ਸੁਨਾਮ (ਰਮੇਸ਼ ਗਰਗ) : ਸ਼੍ਰੀ ਸ਼ਿਵ ਰਾਮਲੀਲਾ ਕਲੱਬ ਗੀਤਾ ਭਵਨ ਵਿਚ ਮੰਗਲਵਾਰ ਨੂੰ ਆਯੋਜਿਤ ਰਾਮਲੀਲਾ ਮਹੋਤਸਵ ਦਾ ਉਦਘਾਟਨ ਰੋਟਰੀ ਕਲੱਬ ਸੁਨਾਮ ਗ੍ਰੀਨ ਦੇ ਪ੍ਰਧਾਨ ਗੌਰਵ ਕਾਂਸਲ ਨੇ ਕੀਤਾ। ਇਸ ਮੌਕੇ ਉਨ੍ਹਾਂ ਦੇ ਨਾਲ ਆਈ.ਪੀ.ਪੀ. ਸੰਦੀਪ ਗਰਗ, ਗੋਰਾ ਲਾਲ ਬਾਂਸਲ, ਟਿੰਕਲ ਬਾਂਸਲ ਸਮੇਤ ਕਲੱਬ ਦੇ ਹੋਰ ਮੈਂਬਰ ਵੀ ਹਾਜ਼ਰ ਸਨ।
ਮੁੱਖ ਮਹਿਮਾਨ ਵਜੋਂ ਆਪਣੇ ਸੰਬੋਧਨ ਦੌਰਾਨ ਗੌਰਵ ਕਾਂਸਲ ਨੇ ਕਿਹਾ ਕਿ ਰਾਮਾਇਣ ਸਿਰਫ਼ ਇਕ ਕਥਾ ਨਹੀਂ, ਸਗੋਂ ਜੀਵਨ ਦਾ ਮਾਰਗਦਰਸ਼ਨ ਹੈ। ਉਨ੍ਹਾਂ ਨੇ ਕਿਹਾ – “ਸ਼੍ਰੀਰਾਮ ਸਾਨੂੰ ਸੱਚ, ਧਰਮ, ਫਰਜ਼ ਅਤੇ ਆਦਰਸ਼ ਜੀਵਨ ਜੀਊਣ ਦੀ ਪ੍ਰੇਰਣਾ ਦਿੰਦੇ ਹਨ। ਉਨ੍ਹਾਂ ਦੀਆਂ ਲੀਲਾਵਾਂ ਦਾ ਮੰਚਨ ਸਾਨੂੰ ਵਾਰੰਵਾਰ ਯਾਦ ਦਵਾਉਂਦਾ ਹੈ ਕਿ ਝੂਠ ‘ਤੇ ਸੱਚ ਦੀ, ਅਧਰਮ ‘ਤੇ ਧਰਮ ਦੀ ਅਤੇ ਅਹੰਕਾਰ ‘ਤੇ ਨਿਮਰਤਾ ਦੀ ਜਿੱਤ ਹੁੰਦੀ ਹੈ।”
ਉਨ੍ਹਾਂ ਨੇ ਨਗਰਵਾਸੀਆਂ ਨੂੰ ਅਪੀਲ ਕੀਤੀ ਕਿ ਰਾਮਲੀਲਾ ਦੇ ਮੰਚ ਤੋਂ ਅਸੀਂ ਸਭ ਇਹ ਸੰਕਲਪ ਲਈਏ ਕਿ ਸ਼੍ਰੀਰਾਮ ਦੇ ਆਦਰਸ਼ਾਂ ਨੂੰ ਆਪਣੇ ਜੀਵਨ ਵਿੱਚ ਅਪਣਾਵਾਂਗੇ। ਗੌਰਵ ਕਾਂਸਲ ਨੇ ਵਿਸ਼ਵਾਸ ਜਤਾਇਆ ਕਿ ਇਹ ਰਾਮਲੀਲਾ ਆਉਣ ਵਾਲੀਆਂ ਪੀੜ੍ਹੀਆਂ ਨੂੰ ਵੀ ਸਦਾਚਾਰ ਤੇ ਸੱਭਿਆਚਾਰ ਨਾਲ ਜੋੜਦੀ ਰਹੇਗੀ।
ਕਾਰਜਕ੍ਰਮ ਦੌਰਾਨ ਰੋਟਰੀ ਕਲੱਬ ਸੁਨਾਮ ਗ੍ਰੀਨ ਦੀ ਟੀਮ ਨੂੰ ਰਾਮਲੀਲਾ ਪ੍ਰਬੰਧਕ ਕਮੇਟੀ ਵੱਲੋਂ ਸ਼੍ਰੀ ਸੁਰੇਸ਼ ਗੋਇਲ ਸ਼ਸ਼ੀ, ਜਗਦੀਸ਼ ,ਬਲਜੀਤ ਸਿੰਘ,ਰਾਕੇਸ਼ ਕੁਮਾਰ ਕਾਕਾ,ਗਗਨ ਗੋਇਲ,ਮੁਕੇਸ਼ ਕੁਮਾਰ ਮੰਗੁ ,ਮਨੋਜ ਭਾਟੀਆ ਤੇ ਰਾਮਲੀਲਾ ਕਲੱਬ ਦੇ ਹੋਰ ਮੈਂਬਰਾਂ ਨੇ ਸਨਮਾਨਿਤ ਕੀਤਾ।