ਮੁੰਬਈ : ਪਲੇਬੈਕ ਗਾਇਕ ਸੋਨੂੰ ਨਿਗਮ ਨੇ IIFA ਐਵਾਰਡ 2025 ਵਿੱਚ ਸਰਵੋਤਮ ਪਲੇਬੈਕ ਗਾਇਕ (ਪੁਰਸ਼) ਨੋਮੀਨੇਸ਼ਨ ਤੋਂ ਬਾਹਰ ਕੀਤੇ ਜਾਣ ਤੋਂ ਬਾਅਦ ਆਪਣੀ ਨਿਰਾਸ਼ਾ ਜ਼ਾਹਰ ਕੀਤੀ ਹੈ। ਗਾਇਕ ਨੇ ਇੰਟਰਨੈਸ਼ਨਲ ਇੰਡੀਅਨ ਫਿਲਮ ਅਕੈਡਮੀ ਅਵਾਰਡਸ (ਆਈਫਾ) 'ਤੇ ਇੱਕ ਗੰਭੀਰ ਦੋਸ਼ ਲਗਾਇਆ ਹੈ ਅਤੇ ਦਾਅਵਾ ਕੀਤਾ ਹੈ ਕਿ ਉਨ੍ਹਾਂ ਨੂੰ ਰਾਜਸਥਾਨ ਦੀ ਨੌਕਰਸ਼ਾਹੀ ਕਾਰਨ ਸਰਵੋਤਮ ਮੇਲ ਪਲੇਬੈਕ ਗਾਇਕ ਨੋਮੀਨੇਸ਼ਨ ਨਹੀਂ ਮਿਲਿਆ। ਇਸ ਮੁੱਦੇ 'ਤੇ ਆਵਾਜ਼ ਚੁੱਕਣ ਤੋਂ ਬਾਅਦ, ਉਹ ਸੋਸ਼ਲ ਮੀਡੀਆ 'ਤੇ ਬਹੁਤ ਸੁਰਖੀਆਂ ਬਟੋਰ ਰਿਹਾ ਹੈ। ਤੁਹਾਨੂੰ ਦੱਸ ਦੇਈਏ ਕਿ ਆਈਫਾ ਐਵਾਰਡਜ਼ 2025 ਜੈਪੁਰ ਵਿੱਚ 8 ਤੋਂ 9 ਮਾਰਚ ਦਰਮਿਆਨ ਆਯੋਜਿਤ ਕੀਤਾ ਗਿਆ ਸੀ।
ਸੋਨੂੰ ਨਿਗਮ ਨੇ ਇੰਸਟਾਗ੍ਰਾਮ 'ਤੇ ਇੱਕ ਸਕ੍ਰੀਨਸ਼ਾਟ ਸਾਂਝਾ ਕੀਤਾ ਅਤੇ ਲਿਖਿਆ, "ਧੰਨਵਾਦ ਆਈਫਾ... ਆਖ਼ਿਰਕਾਰ ਤੁਸੀਂ ਰਾਜਸਥਾਨ ਦੀ ਨੌਕਰਸ਼ਾਹੀ ਨੂੰ ਜਵਾਬ ਵੀ ਦੇਣਾ ਸੀ।" ਇਸ ਪੋਸਟ ਵਿੱਚ ਉਨ੍ਹਾਂ ਨੇ ਆਪਣੀ ਨਵੀਂ ਰਿਲੀਜ਼ ਹੋਈ ਫਿਲਮ 'ਭੂਲ ਭੁਲੱਈਆ-3' ਦੇ ਗੀਤ 'ਮੇਰੇ ਢੋਲਣਾ 3.0' ਦਾ ਲਿੰਕ ਸਾਂਝਾ ਕੀਤਾ, ਜਿਸ ਨੂੰ ਉਨ੍ਹਾਂ ਨੇ ਆਪਣੀ ਆਵਾਜ਼ ਦਿੱਤੀ ਹੈ ਅਤੇ ਇਸ ਲਈ ਉਨ੍ਹਾਂ ਨੂੰ ਨੋਮੀਨੇਸ਼ਨ ਦੀ ਉਮੀਦ ਸੀ।
ਸੋਨੂੰ ਨਿਗਮ ਨੇ ਇਸ ਪੋਸਟ ਵਿੱਚ ਪੁਰਸਕਾਰ ਸਮਾਗਮ ਦੇ ਸਰਵੋਤਮ ਮੇਲ ਪਲੇਬੈਕ ਗਾਇਕ ਨੋਮੀਨੇਸ਼ਨ ਦਾ ਸਕ੍ਰੀਨਸ਼ਾਟ ਵੀ ਸਾਂਝਾ ਕੀਤਾ ਹੈ, ਜਿਸ ਵਿਚ ਉਨ੍ਹਾਂ ਦਾ ਨਾਮ ਨਹੀਂ ਸੀ। 2025 ਦੇ ਆਈਫਾ ਐਵਾਰਡਾਂ ਲਈ ਨਾਮਜ਼ਦਗੀਆਂ ਪ੍ਰਾਪਤ ਕਰਨ ਵਾਲੇ ਗਾਇਕਾਂ ਵਿੱਚ ਮਿਤਰਾਜ (ਅੰਖੀਆਂ ਗੁਲਾਬੀ), ਅਰਿਜੀਤ ਸਿੰਘ (ਸਜਨੀ), ਕਰਨ ਔਜਲਾ (ਤੌਬਾ-ਤੌਬਾ), ਬਾਦਸ਼ਾਹ (ਨੈਨਾ), ਜੁਬਿਨ ਨੌਟਿਆਲ (ਦੁਆ) ਅਤੇ ਦਿਲਜੀਤ ਦੋਸਾਂਝ ਸ਼ਾਮਲ ਸਨ। ਇਨ੍ਹਾਂ ਸਾਰੇ ਗਾਇਕਾਂ ਵਿੱਚੋਂ, ਜਿਸ ਨੂੰ ਇਹ ਪੁਰਸਕਾਰ ਮਿਲਿਆ ਉਹ ਸੀ ਜੁਬਿਨ ਨੌਟਿਆਲ ਜਿਸਦਾ ਗੀਤ 'ਦੁਆ' ਯਾਮੀ ਗੌਤਮ ਦੀ 'ਆਰਟੀਕਲ 370' ਵਿੱਚ ਸੀ।