ਚੰਡੀਗੜ੍ਹ : ਸ਼੍ਰੀ ਕ੍ਰਿਸ਼ਨ ਪ੍ਰਿਯਾ ਜੁ ਸੰਕੀਰਤਨ ਮੰਡਲ ਦੀ ਸਰਪ੍ਰਸਤੀ ਹੇਠ ਸੈਕਟਰ 34 ਦੇ ਮੇਲਾ ਗਰਾਉਂਡ ਵਿਖੇ ਵ੍ਰਿੰਦਾਵਨ ਪ੍ਰਕਾਸ਼ ਉਤਸਵ ਅਤੇ ਸ਼੍ਰੀ ਮਦ ਭਾਗਵਤ ਕਥਾ ਦਾ ਆਯੋਜਨ ਕੀਤਾ ਜਾ ਰਿਹਾ ਹੈ, ਜੋ ਕਿ 13 ਅਕਤੂਬਰ ਤੱਕ ਜਾਰੀ ਰਹੇਗਾ।
ਕਥਾ ਦੇ ਤੀਜੇ ਦਿਨ ਅੱਜ ਪੰਜਾਬ ਦੇ ਰਾਜਪਾਲ ਗੁਲਾਬ ਚੰਦ ਕਟਾਰੀਆ ਨੇ ਸ਼ਿਰਕਤ ਕੀਤੀ। ਇਸ ਮੌਕੇ ਪ੍ਰੋਗਰਾਮ ਦੇ ਪ੍ਰਬੰਧਕ ਬੀ ਪਰਾਕ ਅਤੇ ਮੁਨੀਸ਼ ਬਜਾਜ ਨੇ ਰਾਜਪਾਲ ਤੇ ਧਾਰਮਿਕ ਗੁਰੂ ਜਯਾ ਕਿਸ਼ੋਰੀ ਦਾ ਸ਼ਾਨਦਾਰ ਸਵਾਗਤ ਕੀਤਾ। ਇਸ ਉਪਰੰਤ ਪੂਰੇ ਰੀਤੀ ਰਿਵਾਜਾਂ ਨਾਲ ਰਾਧਾ ਰਮਨ ਹਰੀ ਬੋਲ ਨਾਲ ਕਥਾ ਸ਼ੁਰੂ ਹੋਈ। ਵਿਸ਼ਵ ਪ੍ਰਸਿੱਧ ਕਥਾ ਵਿਆਸ, ਪਰਮ ਪੂਜਯ ਸ਼੍ਰੀ ਇੰਦਰੇਸ਼ ਮਹਾਰਾਜ ਨੇ ਕਿਹਾ ਕਿ ਗਾਇਕ ਬੀ ਪਰਾਕ ਦੇ ਯਤਨਾਂ ਸਦਕਾ ਚੰਡੀਗੜ੍ਹ ਹੁਣ ਵਰਿੰਦਾਵਨ ਬਣ ਗਿਆ ਹੈ। ਉਨ੍ਹਾਂ ਕਿਹਾ ਕਿ ਜਿਸ ਥਾਂ 'ਤੇ ਪੂਜਾ ਹੁੰਦੀ ਹੈ, ਉਹ ਧਰਤੀ ਪੂਜਣਯੋਗ ਬਣ ਜਾਂਦੀ ਹੈ। ਚੰਡੀਗੜ੍ਹ ਦੀ ਧਰਤੀ, ਜਿਸ 'ਤੇ ਅੱਜ ਪੂਜਾ ਕੀਤੀ ਜਾ ਰਹੀ ਹੈ, ਉਹ ਸੱਤ ਦਿਨਾਂ ਬਾਅਦ ਪੂਜਣਯੋਗ ਹੋ ਜਾਵੇਗੀ। ਉਨ੍ਹਾਂ ਕਿਹਾ ਕਿ ਪੂਜਾ ਸਥਾਨ ਮਹਾਦੇਵ ਨੇ ਪਹਿਲਾਂ ਹੀ ਚੁਣਿਆ ਹੋਇਆ ਹੁੰਦਾ ਹੈ। ਉਨ੍ਹਾਂ ਕਿਹਾ ਕਿ ਇਸ ਕਥਾ ਵਿੱਚ ਸੰਤ ਸਮਾਜ ਦੇ ਵੱਡੇ ਵੱਡੇ ਧਾਰਮਿਕ ਗੁਰੂ ਵੀ ਆਉਣਗੇ। ਉਨ੍ਹਾਂ ਸ਼ਰਧਾਲੂਆਂ ਨੂੰ ਅਗਲੇ ਸਾਲ ਆਉਣ ਦਾ ਵਾਅਦਾ ਵੀ ਕੀਤਾ।
ਪਰਮ ਸਤਿਕਾਰਯੋਗ ਸ਼੍ਰੀ ਇੰਦਰੇਸ਼ ਮਹਾਰਾਜ ਨੇ ਕਥਾ ਵਿੱਚ ਅੱਜ ਗੋਪੀ ਨਾਥ ਜੀ ਬਾਰੇ ਦੱਸਿਆ। ਉਨ੍ਹਾਂ ਕਿਹਾ ਕਿ ਭਾਗਾਂ ਵਾਲੇ ਲੋਕਾਂ ਨੂੰ ਸਤਿਸੰਗ ਸੁਣਨ ਨੂੰ ਮਿਲਦਾ ਹੈ ਅਤੇ ਸਾਨੂੰ ਸਤਿਸੰਗ ਵਿਚ ਸੁਣੇ ਵਿਚਾਰਾਂ ਨੂੰ ਆਪਣੇ ਜੀਵਨ ਵਿਚ ਲਾਗੂ ਕਰਨਾ ਚਾਹੀਦਾ ਹੈ। ਉਨ੍ਹਾਂ ਦੱਸਿਆ ਕਿ ਪਹਿਲਾਂ ਇੱਕ ਹੀ ਵੇਦ ਸੀ, ਪਰ ਵੇਦ ਵਿਆਸ ਜੀ ਨੇ ਚਾਰ ਵੇਦ ਲਿਖੇ। ਪਹਿਲੇ ਸਮਿਆਂ ਵਿੱਚ ਇੱਕ ਸ਼ਬਦ ਓਮ ਦੇ ਉਚਾਰਨ ਨਾਲ ਸਾਰੇ ਸਵਾਲਾਂ ਦੇ ਜਵਾਬ ਮਿਲ ਜਾਂਦੇ ਸਨ, ਪਰ ਕਲਿਯੁਗ ਦੇ ਆਉਣ ਨਾਲ ਬਾਕੀ ਵੇਦ ਲਿਖੇ ਗਏ। ਉਨ੍ਹਾਂ ਕਿਹਾ ਕਿ ਇਸ ਵਿੱਚ ਚਾਰ ਗੱਲਾਂ ਲਿਖੀਆਂ ਗਈਆਂ ਹਨ। ਪਹਿਲਾਂ ਧਰਮ ਕਿਵੇਂ ਕਰਨਾ ਹੈ, ਦੂਜਾ ਮੁਕਤੀ ਕਿਵੇਂ ਪ੍ਰਾਪਤ ਕਰਨੀ ਹੈ, ਤੀਜਾ ਸਾਨੂੰ ਕੇਵਲ ਉਹੀ ਕੰਮ ਕਰਨਾ ਚਾਹੀਦਾ ਹੈ, ਜਿਸ ਨਾਲ ਸੰਤੁਸ਼ਟੀ ਮਿਲਦੀ ਹੈ ਅਤੇ ਚੌਥਾ, ਸੰਤ ਤੇ ਬਸੰਤ ਦੋਵੇਂ ਇੱਕੋ ਜਿਹੇ ਆਉਂਦੇ ਹਨ। ਉਨ੍ਹਾਂ ਦੱਸਿਆ ਕਿ ਜਦੋਂ ਬਸੰਤ ਆਉਂਦੀ ਹੈ, ਤਾਂ ਕੁਦਰਤ ਸੁਧਰ ਜਾਂਦੀ ਹੈ ਅਤੇ ਜਦੋਂ ਸੰਤ ਆਉਂਦੇ ਹਨ, ਤਾਂ ਲੋਕ ਸੁਧਰ ਜਾਂਦੇ ਹਨ।
ਇਸ ਮੌਕੇ ਸਵਾਮੀ ਰਾਮ ਜੀ ਮਹਾਰਾਜ ਨੇ ਚੰਡੀਗੜ੍ਹ ਨੂੰ ਵਰਿੰਦਾਵਨ ਧਾਮ ਬਣਾਉਣ ਲਈ ਬੀ ਪਰਾਕ ਤੇ ਮੁਨੀਸ਼ ਬਜਾਜ ਦਾ ਧੰਨਵਾਦ ਕੀਤਾ। ਉਨ੍ਹਾਂ ਕਿਹਾ ਕਿ ਬੀ ਪਰਾਕ ਫਿਲਮੀ ਗੀਤ ਗਾਉਂਦਾ ਸੀ, ਪਰ ਹੁਣ ਉਸ ਦੀ ਦੁਨੀਆ ਬਦਲ ਗਈ ਹੈ, ਹੁਣ ਰਾਧਾ ਰਾਣੀ ਅਤੇ ਭਗਵਾਨ ਕ੍ਰਿਸ਼ਨ ਉਸ ਲਈ ਸਭ ਕੁਝ ਹਨ। ਉਨ੍ਹਾਂ ਕਿਹਾ ਕਿ ਬੀ ਪਰਾਕ ਨੇ ਬਾਲੀਵੁੱਡ 'ਚ ਵੀ ਰਾਧਾ ਰਾਧਾ ਕਰ ਦਿੱਤਾ ਹੈ।
ਇਸ ਮੌਕੇ ਗਾਇਕ ਬੀ ਪਰਾਕ ਨੇ ਦੱਸਿਆ ਕਿ ਇਸ ਭਾਗਵਤ ਕਥਾ ਵਿੱਚ ਦੇਸ਼ ਦੇ ਮਹਾਨ ਸੰਤ ਮਹਾਂਪੁਰਸ਼ ਪਹੁੰਚ ਰਹੇ ਹਨ। ਉਨ੍ਹਾਂ ਕਿਹਾ ਕਿ ਪ੍ਰੋਗਰਾਮ ਵਿੱਚ ਪੂਜਯ ਸਵਾਮੀ ਕੈਲਾਸ਼ ਨੰਦ ਗਿਰੀ ਜੀ ਮਹਾਰਾਜ ਮਹਾਮੰਡਲੇਸ਼ਵਰ ਨਿਰੰਜਨ ਅਖਾੜਾ ਪ੍ਰੀਸ਼ਦ, ਚਿੱਤਰਲੇਖਾ, ਧੀਰੇਂਦਰ ਕ੍ਰਿਸ਼ਨ ਸ਼ਾਸਤਰੀ (ਬਾਗੇਸ਼ਵਰ ਸਰਕਾਰ), ਮਨੋਜ ਮੋਹਨ ਸ਼ਾਸਤਰੀ ਜੀ, ਮੋਹਿਤ ਮੁਰਲੀ ਜੀ, ਗੁਰੂਦੇਵ ਭਗਵਾਨ ਜੀ ਅਤੇ ਅਨਿਰੁੱਧਚਾਰੀਆ ਸਮੇਤ ਪ੍ਰਸਿੱਧ ਧਾਰਮਿਕ ਗੁਰੂ ਪਹੁੰਚ ਰਹੇ ਹਨ।
ਗਾਇਕ ਬੀ ਪਰਾਕ ਨੇ ਸਾਰੇ ਸੰਤਾਂ ਨੂੰ ਪ੍ਰਣਾਮ ਕਰਦੇ ਹੋਏ ਕਿਹਾ ਕਿ ਮੈਂ ਬਹੁਤ ਭਾਗਾਂ ਵਾਲਾ ਹਾਂ ਜੋ ਮੈਨੂੰ ਇਸ ਪ੍ਰੋਗਰਾਮ ਦਾ ਆਯੋਜਨ ਕਰਨ ਅਤੇ ਮਹਾਨ ਸੰਤਾਂ ਅਤੇ ਮਹਾਤਮਾਵਾਂ ਦੀ ਸੇਵਾ ਕਰਨ ਦਾ ਮੌਕਾ ਮਿਲਿਆ ਹੈ।