ਸੁਨਾਮ, (ਰਮੇਸ਼ ਗਰਗ ): ਸੁਨਾਮ ਦੇ ਮਾਇਆ ਗਾਰਡਨ ਵਿਖੇ ਗੋਪ ਅਸ਼ਟਮੀ ਦੇ ਪਾਵਨ ਮੌਕੇ ‘ਸ਼੍ਰੀਮਦ ਭਾਗਵਤ ਸਪਤਾਹ ਗਿਆਨ ਯਗ’ ਦਾ ਸ਼ੁਭ ਆਰੰਭ ਭਗਤੀ ਅਤੇ ਸ਼ਰਧਾ ਭਰੇ ਮਾਹੌਲ ਵਿੱਚ ਹੋਇਆ। ਇਸ ਪਾਵਨ ਕਥਾ ਦਾ ਆਯੋਜਨ ਸੰਤਾ ਦੀ ਅਗੁਵਾਈ ਵਿੱਚ ਹੋਇਆ। ਪ੍ਰੋਗਰਾਮ ਦੀ ਅਗਵਾਈ ਹਰਿਦੁਆਰ ਤੋਂ ਪਧਾਰੇ ਸਵਾਮੀ ਦਾਮੋਦਰ ਸ਼ਰਨ ਜੀ ਮਹਾਰਾਜ ਅਤੇ ਸਵਾਮੀ ਸ਼ੰਕਰ ਮੁਨੀ ਜੀ ਮਹਾਰਾਜ (ਨਿਲੋਵਾਲ ਵਾਲੇ) ਨੇ ਕੀਤੀ, ਜਦਕਿ ਕਥਾ ਵਿਆਖਿਆ ਦੀ ਸ਼ੁਰੂਆਤ ਵ੍ਰਿੰਦਾਵਨ ਤੋਂ ਪਧਾਰੇ ਪੂਜਨੀਯ ਆਚਾਰਿਆ ਸਵਾਮੀ ਰਮੇਸ਼ਾਨੰਦ ਜੀ ਮਹਾਰਾਜ ਨੇ ਮੰਗਲਾਚਰਨ ਪਾਠ ਨਾਲ ਕੀਤੀ।
ਕਥਾ ਦੇ ਪਹਿਲੇ ਦਿਨ ਸਵਾਮੀ ਰਮੇਸ਼ਾਨੰਦ ਜੀ ਮਹਾਰਾਜ ਨੇ ਸ਼੍ਰੀਮਦ ਭਾਗਵਤ ਦੇ ਮਹਾਤਮ ਬਾਰੇ ਵਿਸਥਾਰ ਨਾਲ ਜਾਣਕਾਰੀ ਦਿੰਦਿਆਂ ਭਗਵਾਨ ਸ਼੍ਰੀਕ੍ਰਿਸ਼ਨ ਦੇ ਨਾਮ "ਸੱਚਿਦਾਨੰਦ" ਦੀ ਸੁੰਦਰ ਵਿਆਖਿਆ ਕੀਤੀ। ਉਹਨਾਂ ਕਿਹਾ ਕਿ "ਜੋ ਸਤ, ਚਿਤ ਤੇ ਆਨੰਦ ਨਾਲ ਭਰਪੂਰ ਹੋਵੇ, ਉਹੀ ਸੱਚਿਦਾਨੰਦ ਕਹਾਉਂਦਾ ਹੈ।"
ਸਵਾਮੀ ਜੀ ਨੇ ਸਮਝਾਉਂਦਿਆਂ ਕਿਹਾ ਕਿ ਜੀਵ ਕੋਲ ‘ਸਤ’ (ਅਸਤੀਤਵ) ਅਤੇ ‘ਚਿਤ’ (ਚੇਤਨਾ) ਤਾਂ ਹੈ, ਪਰ ਉਸ ਵਿੱਚ ਆਨੰਦ ਦੀ ਕਮੀ ਰਹਿੰਦੀ ਹੈ। ਇਸ ਕਾਰਨ ਮਨੁੱਖ ਸੰਸਾਰਕ ਪਦਾਰਥਾਂ ਵਿੱਚ ਸੁੱਖ ਦੀ ਖੋਜ ਕਰਦਾ ਹੈ, ਪਰ ਉਸ ਨੂੰ ਕਿਸੇ ਵੀ ਪਦਾਰਥ ਵਿੱਚ ਸੱਚਾ ਆਨੰਦ ਜਾਂ ਪਰਮਾਨੰਦ ਪ੍ਰਾਪਤ ਨਹੀਂ ਹੁੰਦਾ। ਉਹਨਾਂ ਕਿਹਾ ਕਿ "ਅਸਲੀ ਸੁੱਖ ਕੇਵਲ ਪਰਮਾਤਮਾ ਦੀ ਭਗਤੀ ਵਿੱਚ ਹੈ, ਕਿਉਂਕਿ ਪਰਮਾਤਮਾ ਆਪ ਸੱਚਿਦਾਨੰਦ ਸਰੂਪ ਹਨ। ਇਸ ਲਈ ਪਰਮਾਨੰਦ ਦੀ ਪ੍ਰਾਪਤੀ ਲਈ ਪ੍ਰਭੂ ਦੇ ਚਰਣਾਂ ਦਾ ਆਸਰਾ ਲੈਣਾ ਜਰੂਰੀ ਹੈ।"
ਕਥਾ ਹਰ ਰੋਜ਼ ਸ਼ਾਮ 6 ਵਜੇ ਤੋਂ ਰਾਤ 9 ਵਜੇ ਤੱਕ ਕੀਤੀ ਜਾਵੇਗੀ। ਕਥਾ ਤੋਂ ਬਾਅਦ ਭੋਜਨ ਪ੍ਰਸਾਦ ਦੀ ਵਿਵਸਥਾ ਸ਼੍ਰੀ ਸ਼ਿਵ ਮੰਦਰ ਧਰਮਸ਼ਾਲਾ ਪ੍ਰਬੰਧਕ ਕਮੇਟੀ ਵੱਲੋਂ ਕੀਤੀ ਗਈ ਹੈ। ਇਸ ਪ੍ਰਬੰਧ ਵਿੱਚ ਪ੍ਰਧਾਨ ਮਦਨ ਕਾਂਸਲ, ਜਰਨਲ ਸਕੱਤਰ ਗੋਪਾਲ ਸ਼ਰਮਾ, ਖਜਾਂਚੀ ਐਡਵੋਕੇਟ ਰਾਕੇਸ਼ ਜਿੰਦਲ ਅਤੇ ਉਨ੍ਹਾਂ ਦੀ ਪੂਰੀ ਟੀਮ ਵੱਲੋਂ ਖਾਸ ਯੋਗਦਾਨ ਪਾਇਆ ਜਾ ਰਿਹਾ ਹੈ।
ਕਥਾ ਦੇ ਮੁੱਖ ਯਜਮਾਨ ਪੰਡਿਤ ਪ੍ਰੇਮ ਸ਼ਰਮਾ ਹਨ। ਕਥਾ ਸਥਲ ‘ਤੇ ਸ਼ਰਧਾਲੂਆਂ ਦੀ ਵੱਡੀ ਗਿਣਤੀ ਇਕੱਠੀ ਹੋਈ ਅਤੇ ਪੂਰਾ ਮਾਹੌਲ “ਹਰੇ ਕ੍ਰਿਸ਼ਨ, ਹਰੇ ਰਾਮ” ਦੇ ਜੈਕਾਰਿਆਂ ਨਾਲ ਗੂੰਜ ਉੱਠਿਆ।