ਨਵੀਂ ਦਿੱਲੀ : ਕਰੰਸੀ ਮਾਰਕੀਟ ’ਚ ਰੁਪਏ ਦਾ ਦਬਦਬਾ ਲਗਾਤਾਰ ਦੂਜੇ ਦਿਨ ਵੀ ਦੇਖਣ ਨੂੰ ਮਿਲ ਰਿਹਾ ਹੈ। ਖਾਸ ਗੱਲ ਤਾਂ ਇਹ ਹੈ ਕਿ 2 ਦਿਨਾਂ ’ਚ ਰੁਪਏ ’ਚ ਡਾਲਰ ਦੇ ਮੁਕਾਬਲੇ 113 ਪੈਸੇ ਯਾਨੀ 1.13 ਰੁਪਏ ਦੀ ਤੇਜ਼ੀ ਦੇਖਣ ਨੂੰ ਮਿਲ ਚੁੱਕੀ ਹੈ।
ਜਾਣਕਾਰਾਂ ਦੀਆਂ ਮੰਨੀਏ ਤਾਂ ਆਰ. ਬੀ. ਆਈ. ਦੀ ਦਖਲ ਅਤੇ ਵਿਦੇਸ਼ੀ ਨਿਵੇਸ਼ਕਾਂ ਦਾ ਨਿਵੇਸ਼ ਸ਼ੁਰੂ ਹੋਣ ਨਾਲ ਰੁਪਏ ਨੂੰ ਸਪੋਰਟ ਮਿਲ ਰਿਹਾ ਹੈ। ਬਾਕੀ ਕਸਰ ਫੈਡ ਅਤੇ ਆਰ. ਬੀ. ਆਈ. ਦੀਆਂ ਉਹ ਸੰਭਾਵਨਾਵਾਂ ਪੂਰੀ ਕਰ ਰਹੀਆਂ ਹਨ ਕਿ ਜਿਨ੍ਹਾਂ ’ਚ ਕਿਹਾ ਜਾ ਰਿਹਾ ਹੈ ਕਿ ਆਉਣ ਵਾਲੇ ਦਿਨਾਂ ’ਚ ਵਿਆਜ ਦਰਾਂ ’ਚ ਕਟੌਤੀ ਦੇਖਣ ਨੂੰ ਮਿਲ ਸਕਦੀ ਹੈ। ਸ਼ੇਅਰ ਬਾਜ਼ਾਰ ’ਚ ਤੇਜ਼ੀ ਅਤੇ ਕੱਚੇ ਤੇਲ ਦੀਆਂ ਕੀਮਤਾਂ ਦਾ ਘੱਟ ਹੋਣਾ ਇਹ ਤਮਾਮ ਗੱਲਾਂ ਰੁਪਏ ਨੂੰ ਸਪੋਰਟ ਕਰ ਰਹੀਆਂ ਹਨ। ਅੰਦਾਜ਼ਾ ਲਾਇਆ ਜਾ ਰਿਹਾ ਹੈ ਕਿ ਆਉਣ ਵਾਲੇ ਦਿਨਾਂ ’ਚ ਰੁਪਿਆ 87 ਡਾਲਰ ਤੋਂ ਉੱਭਰ ਕੇ 86 ਦੇ ਲੈਵਲ ’ਤੇ ਆ ਸਕਦਾ ਹੈ।
ਰੁਪਏ ’ਚ ਦੂਜੇ ਦਿਨ ਬੰਪਰ ਤੇਜ਼ੀ
ਵੀਰਵਾਰ ਨੂੰ ਸ਼ੁਰੂਆਤੀ ਕਾਰੋਬਾਰ ’ਚ ਰੁਪਿਆ ਅਮਰੀਕੀ ਡਾਲਰ ਦੇ ਮੁਕਾਬਲੇ 40 ਪੈਸੇ ਵਧ ਕੇ 87.68 ’ਤੇ ਪਹੁੰਚ ਗਿਆ, ਜਿਸ ਦੀ ਮੁੱਖ ਵਜ੍ਹਾ ਕੇਂਦਰੀ ਬੈਂਕ ਦਾ ਦਖਲ ਅਤੇ ਡਾਲਰ ਇੰਡੈਕਸ ’ਚ ਨਰਮੀ ਰਹੀ।
ਵਿਦੇਸ਼ੀ ਮੁਦਰਾ ਕਾਰੋਬਾਰੀਆਂ ਨੇ ਕਿਹਾ ਕਿ ਸਾਕਾਰਾਤਮਕ ਘਰੇਲੂ ਸ਼ੇਅਰ ਬਾਜ਼ਾਰ, ਕੱਚੇ ਤੇਲ ਦੀਆਂ ਘੱਟ ਕੀਮਤਾਂ ਅਤੇ ਵਿਦੇਸ਼ੀ ਪੂੰਜੀ ਪ੍ਰਵਾਹ ’ਚ ਨਵੇਂ ਸਿਰੇ ਤੋਂ ਵਾਧਾ ਵਰਗੇ ਹੋਰ ਸਹਾਇਕ ਕਾਰਕਾਂ ਨੇ ਵੀ ਨਿਵੇਸ਼ਕਾਂ ਦੀ ਧਾਰਨਾ ਨੂੰ ਉਤਸ਼ਾਹ ਦਿੱਤਾ। ਇੰਟਰਬੈਂਕ ਫਾਰੇਨ ਕਰੰਸੀ ਐਕਸਚੇਂਜ ਮਾਰਕੀਟ ’ਚ ਰੁਪਿਆ 87.76 ’ਤੇ ਖੁੱਲ੍ਹਿਆ ਅਤੇ ਫਿਰ ਵਾਧੇ ਨਾਲ 87.68 ਦੇ ਸ਼ੁਰੂਆਤੀ ਹਾਈ ਲੈਵਲ ਨੂੰ ਛੂਹ ਗਿਆ, ਜੋ ਪਿਛਲੇ ਬੰਦ ਭਾਅ ਤੋਂ 40 ਪੈਸੇ ਦਾ ਵਾਧਾ ਦਰਸਾਉਂਦਾ ਹੈ।