ਬੈਂਗਲੁਰੂ : ਭਾਰਤੀ ਕ੍ਰਿਕਟ ਟੀਮ ਦੇ ਸਾਬਕਾ ਮੁੱਖ ਕੋਚ ਰਾਹੁਲ ਦ੍ਰਾਵਿੜ ਨੇ ਕਪਤਾਨ ਰੋਹਿਤ ਸ਼ਰਮਾ ਦੀ ਜੰਮ ਕੇ ਤਾਰੀਫ਼ ਕਰਦਿਆਂ ਕਿਹਾ ਹੈ ਕਿ ਰੋਹਿਤ ਦੇ ਬਦਲਾਅ ਪ੍ਰਤੀ ਖੁੱਲ੍ਹੇ ਨਜ਼ਰੀਏ ਨੇ ਕੋਚ ਵਜੋਂ ਉਨ੍ਹਾਂ ਦੇ ਕੰਮ ਨੂੰ ਬਹੁਤ ਆਸਾਨ ਬਣਾ ਦਿੱਤਾ ਸੀ। ਦ੍ਰਾਵਿੜ, ਜਿਨ੍ਹਾਂ ਨੇ ਰੋਹਿਤ ਦੀ ਕਪਤਾਨੀ ਹੇਠ ਭਾਰਤ ਨੂੰ 2024 ਟੀ-20 ਵਿਸ਼ਵ ਕੱਪ ਜਿਤਾਉਣ ਵਿੱਚ ਅਹਿਮ ਭੂਮਿਕਾ ਨਿਭਾਈ, ਨੇ ਦੱਸਿਆ ਕਿ ਰੋਹਿਤ ਦੀ ਆਪਣੇ ਸਾਥੀਆਂ ਨਾਲ ਮਜ਼ਬੂਤ ਸਾਂਝ ਸੀ, ਜਿਸ ਕਾਰਨ ਸੁਧਾਰ ਸਬੰਧੀ ਵਿਚਾਰ ਸਾਂਝੇ ਕਰਨਾ ਅਤੇ ਸੰਦੇਸ਼ ਪੂਰੀ ਟੀਮ ਤੱਕ ਪਹੁੰਚਾਉਣਾ ਬੇਹੱਦ ਸਰਲ ਹੋ ਗਿਆ ਸੀ।
ਦ੍ਰਾਵਿੜ ਨੇ ਕਰਨਾਟਕ ਰਾਜ ਕ੍ਰਿਕਟ ਸੰਘ ਦੇ ਇੱਕ ਪ੍ਰੋਗਰਾਮ ਦੌਰਾਨ ਖੁਲਾਸਾ ਕੀਤਾ ਕਿ ਰੋਹਿਤ ਨੇ ਬਹੁਤ ਜਲਦੀ ਇਹ ਪਛਾਣ ਲਿਆ ਸੀ ਕਿ ਪਿਛਲੇ 10 ਸਾਲਾਂ ਵਿੱਚ ਚਿੱਟੀ ਗੇਂਦ (ਵਾਈਟ ਬਾਲ) ਦੀ ਕ੍ਰਿਕਟ ਬਦਲ ਗਈ ਹੈ। ਉਨ੍ਹਾਂ ਮਹਿਸੂਸ ਕੀਤਾ ਕਿ ਭਾਰਤੀ ਟੀਮ ਬੱਲੇਬਾਜ਼ੀ ਦੇ ਆਧੁਨਿਕ ਤਰੀਕਿਆਂ ਵਿੱਚ ਥੋੜ੍ਹੀ ਪਿੱਛੇ ਰਹਿ ਗਈ ਸੀ ਅਤੇ ਉਨ੍ਹਾਂ ਨੂੰ ਹੋਰ ਜੋਖਮ ਉਠਾਉਣ ਦੀ ਲੋੜ ਸੀ। ਰੋਹਿਤ ਨੇ ਖੁਦ ਅੱਗੇ ਹੋ ਕੇ ਇਸ ਦੀ ਜ਼ਿੰਮੇਵਾਰੀ ਲਈ ਅਤੇ ਆਪਣੀ ਬੱਲੇਬਾਜ਼ੀ ਸ਼ੈਲੀ ਨੂੰ ਆਧੁਨਿਕ ਖੇਡ ਮੁਤਾਬਕ ਢਾਲਿਆ, ਭਾਵੇਂ ਇਸ ਲਈ ਉਨ੍ਹਾਂ ਨੂੰ ਆਪਣੀਆਂ ਨਿੱਜੀ ਦੌੜਾਂ ਦੀ ਕੁਰਬਾਨੀ ਹੀ ਕਿਉਂ ਨਾ ਦੇਣੀ ਪਈ ਹੋਵੇ।
ਦ੍ਰਾਵਿੜ ਅਨੁਸਾਰ, ਕੋਚਿੰਗ ਇੱਕ ਲਗਾਤਾਰ ਬਦਲਣ ਵਾਲੀ ਪ੍ਰਕਿਰਿਆ ਹੈ ਅਤੇ ਇੱਕ ਕੋਚ ਨੂੰ ਕਦੇ ਵੀ ਉਸੇ ਤਰ੍ਹਾਂ ਸਿਖਲਾਈ ਨਹੀਂ ਦੇਣੀ ਚਾਹੀਦੀ ਜਿਸ ਤਰ੍ਹਾਂ ਉਸ ਨੇ ਖੁਦ ਸਿੱਖਿਆ ਸੀ। ਉਨ੍ਹਾਂ ਨੇ ਆਪਣੇ ਕੋਚ ਕੇਕੀ ਤਾਰਾਪੋਰ ਨੂੰ ਯਾਦ ਕਰਦਿਆਂ ਦੱਸਿਆ ਕਿ ਪਹਿਲਾਂ ਗੇਂਦ ਹਵਾ ਵਿੱਚ ਮਾਰਨ 'ਤੇ ਸਜ਼ਾ ਮਿਲਦੀ ਸੀ, ਪਰ ਅੱਜ ਦੇ ਦੌਰ ਵਿੱਚ ਅਜਿਹੀ ਕੋਚਿੰਗ ਕੰਮ ਨਹੀਂ ਕਰ ਸਕਦੀ। ਉਨ੍ਹਾਂ ਕਿਹਾ ਕਿ ਰੋਹਿਤ ਨੇ ਆਪਣੀ 2019 ਵਿਸ਼ਵ ਕੱਪ ਵਾਲੀ ਸ਼ਾਨਦਾਰ ਲੈਅ (5 ਸੈਂਕੜੇ) ਨੂੰ ਵੀ ਟੀਮ ਦੀ ਲੋੜ ਅਨੁਸਾਰ ਬਦਲਣ ਦੀ ਹਿੰਮਤ ਦਿਖਾਈ, ਜੋ ਕਿ ਇੱਕ ਮਹਾਨ ਲੀਡਰ ਦੀ ਨਿਸ਼ਾਨੀ ਹੈ।