ਮੁੰਬਈ : ਮਸ਼ਹੂਰ ਬਾਲੀਵੁੱਡ ਅਤੇ ਵੈੱਬ ਸੀਰੀਜ਼ ਅਦਾਕਾਰਾ ਐਲਨਾਜ਼ ਨੋਰੋਜ਼ੀ ਹਾਲ ਹੀ ਵਿੱਚ ਇੱਕ ਹੈਰਾਨ ਕਰਨ ਵਾਲੀ ਘਟਨਾ ਦਾ ਸ਼ਿਕਾਰ ਹੋਈ ਹੈ। ਉਸਨੇ ਖੁਲਾਸਾ ਕੀਤਾ ਕਿ ਇੱਕ ਅਣਜਾਣ ਵਿਅਕਤੀ ਨੇ ਉਸਨੂੰ 18 ਜਨਵਰੀ ਨੂੰ ਇੱਕ ਈਮੇਲ ਭੇਜੀ, ਜਿਸ ਵਿੱਚ ਉਸਦੀਆਂ ਨਿੱਜੀ ਫੋਟੋਆਂ ਲੀਕ ਕਰਨ ਦੀ ਧਮਕੀ ਦਿੱਤੀ ਗਈ। ਇਸ ਘਟਨਾ ਨੇ ਉਸਨੂੰ ਬਹੁਤ ਚਿੰਤਾ ਵਿਚ ਪਾ ਦਿੱਤਾ ਹੈ।
ਮੀਡੀਆ ਨਾਲ ਇੱਕ ਹਾਲੀਆ ਇੰਟਰਵਿਊ ਵਿੱਚ ਐਲਨਾਜ਼ ਨੋਰੋਜ਼ੀ ਨੇ ਦੱਸਿਆ ਕਿ ਉਸਨੂੰ ਇੱਕ ਈਮੇਲ ਮਿਲੀ, ਜਦੋਂ ਮੈਂ ਇਹ ਈਮੇਲ ਖੋਲ੍ਹੀ, ਤਾਂ ਇਸ ਵਿੱਚ ਮੇਰੀਆਂ ਕੁਝ ਨਿੱਜੀ ਫੋਟੋਆਂ ਅਤੇ ਇੱਕ ਸੁਨੇਹਾ ਸੀ ਕਿ 'ਮੇਰੇ ਕੋਲ ਤੁਹਾਡੀਆਂ ਇਹ ਫੋਟੋਆਂ ਹਨ। ਜੇਕਰ ਤੁਸੀਂ ਨਹੀਂ ਚਾਹੁੰਦੇ ਕਿ ਇਹਨਾਂ ਨੂੰ ਔਨਲਾਈਨ ਪੋਸਟ ਕੀਤਾ ਜਾਵੇ, ਤਾਂ ਤੁਰੰਤ ਜਵਾਬ ਦਿਓ। ਜੇਕਰ ਕੋਈ ਜਵਾਬ ਨਹੀਂ ਆਉਂਦਾ, ਤਾਂ ਅਗਲੀ ਈਮੇਲ ਇਹਨਾਂ ਫੋਟੋਆਂ ਨਾਲ ਔਨਲਾਈਨ ਲਿੰਕ ਹੋਵੇਗਾ।"
ਸਾਈਬਰ ਸੈੱਲ 'ਚ ਦਰਜ ਕਰਵਾਈ ਸ਼ਿਕਾਇਤ
ਇਸ ਧਮਕੀ ਭਰੀ ਮੇਲ ਨੂੰ ਪੜ੍ਹਨ ਤੋਂ ਬਾਅਦ, ਐਲਨਾਜ਼ ਨੌਰੋਜ਼ੀ ਨੇ ਤੁਰੰਤ ਸਾਈਬਰ ਸੈੱਲ ਕੋਲ ਸ਼ਿਕਾਇਤ ਦਰਜ ਕਰਵਾਈ। ਇਸ ਤੋਂ ਬਾਅਦ ਜਦੋਂ ਪੁਲਸ ਨੇ ਜਾਂਚ ਸ਼ੁਰੂ ਕੀਤੀ ਤਾਂ ਪਤਾ ਲੱਗਾ ਕਿ ਇਹ ਮੇਲ ਸਵਿਟਜ਼ਰਲੈਂਡ ਦੇ ਇੱਕ ਸਰਵਰ ਤੋਂ ਭੇਜਿਆ ਗਿਆ ਸੀ। ਹਾਲਾਂਕਿ, ਇਹ ਮੇਲ ਭੇਜਣ ਵਾਲੇ ਵਿਅਕਤੀ ਦੀ ਸਹੀ ਪਛਾਣ ਅਜੇ ਤੱਕ ਪਤਾ ਨਹੀਂ ਲੱਗ ਸਕੀ ਹੈ। ਅਦਾਕਾਰਾ ਨੇ ਖੁਲਾਸਾ ਕੀਤਾ ਕਿ ਇਸ ਘਟਨਾ ਤੋਂ ਬਾਅਦ ਉਹ ਬਹੁਤ ਡਰ ਗਈ ਹੈ। ਉਸਨੇ ਕਿਹਾ ਕਿ ਉਸਨੂੰ ਲਗਾਤਾਰ ਡਰ ਰਹਿੰਦਾ ਹੈ ਕਿ ਕਿਤੇ ਉਸਦੀਆਂ ਤਸਵੀਰਾਂ ਪਹਿਲਾਂ ਹੀ ਔਨਲਾਈਨ ਪੋਸਟ ਤਾਂ ਨਹੀਂ ਕਰ ਦਿੱਤੀਆਂ ਗਈਆਂ।
ਐਲਨਾਜ਼ ਨੋਰੋਜ਼ੀ ਦਾ ਕਰੀਅਰ ਅਤੇ ਪਛਾਣ
ਤੁਹਾਨੂੰ ਦੱਸ ਦੇਈਏ ਕਿ ਐਲਨਾਜ਼ ਨੋਰੋਜ਼ੀ ਇੱਕ ਈਰਾਨੀ ਮਾਡਲ ਅਤੇ ਅਦਾਕਾਰਾ ਹੈ, ਜਿਸਨੇ ਬਾਲੀਵੁੱਡ ਅਤੇ ਵੈੱਬ ਸੀਰੀਜ਼ ਵਿੱਚ ਆਪਣੀ ਪਛਾਣ ਬਣਾਈ ਹੈ। ਉਸਨੇ 'ਨਮਸਤੇ ਇੰਗਲੈਂਡ' ਅਤੇ ਨੈੱਟਫਲਿਕਸ ਦੀ ਮਸ਼ਹੂਰ ਵੈੱਬ ਸੀਰੀਜ਼ 'ਸੈਕਰਡ ਗੇਮਜ਼' ਵਿੱਚ ਵੀ ਮਹੱਤਵਪੂਰਨ ਭੂਮਿਕਾਵਾਂ ਨਿਭਾਈਆਂ ਹਨ।