ਤਾਈਵਾਨੀ ਸਮੁੰਦਰ 'ਚ ਚੀਨੀ ਫੌਜ ਦੀਆਂ ਦਿਨੋਂ-ਦਿਨ ਵਧਦੀਆਂ ਜਾ ਰਹੀਆਂ ਗਤੀਵਿਧੀਆਂ ਕਾਰਨ ਦੋਵਾਂ ਦੇਸ਼ਾਂ ਤਣਾਅ ਬਹੁਤ ਵਧ ਗਿਆ ਹੈ। ਇਸੇ ਦੌਰਾਨ ਬੁੱਧਵਾਰ ਸਵੇਰ 6 ਵਜੇ ਤੱਕ, ਤਾਈਵਾਨ ਦੇ ਰਾਸ਼ਟਰੀ ਰੱਖਿਆ ਮੰਤਰਾਲੇ ਨੇ ਦੇਸ਼ ਦੇ ਖੇਤਰੀ ਪਾਣੀਆਂ ਦੇ ਆਲੇ-ਦੁਆਲੇ ਚੀਨ ਦੇ 7 ਫੌਜੀ ਜਹਾਜ਼ਾਂ ਅਤੇ 6 ਜਲ ਸੈਨਾ ਦੇ ਜਹਾਜ਼ਾਂ ਨੂੰ ਦੇਖਿਆ। ਇਨ੍ਹਾਂ ਵਿੱਚੋਂ 7 ਜਹਾਜ਼ਾਂ ਦੀਆਂ ਉਡਾਣਾਂ ਵਿੱਚੋਂ 2 ਨੇ ਮੱਧ ਰੇਖਾ ਨੂੰ ਪਾਰ ਕੀਤਾ ਅਤੇ ਤਾਈਵਾਨ ਦੇ ਉੱਤਰੀ ਅਤੇ ਦੱਖਣ-ਪੱਛਮੀ ADIZ (ਏਅਰ ਡਿਫੈਂਸ ਆਈਡੈਂਟੀਫਿਕੇਸ਼ਨ ਜ਼ੋਨ) ਵਿੱਚ ਦਾਖਲ ਹੋਏ। ਮੰਗਲਵਾਰ ਨੂੰ ਵੀ ਇਲਾਕੇ 'ਚ 8 ਚੀਨੀ ਜਹਾਜ਼ਾਂ ਅਤੇ 6 ਜਲ ਸੈਨਾ ਦੇ ਜਹਾਜ਼ਾਂ ਦੀ ਗਤੀਵਿਧੀ ਦੇਖੀ ਗਈ ਸੀ।
ਇਸ ਤਣਾਅ ਦੇ ਮੱਦੇਨਜ਼ਰ, ਜਾਪਾਨ ਦੀ ਪ੍ਰਧਾਨ ਮੰਤਰੀ ਸਨੇਈ ਤਾਕਾਈਚੀ ਨੇ 7 ਨਵੰਬਰ ਨੂੰ ਸੰਸਦ ਵਿੱਚ ਕਿਹਾ ਸੀ ਕਿ ਤਾਈਵਾਨ 'ਤੇ ਚੀਨ ਦਾ ਹਮਲਾ ਜਾਪਾਨ ਲਈ ਹੋਂਦ ਨੂੰ ਖ਼ਤਰਾ ਪੈਦਾ ਕਰਨ ਵਾਲੀ ਸਥਿਤੀ ਮੰਨਿਆ ਜਾ ਸਕਦਾ ਹੈ, ਜਿਸ ਦੇ ਨਤੀਜੇ ਵਜੋਂ ਜਾਪਾਨ ਫੌਜੀ ਕਾਰਵਾਈ ਕਰਨ ਤੋਂ ਗੁਰੇਜ਼ ਨਹੀਂ ਕਰੇਗਾ। ਤਾਕਾਈਚੀ ਕਈ ਦਹਾਕਿਆਂ ਵਿੱਚ ਪਹਿਲੀ ਜਾਪਾਨੀ ਨੇਤਾ ਹਨ ਜਿਨ੍ਹਾਂ ਨੇ ਖੁੱਲ੍ਹੇਆਮ ਕਿਹਾ ਹੈ ਕਿ ਚੀਨ-ਤਾਈਵਾਨ ਸੰਕਟ ਜਾਪਾਨ ਦੀ ਫੌਜੀ ਸ਼ਮੂਲੀਅਤ ਦਾ ਕਾਰਨ ਬਣ ਸਕਦਾ ਹੈ।
ਤਾਕਾਈਚੀ ਦੇ ਇਸ ਬਿਆਨ ਨੇ ਚੀਨ ਨੂੰ ਨਾਰਾਜ਼ ਕਰ ਦਿੱਤਾ ਹੈ, ਜਿਸ ਨੇ ਜਾਪਾਨ ਦੀ ਆਰਥਿਕਤਾ ਨੂੰ ਨੁਕਸਾਨ ਪਹੁੰਚਾਉਣ ਲਈ ਬਦਲੇ ਦੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ। ਇਸ ਵਿੱਚ ਜਾਪਾਨ ਦੀ ਯਾਤਰਾ ਅਤੇ ਉੱਥੇ ਪੜ੍ਹਾਈ ਕਰਨ ਵਿਰੁੱਧ ਚਿਤਾਵਨੀਆਂ ਜਾਰੀ ਕਰਨਾ ਅਤੇ ਜਾਪਾਨੀ ਸਮੁੰਦਰੀ ਭੋਜਨ ਦੀ ਦਰਾਮਦ ਨੂੰ ਰੋਕਣਾ ਸ਼ਾਮਲ ਹੈ। ਇੱਥੋਂ ਤੱਕ ਕਿ ਓਸਾਕਾ ਵਿੱਚ ਚੀਨੀ ਕੌਂਸਲ ਜਨਰਲ ਜ਼ੂ ਜਿਆਨ ਨੇ ਇੱਕ ਸੋਸ਼ਲ ਮੀਡੀਆ ਪੋਸਟ ਵਿੱਚ ਕਿਹਾ ਸੀ ਕਿ ਤਾਕਾਈਚੀ ਦਾ ਸਿਰ ਕਲਮ ਕਰ ਦੇਣਾ ਚਾਹੀਦਾ ਹੈ।
ਅਮਰੀਕਾ ਦੇ ਸਾਬਕਾ ਰੱਖਿਆ ਅਧਿਕਾਰੀ ਐਲੀ ਰੈਟਨਰ ਨੇ ਤਾਕਾਈਚੀ ਦੇ ਬਿਆਨ ਦਾ ਸਮਰਥਨ ਕੀਤਾ ਹੈ ਅਤੇ ਬੀਜਿੰਗ ਦੀ ਪ੍ਰਤੀਕਿਰਿਆ ਨੂੰ ਅਣਉਚਿਤ ਕਰਾਰ ਦਿੱਤਾ ਹੈ, ਕਿਉਂਕਿ ਤਾਕਾਈਚੀ ਦਾ ਬਿਆਨ ਜਾਪਾਨ ਦੀ ਅਧਿਕਾਰਤ ਤੇ ਮੌਜੂਦਾ ਸਥਿਤੀ ਨੂੰ ਹੀ ਦਰਸਾਉਂਦਾ ਹੈ।