ਨਵੀਂ ਦਿੱਲੀ : ਯੂਨਾਨ ਦੇ ਨੌਜਵਾਨ ਖਿਡਾਰੀ ਸਟੇਫਾਨੋਸ ਸਾਕੇਲਾਰਿਡਿਸ ਨੇ ਦਿੱਲੀ ਓਪਨ ਵਿੱਚ ਸ਼ਾਨਦਾਰ ਵਾਪਸੀ ਕਰਦਿਆਂ ਆਪਣਾ ਪਹਿਲਾ ਸਿੰਗਲਜ਼ ਏ.ਟੀ.ਪੀ. (ATP) ਚੈਲੰਜਰ ਖਿਤਾਬ ਜਿੱਤ ਕੇ ਇਤਿਹਾਸ ਰਚ ਦਿੱਤਾ ਹੈ। ਐਤਵਾਰ ਨੂੰ ਖੇਡੇ ਗਏ ਫਾਈਨਲ ਵਿੱਚ ਉਨ੍ਹਾਂ ਨੇ ਬ੍ਰਿਟੇਨ ਦੇ ਤਜ਼ਰਬੇਕਾਰ ਅਤੇ ਪੰਜਵੀਂ ਦਰਜਾ ਪ੍ਰਾਪਤ ਖਿਡਾਰੀ ਓਲੀਵਰ ਕ੍ਰੌਫਰਡ ਨੂੰ ਇੱਕ ਬੇਹੱਦ ਰੋਮਾਂਚਕ ਮੁਕਾਬਲੇ ਵਿੱਚ ਮਾਤ ਦਿੱਤੀ।
3 ਘੰਟੇ ਤੋਂ ਵੱਧ ਚੱਲੀ ਖਿਤਾਬੀ ਜੰਗ
21 ਸਾਲਾ ਸਾਕੇਲਾਰਿਡਿਸ ਅਤੇ ਕ੍ਰੌਫਰਡ ਵਿਚਾਲੇ ਇਹ ਖ਼ਿਤਾਬੀ ਮੁਕਾਬਲਾ ਤਿੰਨ ਘੰਟੇ ਅਤੇ ਨੌਂ ਮਿੰਟ ਤੱਕ ਚੱਲਿਆ। ਸਾਕਲੇਰੀਡਿਸ ਨੇ ਇਹ ਮੈਚ 7-5, 5-6, 7-6 ਨਾਲ ਆਪਣੇ ਨਾਮ ਕੀਤਾ। ਪਹਿਲੇ ਸੈੱਟ ਵਿੱਚ ਦੋਵਾਂ ਖਿਡਾਰੀਆਂ ਵਿਚਾਲੇ ਸਰਵਿਸ ਬ੍ਰੇਕ ਦੀ ਜੰਗ ਦੇਖਣ ਨੂੰ ਮਿਲੀ, ਪਰ ਸਾਕਲੇਰੀਡਿਸ ਨੇ ਸੰਜਮ ਬਣਾਈ ਰੱਖਿਆ ਅਤੇ ਪਹਿਲਾ ਸੈੱਟ ਜਿੱਤ ਲਿਆ। ਦੂਜੇ ਸੈੱਟ ਵਿੱਚ ਕ੍ਰੌਫਰਡ ਨੇ ਜ਼ੋਰਦਾਰ ਵਾਪਸੀ ਕਰਦਿਆਂ ਮੁਕਾਬਲਾ ਬਰਾਬਰੀ 'ਤੇ ਲਿਆਂਦਾ।
ਹਾਰ ਦੇ ਮੂੰਹੋਂ ਖੋਹ ਕੇ ਲਿਆਂਦੀ ਜਿੱਤ
ਨਿਰਣਾਇਕ ਸੈੱਟ ਵਿੱਚ ਇੱਕ ਸਮਾਂ ਅਜਿਹਾ ਸੀ ਜਦੋਂ ਸਾਕੇਲਾਰਿਡਿਸ ਮੈਚ ਹਾਰਦੇ ਹੋਏ ਨਜ਼ਰ ਆ ਰਹੇ ਸਨ। ਕ੍ਰੌਫਰਡ ਨੇ 5-2 ਦੀ ਮਜ਼ਬੂਤ ਬੜ੍ਹਤ ਬਣਾ ਲਈ ਸੀ, ਪਰ ਸਾਕੇਲਾਰਿਡਿਸ ਨੇ ਹਿੰਮਤ ਨਹੀਂ ਹਾਰੀ ਅਤੇ ਲਗਾਤਾਰ ਤਿੰਨ ਗੇਮਾਂ ਜਿੱਤ ਕੇ ਸਕੋਰ 5-5 ਨਾਲ ਬਰਾਬਰ ਕਰ ਦਿੱਤਾ। ਮੁਕਾਬਲਾ ਟਾਈ-ਬ੍ਰੇਕਰ ਵਿੱਚ ਪਹੁੰਚਿਆ, ਜਿੱਥੇ ਸਾਕੇਲਾਰਿਡਿਸ ਨੇ 8-6 ਨਾਲ ਜਿੱਤ ਦਰਜ ਕਰਕੇ ਖ਼ਿਤਾਬ 'ਤੇ ਕਬਜ਼ਾ ਕੀਤਾ।
ਇਨਾਮੀ ਰਾਸ਼ੀ ਅਤੇ ਰੈਂਕਿੰਗ ਵਿੱਚ ਉਛਾਲ
ਇਸ ਜਿੱਤ ਨਾਲ ਸਾਕੇਲਾਰਿਡਿਸ ਨੂੰ 17,000 ਡਾਲਰ (ਲਗਭਗ 14 ਲੱਖ ਰੁਪਏ) ਦੀ ਇਨਾਮੀ ਰਾਸ਼ੀ ਅਤੇ 75 ਏ.ਟੀ.ਪੀ. ਰੈਂਕਿੰਗ ਅੰਕ ਮਿਲੇ ਹਨ। ਇਸ ਸਫਲਤਾ ਤੋਂ ਬਾਅਦ ਉਨ੍ਹਾਂ ਦੀ ਰੈਂਕਿੰਗ ਕਰੀਅਰ ਦੇ ਸਰਵੋਤਮ 230ਵੇਂ ਸਥਾਨ ਦੇ ਅੰਦਰ ਪਹੁੰਚਣ ਦੀ ਉਮੀਦ ਹੈ। ਦੂਜੇ ਪਾਸੇ, ਉਪ-ਵਿਜੇਤਾ ਕ੍ਰੌਫਰਡ ਨੂੰ 9,600 ਡਾਲਰ ਅਤੇ 44 ਅੰਕ ਪ੍ਰਾਪਤ ਹੋਏ, ਜਿਸ ਨਾਲ ਉਹ ਮੁੜ ਚੋਟੀ ਦੇ 200 ਖਿਡਾਰੀਆਂ ਵਿੱਚ ਸ਼ਾਮਲ ਹੋ ਸਕਦਾ ਹੈ।