ਕਲਿਆਣੀ (ਪੱਛਮੀ ਬੰਗਾਲ) : ਜੰਮੂ-ਕਸ਼ਮੀਰ ਦੀ ਕ੍ਰਿਕਟ ਟੀਮ ਨੇ ਰਣਜੀ ਟਰਾਫੀ ਦੇ ਇਤਿਹਾਸ ਵਿੱਚ ਇੱਕ ਨਵਾਂ ਅਧਿਆਏ ਲਿਖਦਿਆਂ ਪਹਿਲੀ ਵਾਰ ਫਾਈਨਲ ਵਿੱਚ ਜਗ੍ਹਾ ਬਣਾਈ ਹੈ। ਇੱਕ ਬੇਹੱਦ ਰੋਮਾਂਚਕ ਸੈਮੀਫਾਈਨਲ ਮੁਕਾਬਲੇ ਵਿੱਚ ਜੰਮੂ-ਕਸ਼ਮੀਰ ਨੇ ਮਜ਼ਬੂਤ ਮੰਨੀ ਜਾਣ ਵਾਲੀ ਬੰਗਾਲ ਦੀ ਟੀਮ ਨੂੰ 6 ਵਿਕਟਾਂ ਨਾਲ ਕਰਾਰੀ ਮਾਤ ਦਿੱਤੀ।
ਆਕਿਬ ਨਬੀ ਅਤੇ ਅਬਦੁਲ ਸਮਦ ਰਹੇ ਜਿੱਤ ਦੇ ਹੀਰੋ
ਇਸ ਇਤਿਹਾਸਕ ਜਿੱਤ ਵਿੱਚ ਆਕਿਬ ਨਬੀ ਅਤੇ ਅਬਦੁਲ ਸਮਦ ਨੇ ਸ਼ਾਨਦਾਰ ਪ੍ਰਦਰਸ਼ਨ ਕਰਦਿਆਂ ਆਪਣੀ ਟੀਮ ਨੂੰ ਫੈਸਲਾਕੁੰਨ ਜਿੱਤ ਦਿਵਾਈ। ਪਹਿਲੀ ਪਾਰੀ ਵਿੱਚ ਪਛੜਨ ਦੇ ਬਾਵਜੂਦ, ਜੰਮੂ-ਕਸ਼ਮੀਰ ਨੇ ਦੂਜੀ ਪਾਰੀ ਵਿੱਚ ਜ਼ੋਰਦਾਰ ਵਾਪਸੀ ਕੀਤੀ। ਜੰਮੂ-ਕਸ਼ਮੀਰ ਦੇ ਗੇਂਦਬਾਜ਼ਾਂ ਨੇ ਬੰਗਾਲ ਨੂੰ ਦੂਜੀ ਪਾਰੀ ਵਿੱਚ ਸਿਰਫ਼ 99 ਦੌੜਾਂ 'ਤੇ ਹੀ ਸਮੇਟ ਦਿੱਤਾ ਸੀ। ਜਿੱਤ ਲਈ ਮਿਲੇ 126 ਦੌੜਾਂ ਦੇ ਟੀਚੇ ਨੂੰ ਜੰਮੂ-ਕਸ਼ਮੀਰ ਦੇ ਬੱਲੇਬਾਜ਼ਾਂ ਨੇ 4 ਵਿਕਟਾਂ ਗੁਆ ਕੇ ਹਾਸਲ ਕਰ ਲਿਆ।
ਸ਼ੰਮੀ ਦਾ 8 ਵਿਕਟਾਂ ਦਾ ਰਿਕਾਰਡ ਵੀ ਨਾ ਆਇਆ ਕੰਮ
ਜ਼ਿਕਰਯੋਗ ਹੈ ਕਿ ਇਸ ਮੈਚ ਵਿੱਚ ਭਾਰਤੀ ਤੇਜ਼ ਗੇਂਦਬਾਜ਼ ਮੁਹੰਮਦ ਸ਼ੰਮੀ ਨੇ ਬੰਗਾਲ ਵੱਲੋਂ ਖੇਡਦਿਆਂ 8 ਵਿਕਟਾਂ ਲੈ ਕੇ ਆਪਣਾ ਸਰਵੋਤਮ ਪ੍ਰਦਰਸ਼ਨ ਕੀਤਾ ਸੀ। ਹਾਲਾਂਕਿ, ਸ਼ਮੀ ਦੀ ਇਸ ਘਾਤਕ ਗੇਂਦਬਾਜ਼ੀ ਅਤੇ ਬੰਗਾਲ ਦੀ ਪਹਿਲੀ ਪਾਰੀ ਦੀ 26 ਦੌੜਾਂ ਦੀ ਬੜ੍ਹਤ ਦੇ ਬਾਵਜੂਦ, ਟੀਮ ਦੂਜੀ ਪਾਰੀ ਵਿੱਚ ਬੱਲੇਬਾਜ਼ਾਂ ਦੇ ਨਿਰਾਸ਼ਾਜਨਕ ਪ੍ਰਦਰਸ਼ਨ ਕਾਰਨ ਮੈਚ ਹਾਰ ਗਈ। ਜੰਮੂ-ਕਸ਼ਮੀਰ ਦੀ ਇਸ ਜਿੱਤ ਨੇ ਪੂਰੇ ਸੂਬੇ ਵਿੱਚ ਖੁਸ਼ੀ ਦੀ ਲਹਿਰ ਦੌੜਾ ਦਿੱਤੀ ਹੈ ਕਿਉਂਕਿ ਟੀਮ ਨੇ ਪਹਿਲੀ ਵਾਰ ਇਸ ਵੱਕਾਰੀ ਟੂਰਨਾਮੈਂਟ ਦੇ ਖਿਤਾਬੀ ਮੁਕਾਬਲੇ ਵਿੱਚ ਪ੍ਰਵੇਸ਼ ਕੀਤਾ ਹੈ। ਮੈਚ 'ਚ ਸ਼ੰਮੀ ਦੋਵੇਂ ਪਾਰੀਆਂ 'ਚ ਕੁੱਲ 9 ਵਿਕਟਾਂ ਲਈਆਂ ਸਨ।