ਵਿਰਾਟ ਕੋਹਲੀ 'ਚ ਹੈ ਦੌੜਾਂ ਦੀ ਭੁੱਖ, ਹਰ ਮੈਚ ਤੋਂ ਬਾਅਦ ਮੁਲਾਂਕਣ ਕਰਨਾ ਸਹੀ ਨਹੀਂ : ਗੌਤਮ ਗੰਭੀਰ

ਭਾਰਤ ਦੇ ਮੁੱਖ ਕੋਚ ਗੌਤਮ ਗੰਭੀਰ ਹਾਲ ਹੀ ਦੇ ਸਮੇਂ 'ਚ ਵਿਰਾਟ ਕੋਹਲੀ ਦੀ ਖਰਾਬ ਫਾਰਮ ਤੋਂ ਚਿੰਤਤ ਨਹੀਂ ਹਨ ਅਤੇ ਉਨ੍ਹਾਂ ਨੇ ਕਿਹਾ ਹੈ ਕਿ ਸਟਾਰ ਬੱਲੇਬਾਜ਼ ਨੂੰ ਦੌੜਾਂ ਦੀ ਓਨੀ ਹੀ ਭੁੱਖ ਹੈ ਜਿੰਨੀ ਕਿ ਉਨ੍ਹਾਂ ਨੂੰ ਆਪਣੇ ਡੈਬਿਊ ਦੇ ਸਮੇਂ ਸੀ। ਇਸ ਲਈ ਹਰ ਮੈਚ ਤੋਂ ਬਾਅਦ ਅੰਦਾਜ਼ਾ ਲਗਾਉਣਾ ਸਹੀ ਨਹੀਂ ਹੈ।

ਕੋਹਲੀ ਨੇ ਪਿਛਲੀਆਂ ਅੱਠ ਪਾਰੀਆਂ ਵਿਚ ਸਿਰਫ਼ ਇਕ ਅਰਧ ਸੈਂਕੜਾ (2023 ਵਿਚ ਸੈਂਚੁਰੀਅਨ ਵਿਚ ਦੱਖਣੀ ਅਫ਼ਰੀਕਾ ਖ਼ਿਲਾਫ਼ 76) ਬਣਾਇਆ ਹੈ। ਨਿਊਜ਼ੀਲੈਂਡ ਖਿਲਾਫ ਬੁੱਧਵਾਰ ਤੋਂ ਸ਼ੁਰੂ ਹੋ ਰਹੀ ਤਿੰਨ ਮੈਚਾਂ ਦੀ ਟੈਸਟ ਸੀਰੀਜ਼ ਤੋਂ ਪਹਿਲਾਂ ਉਸ ਲਈ ਫਾਰਮ 'ਚ ਵਾਪਸੀ ਕਰਨਾ ਮਹੱਤਵਪੂਰਨ ਹੈ ਕਿਉਂਕਿ ਇਸ ਤੋਂ ਬਾਅਦ ਭਾਰਤੀ ਟੀਮ ਨੂੰ ਪੰਜ ਟੈਸਟ ਮੈਚਾਂ ਦੇ ਦੌਰੇ ਲਈ ਆਸਟ੍ਰੇਲੀਆ ਜਾਣਾ ਹੈ।

ਗੰਭੀਰ ਨੇ ਇੱਥੇ ਪੱਤਰਕਾਰਾਂ ਨੂੰ ਕਿਹਾ, ''ਵਿਰਾਟ ਨੂੰ ਲੈ ਕੇ ਮੇਰਾ ਨਜ਼ਰੀਆ ਬਹੁਤ ਸਪੱਸ਼ਟ ਹੈ ਕਿ ਉਹ ਵਿਸ਼ਵ ਪੱਧਰੀ ਕ੍ਰਿਕਟਰ ਹੈ। ਉਸ ਨੇ ਇੰਨੇ ਸਾਲਾਂ ਤੋਂ ਵਧੀਆ ਪ੍ਰਦਰਸ਼ਨ ਕੀਤਾ ਹੈ। ਉਸ ਦੀ ਦੌੜਾਂ ਦੀ ਭੁੱਖ ਉਹੀ ਹੈ, ਜਿੰਨੀ ਉਸ ਦੇ ਡੈਬਿਊ ਦੇ ਸਮੇਂ ਸੀ। ਉਨ੍ਹਾਂ ਕਿਹਾ, ''ਇਹ ਭੁੱਖ ਉਸ ਨੂੰ ਵਿਸ਼ਵ ਪੱਧਰੀ ਕ੍ਰਿਕਟਰ ਬਣਾਉਂਦੀ ਹੈ। ਮੈਨੂੰ ਯਕੀਨ ਹੈ ਕਿ ਉਹ ਇਸ ਸੀਰੀਜ਼ ਅਤੇ ਆਸਟ੍ਰੇਲੀਆ ਵਿਚ ਵੀ ਦੌੜਾਂ ਬਣਾਵੇਗਾ।''

ਗੰਭੀਰ ਨੇ ਕਿਹਾ ਕਿ ਕਿਸੇ ਖਿਡਾਰੀ ਦਾ ਨਿਰਣਾ ਇਕ ਖਰਾਬ ਮੈਚ ਜਾਂ ਸੀਰੀਜ਼ ਦੇ ਆਧਾਰ 'ਤੇ ਨਹੀਂ ਹੋਣਾ ਚਾਹੀਦਾ। ਉਨ੍ਹਾਂ ਕਿਹਾ, ''ਹਰ ਮੈਚ ਤੋਂ ਬਾਅਦ ਮੁਲਾਂਕਣ ਸਹੀ ਨਹੀਂ ਹੁੰਦਾ। ਜੇਕਰ ਤੁਸੀਂ ਹਰ ਮੈਚ ਤੋਂ ਬਾਅਦ ਅਜਿਹਾ ਕਰਨਾ ਸ਼ੁਰੂ ਕਰ ਦਿੰਦੇ ਹੋ ਤਾਂ ਇਹ ਉਨ੍ਹਾਂ ਲਈ ਠੀਕ ਨਹੀਂ ਹੋਵੇਗਾ। ਇਹ ਇਕ ਖੇਡ ਹੈ ਅਤੇ ਅਸਫਲਤਾ ਅਟੱਲ ਹੈ। ਜੇਕਰ ਸਾਨੂੰ ਅਨੁਕੂਲ ਨਤੀਜੇ ਮਿਲ ਰਹੇ ਹਨ ਤਾਂ ਚਿੰਤਾ ਦੀ ਕੋਈ ਗੱਲ ਨਹੀਂ ਹੈ।''

ਉਨ੍ਹਾਂ ਕਿਹਾ, ''ਕੋਈ ਵੀ ਹਰ ਰੋਜ਼ ਆਪਣਾ ਸਰਬੋਤਮ ਪ੍ਰਦਰਸ਼ਨ ਨਹੀਂ ਕਰ ਸਕਦਾ। ਸਾਡਾ ਕੰਮ ਖਿਡਾਰੀਆਂ ਦਾ ਸਮਰਥਨ ਕਰਨਾ ਹੈ। ਮੇਰਾ ਕੰਮ ਸਭ ਤੋਂ ਵਧੀਆ 11 ਨੂੰ ਚੁਣਨਾ ਹੈ, ਕਿਸੇ ਨੂੰ ਬਾਹਰ ਕੱਢਣਾ ਨਹੀਂ। ਸਾਨੂੰ ਲਗਾਤਾਰ ਅੱਠ ਟੈਸਟ ਖੇਡਣੇ ਹਨ ਅਤੇ ਸਾਰਿਆਂ ਦੀਆਂ ਨਜ਼ਰਾਂ ਚੰਗੇ ਪ੍ਰਦਰਸ਼ਨ 'ਤੇ ਹਨ।''