ ਸਕਦੀ ਜੋ ਅਚਾਨਕ ਗਾਇਬ ਹੋ ਜਾਂਦਾ ਹੈ।