ਹੈਦਰਾਬਾਦ (ਏਜੰਸੀ)- ਤੇਲੰਗਾਨਾ ਦੀ ਰਾਜਧਾਨੀ ਵਿੱਚ ਆਯੋਜਿਤ 72ਵੇਂ 'ਮਿਸ ਵਰਲਡ ਮੁਕਾਬਲੇ-2025' ਵਿੱਚ ਭਾਰਤੀ ਸੁੰਦਰੀ ਨੰਦਿਨੀ ਗੁਪਤਾ ਦੇ ਤਾਜ ਜਿੱਤਣ ਦੀਆਂ ਉਮੀਦਾਂ ਵਧ ਗਈਆਂ ਹਨ, ਕਿਉਂਕਿ ਉਨ੍ਹਾਂ ਟੌਪ-40 ਵਿੱਚ ਜਗ੍ਹਾ ਬਣਾ ਲਈ ਹੈ। ਜੇਕਰ ਗੁਪਤਾ ਇਹ ਖਿਤਾਬ ਜਿੱਤਦੀ ਹੈ, ਤਾਂ ਉਹ ਇਹ ਤਾਜ ਜਿੱਤਣ ਵਾਲੀ ਭਾਰਤ ਦੀ 7ਵੀਂ ਸੁੰਦਰੀ ਹੋਵੇਗੀ। ਮਾਨੁਸ਼ੀ ਛਿੱਲਰ ਨੇ ਆਖਰੀ ਵਾਰ 2017 ਵਿੱਚ ਇਹ ਖਿਤਾਬ ਜਿੱਤਿਆ ਸੀ। ਗੁਪਤਾ ਨੇ 24 ਮਈ ਨੂੰ ਮਿਸ ਵਰਲਡ ਟੌਪ ਮਾਡਲ ਸਬ-ਕੰਟੇਸਟ ਜਿੱਤ ਕੇ ਟੌਪ-40 ਵਿੱਚ ਆਪਣਾ ਸਥਾਨ ਸੁਰੱਖਿਅਤ ਕੀਤਾ। ਗੁਪਤਾ ਨੇ ਇੱਕ ਇੰਟਰਵਿਊ ਵਿੱਚ ਕਿਹਾ ਸੀ ਕਿ ਉਨ੍ਹਾਂ ਨੂੰ ਇਸ ਸੁੰਦਰਤਾ ਮੁਕਾਬਲੇ ਬਾਰੇ ਉਦੋਂ ਪਤਾ ਲੱਗਾ ਜਦੋਂ ਉਨ੍ਹਾਂ ਨੇ ਫਿਲਮ 'ਦੇਵਦਾਸ' ਦੇਖੀ ਅਤੇ ਐਸ਼ਵਰਿਆ ਰਾਏ ਬਾਰੇ ਜਾਣਨਾ ਸ਼ੁਰੂ ਕੀਤਾ। ਗੁਪਤਾ ਨੇ 'ਮਿਸ ਇੰਡੀਆ' ਦਾ ਖਿਤਾਬ ਜਿੱਤਣ ਤੋਂ ਬਾਅਦ ਦੱਸਿਆ ਸੀ, "ਮੇਰੀ ਮਾਂ ਡੀਵੀਡੀ 'ਤੇ 'ਦੇਵਦਾਸ' ਦੇਖ ਰਹੀ ਸੀ, ਮੈਂ ਐਸ਼ਵਰਿਆ ਦੀ ਸੁੰਦਰਤਾ ਤੋਂ ਮੋਹਿਤ ਹੋ ਗਈ ਸੀ ਅਤੇ ਮੈਂ ਆਪਣੀ ਮਾਂ ਨੂੰ ਪੁੱਛਿਆ, 'ਇਹ ਕੌਣ ਹੈ?' ਉਨ੍ਹਾਂ ਨੇ ਕਿਹਾ, 'ਇਹ ਮਿਸ ਵਰਲਡ ਹੈ।'
ਇੱਥੇ ਦੱਸ ਦੇਈਏ ਕਿ ਗੁਪਤਾ ਲਈ ਅੱਗੇ ਦਾ ਰਸਤਾ ਆਸਾਨ ਨਹੀਂ ਹੋਵੇਗਾ, ਕਿਉਂਕਿ ਉਨ੍ਹਾਂ ਦਾ ਮੁਕਾਬਲਾ ਥਾਈਲੈਂਡ ਦੀ ਸੁੰਦਰੀ ਸੁਚਾਤ ਚੁਆਂਗਸ਼੍ਰੀ ਵਰਗੀਆਂ ਸੁੰਦਰੀਆਂ ਨਾਲ ਹੈ। ਥਾਈਲੈਂਡ ਦੀ ਸੁਚਾਤ ਚੁਆਂਗਸਰੀ ਵੀ ਉਨ੍ਹਾਂ ਸੁੰਦਰੀਆਂ ਵਿੱਚੋਂ ਇੱਕ ਹੈ ਜਿਨ੍ਹਾਂ ਨੇ ਇਸ ਮੁਕਾਬਲੇ ਦੇ ਟੌਪ-40 ਵਿੱਚ ਜਗ੍ਹਾ ਬਣਾਈ ਹੈ। ਉਹ ਪਹਿਲਾਂ ਹੀ ਮਿਸ ਯੂਨੀਵਰਸ 2024 ਵਿੱਚ ਆਪਣੇ ਦੇਸ਼ ਦੀ ਨੁਮਾਇੰਦਗੀ ਕਰ ਚੁੱਕੀ ਹੈ ਅਤੇ ਇਸ ਮੁਕਾਬਲੇ ਵਿੱਚ ਤੀਜੇ ਸਥਾਨ 'ਤੇ ਰਹੀ ਹੈ। ਇਨ੍ਹਾਂ ਤੋਂ ਇਲਾਵਾ ਹੋਰ ਸੁੰਦਰੀਆਂ ਵਿੱਚ ਕੈਮਰੂਨ ਦੀ ਈਸ਼ੀ ਪ੍ਰਿੰਸੈਸ, ਡੋਮਿਨਿਕਨ ਰੀਪਬਲਿਕ ਦੀ ਮਾਇਰਾ ਡੇਲਗਾਡੋ ਅਤੇ ਮੋਂਟੇਨੇਗਰੋ ਦੀ ਐਂਡਰੀਆ ਨਿਕੋਲਿਕ ਵੀ ਸ਼ਾਮਲ ਹੈ, ਜੋ ਮਜ਼ਬੂਤ ਦਾਅਵੇਦਾਰਾਂ ਵਿੱਚ ਸ਼ਾਮਲ ਹਨ।