ਨਵੀਂ ਦਿੱਲੀ : ਦਿੱਲੀ ਦੀ ਸਰਕਾਰ ਲੋਕਾਂ ਦੀਆਂ ਸਹੂਲਤਾਵਾਂ ਨੂੰ ਲੈ ਕੇ ਕਈ ਨਵੀਆਂ ਯੋਜਵਾਨਾਂ ਚਲਾ ਰਹੀ ਹੈ, ਜੋ ਬਹੁਤ ਫ਼ਾਇਦੇਮੰਦ ਸਾਬਿਤ ਹੋ ਰਹੀਆਂ ਹਨ। ਦਿੱਲੀ ਸਰਕਾਰ ਨੇ ਸਹੇਲੀ ਪਿੰਕ ਸਮਾਰਟ ਕਾਰਡ 2026 ਲਾਂਚ ਕਰਕੇ ਔਰਤਾਂ ਅਤੇ ਟ੍ਰਾਂਸਜੈਂਡਰ ਯਾਤਰੀਆਂ ਦੇ ਸਫ਼ਰ ਨੂੰ ਹੋਰ ਵੀ ਸੁਖਾਲਾ ਅਤੇ ਹਾਈਟੈੱਕ ਬਣਾ ਦਿੱਤਾ ਹੈ। ਰਾਸ਼ਟਰਪਤੀ ਦ੍ਰੌਪਦੀ ਮੁਰਮੂ ਵੱਲੋਂ ਲਾਂਚ ਕੀਤੇ ਗਏ 'ਸਹੇਲੀ ਪਿੰਕ ਸਮਾਰਟ ਕਾਰਡ 2026' ਦੀ ਵੰਡ ਹੁਣ ਦਿੱਲੀ ਵਿੱਚ ਸ਼ੁਰੂ ਹੋ ਚੁੱਕੀ ਹੈ। ਇਸ ਕਾਰਡ ਦੇ ਆਉਣ ਨਾਲ ਹੁਣ ਪੇਪਰ ਟਿਕਟਾਂ ਦਾ ਝੰਜਟ ਖ਼ਤਮ ਹੋ ਜਾਵੇਗਾ ਅਤੇ ਔਰਤਾਂ 'ਟੈਪ ਐਂਡ ਟ੍ਰੈਵਲ' ਮਾਡਲ ਰਾਹੀਂ ਡਿਜੀਟਲ ਸਫ਼ਰ ਦਾ ਆਨੰਦ ਮਾਣ ਸਕਣਗੀਆਂ।
ਇੱਕ ਕਾਰਡ, ਕਈ ਫਾਇਦੇ:
ਦੱਸ ਦੇਈਏ ਕਿ ਇਹ ਦਿੱਲੀ ਵਿੱਚ ਔਰਤਾਂ ਲਈ ਡਿਜੀਟਲ ਯਾਤਰਾ ਵੱਲ ਇੱਕ ਵੱਡਾ ਕਦਮ ਹੈ। ਇਸਦਾ ਟੀਚਾ ਔਰਤਾਂ ਅਤੇ ਟ੍ਰਾਂਸਜੈਂਡਰ ਯਾਤਰੀਆਂ ਲਈ ਸੁਰੱਖਿਅਤ, ਸੁਵਿਧਾਜਨਕ ਅਤੇ ਤਕਨੀਕੀ-ਅਨੁਕੂਲ ਆਵਾਜਾਈ ਪ੍ਰਦਾਨ ਕਰਨਾ ਹੈ। 'ਸਹੇਲੀ ਪਿੰਕ ਸਮਾਰਟ ਕਾਰਡ 2026' ਬੱਸ, ਮੈਟਰੋ ਤੇ RRTS ਸਭ ਥਾਂ 'ਤੇ ਇਸਤੇਮਾਲ ਕੀਤਾ ਜਾ ਸਕਦਾ ਹੈ। ਇਹ ਕਾਰਡ 'ਨੈਸ਼ਨਲ ਕਾਮਨ ਮੋਬਿਲਿਟੀ ਕਾਰਡ' (NCMC) ਫਰੇਮਵਰਕ 'ਤੇ ਅਧਾਰਿਤ ਹੈ। ਇਸ ਦੀਆਂ ਖ਼ੂਬੀਆਂ ਹੇਠ ਲਿਖੇ ਅਨੁਸਾਰ ਹਨ:
ਮੁਫ਼ਤ ਸਫ਼ਰ: ਯੋਗ ਔਰਤਾਂ ਅਤੇ ਟ੍ਰਾਂਸਜੈਂਡਰ DTC ਅਤੇ ਕਲੱਸਟਰ ਬੱਸਾਂ ਵਿੱਚ ਬਿਲਕੁਲ ਮੁਫ਼ਤ ਸਫ਼ਰ ਕਰ ਸਕਣਗੇ।
ਮਲਟੀ-ਯੂਜ਼: ਇਸੇ ਇੱਕ ਕਾਰਡ ਦੀ ਵਰਤੋਂ ਦਿੱਲੀ ਮੈਟਰੋ ਅਤੇ RRTS (ਰੇਲਵੇ ਨੈੱਟਵਰਕ) ਵਿੱਚ ਵੀ ਕੀਤੀ ਜਾ ਸਕੇਗੀ।
ਸੁਰੱਖਿਆ: ਕਾਰਡ 'ਤੇ ਫੋਟੋ ਅਤੇ QR ਕੋਡ ਹੋਵੇਗਾ, ਤਾਂ ਜੋ ਇਸ ਦੀ ਦੁਰਵਰਤੋਂ ਨਾ ਹੋ ਸਕੇ।
ਕੌਣ ਬਣਵਾ ਸਕਦਾ ਹੈ ਇਹ ਕਾਰਡ?
ਸਰਕਾਰ ਵੱਲੋਂ ਤੈਅ ਕੀਤੇ ਗਏ ਮਾਪਦੰਡਾਂ ਅਨੁਸਾਰ ਬਿਨੈਕਾਰ ਦਿੱਲੀ ਦੀ ਸਥਾਈ ਨਿਵਾਸੀ ਔਰਤ ਜਾਂ ਟ੍ਰਾਂਸਜੈਂਡਰ ਹੋਣੀ ਚਾਹੀਦੀ ਹੈ। ਘੱਟੋ-ਘੱਟ ਉਮਰ 12 ਸਾਲ ਹੋਣੀ ਲਾਜ਼ਮੀ ਹੈ। ਆਧਾਰ ਕਾਰਡ, ਵੋਟਰ ਆਈਡੀ ਅਤੇ ਦਿੱਲੀ ਦੇ ਰਿਹਾਇਸ਼ੀ ਸਬੂਤ (Address Proof) ਦੀ ਲੋੜ ਪਵੇਗੀ। ਦਿੱਲੀ ਸਰਕਾਰ ਨੇ ਇਸ ਕਾਰਡ ਦੀ ਵੰਡ ਲਈ ਪੂਰੀ ਦਿੱਲੀ ਵਿੱਚ 50 ਕੇਂਦਰ ਬਣਾਏ ਹਨ। ਡੀ.ਐੱਮ. (DM) ਦਫ਼ਤਰ, ਐੱਸ.ਡੀ.ਐੱਮ. (SDM) ਦਫ਼ਤਰ ਅਤੇ ਚੋਣਵੇਂ DTC ਡਿਪੂਆਂ 'ਤੇ ਸਵੇਰੇ 9 ਵਜੇ ਤੋਂ ਸ਼ਾਮ 5 ਵਜੇ ਤੱਕ ਕਾਰਡ ਬਣਾਏ ਜਾ ਰਹੇ ਹਨ।
ਆਨਲਾਈਨ: ਤੁਸੀਂ DTC ਦੀ ਅਧਿਕਾਰਤ ਵੈੱਬਸਾਈਟ ਜਾਂ 'ਪਿੰਕ ਸਹੇਲੀ ਪੋਰਟਲ' 'ਤੇ ਜਾ ਕੇ ਫਾਰਮ ਭਰ ਸਕਦੇ ਹੋ। ਵੈਰੀਫਿਕੇਸ਼ਨ ਤੋਂ ਬਾਅਦ ਕਾਰਡ ਸਿੱਧਾ ਤੁਹਾਡੇ ਘਰ ਭੇਜ ਦਿੱਤਾ ਜਾਵੇਗਾ।
ਸਮਾਰਟ ਮੋਬਿਲਿਟੀ ਵੱਲ ਵੱਡਾ ਕਦਮ
ਦਿੱਲੀ ਸਰਕਾਰ ਦਾ ਮੰਨਣਾ ਹੈ ਕਿ ਇਹ ਕਾਰਡ ਔਰਤਾਂ ਨੂੰ ਆਰਥਿਕ ਤੌਰ 'ਤੇ ਮਜ਼ਬੂਤ ਕਰੇਗਾ, ਤਾਂ ਜੋ ਉਹ ਬਿਨਾਂ ਕਿਰਾਏ ਦੀ ਚਿੰਤਾ ਕੀਤੇ ਨੌਕਰੀ, ਕਾਲਜ ਜਾਂ ਹੋਰ ਜ਼ਰੂਰੀ ਕੰਮਾਂ ਲਈ ਸਫ਼ਰ ਕਰ ਸਕਣ। ਇਸ ਨਾਲ ਬੱਸਾਂ ਵਿੱਚ ਲੰਬੀਆਂ ਕਤਾਰਾਂ ਤੋਂ ਵੀ ਮੁਕਤੀ ਮਿਲੇਗੀ।