ਭੁਲੇਖੇ ਨਾਲ ਗਲਤ ਬੰਦੇ ਦਾ ਕਤਲ ਕਰ ਗਏ ਸ਼ਾਰਪ ਸ਼ੂਟਰ! ਪੁਲਸ ਜਾਂਚ 'ਚ ਸਨਸਨੀਖੇਜ਼ ਖ਼ੁਲਾਸਾ

ਚੰਡੀਗੜ੍ਹ : ਚੰਡੀਗੜ੍ਹ ਵਿਚ ਕੈਮਿਸਟ ਦੀ ਦੁਕਾਨ 'ਤੇ ਕੈਸ਼ੀਅਰ ਦੇ ਕਤਲ ਮਾਮਲੇ ਵਿਚ ਨਵਾਂ ਮੋੜ ਆ ਗਿਆ ਹੈ। ਚੰਡੀਗੜ੍ਹ ਪੁਲਸ ਦੀ ਜਾਂਚ ਵਿਚ ਇਸ ਮਾਮਲੇ 'ਚ ਸਨਸਨੀਖੇਜ਼ ਖ਼ੁਲਾਸਾ ਹੋਇਆ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਸ਼ਾਰਪ ਸ਼ੂਟਰਾਂ ਨੇ ਇਹ ਕਤਲ 'ਭੁਲੇਖੇ' ਨਾਲ ਕੀਤਾ ਹੈ। ਦੁਕਾਨ ਵਿਚ ਗੋਲ਼ੀਆਂ ਨਾਲ ਭੁੰਨ੍ਹੇ ਗਏ ਜਾਨਕੀਦਾਸ ਅਸਲ ਵਿਚ ਸ਼ੂਟਰਾਂ ਦਾ ਅਸਲ ਟਾਰਗੇਟ ਨਹੀਂ ਸੀ। 

ਦਰਅਸਲ, ਮੀਡੀਆ ਰਿਪੋਰਟਾਂ ਵਿਚ ਪੁਲਸ ਸੂਤਰਾਂ ਦੇ ਹਵਾਲੇ ਨਾਲ ਇਹ ਦਾਅਵਾ ਕੀਤਾ ਜਾ ਰਿਹਾ ਹੈ ਕਿ ਫਿਰੋਜ਼ਪੁਰ ਦੇ ਇਕ ਸ਼ਖ਼ਸ ਨੇ ਸ਼ੂਟਰਾਂ ਨੂੰ ਇਕ ਨਾਮੀ ਕੈਮਿਸਟ ਨੂੰ ਮਾਰਨ ਲਈ ਭੇਜਿਆ ਸੀ। ਫ਼ਾਇਰਿੰਗ ਮਗਰੋਂ ਗੈਂਗਸਟਰ ਗੋਲਡੀ ਢਿੱਲੋਂ ਦੇ ਕਥਿਤ ਵੁਆਇਸ ਮੈਸੇਜ ਵਿਚ 'ਕੁਮਾਰ ਬ੍ਰਦਰਜ਼' ਦਾ ਜ਼ਿਕਰ ਕੀਤਾ ਗਿਆ ਸੀ। ਦੱਸਿਆ ਜਾ ਰਿਹਾ ਹੈ ਕਿ ਸ਼ੂਟਰਾਂ ਨੂੰ 'ਕੁਮਾਰ' ਨਾਂ ਤੋਂ ਭੁਲੇਖਾ ਪੈ ਗਿਆ। ਸੈਕਟਰ-11 ਵਿਚ 'ਕੁਮਾਰ' ਨਾਂ ਨਾਲ ਜੁੜੀਆਂ ਅੱਧਾ ਦਰਜਨ ਮੈਡੀਕਲ ਦੀਆਂ ਦੁਕਾਨਾਂ ਹਨ। ਉਹ ਸ਼੍ਰੀ ਕੁਮਾਰ ਕੈਮੀਸਟ ਦੀ ਦੁਕਾਨ ਵਿਚ ਵੜੇ ਤੇ ਉੱਥੇ ਬੈਠੇ ਕੈਸ਼ੀਅਰ ਜਾਨਕੀਦਾਸ ਨੂੰ ਗੋਲ਼ੀਆਂ ਮਾਰ ਦਿੱਤੀਆਂ। 

ਪੁਲਸ ਨੇ ਇਸ ਮਾਮਲੇ 'ਚ ਇਕ ਸ਼ੂਟਰ ਨੂੰ ਜੰਮੂ ਦੇ ਬਹਿਰਾਣਾ ਤੋਂ ਗ੍ਰਿਫ਼ਤਾਰ ਕੀਤਾ ਹੈ, ਜਿਸ ਦੀ ਪਛਾਣ ਸੰਨੀ ਮਹਿਰਾ ਵਜੋਂ ਹੋਈ ਹੈ। ਹਾਲਾਂਕਿ ਪੁਲਸ ਵਿਭਾਗ ਨੇ ਇਸ ਸਬੰਧ ’ਚ ਪੁਸ਼ਟੀ ਨਹੀਂ ਕੀਤੀ। ਸ਼ੁਰੂਆਤੀ ਪੁੱਛਗਿਛ ’ਚ ਪਤਾ ਲੱਗਾ ਹੈ ਕਿ ਵਾਰਦਾਤ ਤੋਂ ਬਾਅਦ ਸ਼ੂਟਰ ਚੰਡੀਗੜ੍ਹ ਤੋਂ ਦਿੱਲੀ ਗਏ ਤੇ ਉੱਥੋਂ ਰੇਲਗੱਡੀ ਰਾਹੀਂ ਜੰਮੂ ਪਹੁੰਚੇ ਸਨ। ਸੂਤਰਾਂ ਦੀ ਮੰਨ੍ਹੀਏ ਤਾਂ ਸੰਨੀ ਲਗਭਗ ਦੋ ਮਹੀਨਿਆਂ ਤੋਂ ਦਿੱਲੀ ਦੇ ਰੈਸਟੋਰੈਂਟ ’ਚ ਕੰਮ ਕਰ ਰਿਹਾ ਸੀ। ਇਸ ਦੌਰਾਨ ਉਹ ਆਪਣੇ ਘਰ ਵਾਪਸ ਨਹੀਂ ਗਿਆ ਸੀ। ਚੰਡੀਗੜ੍ਹ ਪੁਲਸ ਦੀਆਂ ਟੀਮਾਂ ਫਰਾਰ ਸ਼ੂਟਰ ਅਮਨ ਤੇ ਆਰੀਅਨ ਦੀ ਭਾਲ ’ਚ ਦਿੱਲੀ ਤੇ ਜੰਮੂ ’ਚ ਛਾਪੇਮਾਰੀ ਕਰ ਰਹੀਆਂ ਹਨ।

ਪੁਲਸ ਜਾਂਚ ’ਚ ਸਾਹਮਣੇ ਆਇਆ ਕਿ ਵਾਰਦਾਤ ’ਚ ਵਰਤੀ ਜ਼ਿਗਾਨਾ ਪਿਸਤੌਲ ਤੁਰਕੀ ’ਚ ਬਣੀ ਹੈ। ਇਹ ਪਿਸਤੌਲ ਪਾਕਿਸਤਾਨ ਤੋਂ ਜੰਮੂ ਪਹੁੰਚੀ ਤੇ ਉੱਥੋਂ ਗੋਲਡੀ ਢਿੱਲੋਂ ਗੈਂਗ ਦੇ ਮੈਂਬਰਾਂ ਨੇ ਸ਼ੂਟਰ ਅਮਨ, ਆਰੀਅਨ ਤੇ ਸੰਨੀ ਨੂੰ ਮੁਹੱਈਆ ਕਰਵਾਈ ਸੀ। ਤਿੰਨਾਂ ਮੁਲਜ਼ਮਾਂ ਕੋਲ ਇਕ-ਇਕ ਪਿਸਤੌਲ ਸੀ। ਪੁਲਸ ਨੇ ਪਿਸਤੌਲ, ਬਾਈਕ ਤੇ ਹੋਟਲ ’ਚ ਠਹਿਰਾਉਣ ਦਾ ਪ੍ਰਬੰਧ ਕਰਨ ਵਾਲੇ ਤਿੰਨ ਨੌਜਵਾਨਾਂ ਨੂੰ ਹਿਰਾਸਤ ’ਚ ਲੈ ਲਿਆ ਹੈ ਤੇ ਉਨ੍ਹਾਂ ਤੋਂ ਪੁੱਛਗਿੱਛ ਜਾਰੀ ਹੈ।

ਕਿਸੇ ਹੋਰ ਦੇ ਆਧਾਰ ਕਾਰਡ ’ਤੇ ਕਰਵਾਇਆ ਕਮਰਾ ਬੁੱਕ

ਗੋਲਡੀ ਢਿੱਲੋਂ ਗੈਂਗ ਦੇ ਸ਼ੂਟਰਾਂ ਲਈ ਕਜਹੇੜੀ ਦੇ ਹੋਟਲ ’ਚ ਕਿਸੇ ਹੋਰ ਦੇ ਆਧਾਰ ਕਾਰਡ ’ਤੇ ਕਮਰਾ ਬੁੱਕ ਕਰਵਾਇਆ ਸੀ। ਪੁਲਸ ਟੀਮ ਨੇ ਹੋਟਲ ਤੋਂ ਆਧਾਰ ਕਾਰਡ ਦੀ ਕਾਪੀ ਲੈ ਕੇ ਵਿਅਕਤੀ ਨੂੰ ਹਿਰਾਸਤ ’ਚ ਲਿਆ। ਪੁਲਸ ਟੀਮਾਂ ਆਧਾਰ ਕਾਰਡ ਵਾਲੇ ਵਿਅਕਤੀ ਤੋਂ ਲਗਾਤਾਰ ਪੁੱਛਗਿੱਛ ਕਰ ਰਹੀਆਂ ਹਨ। ਇਸ ਤੋਂ ਇਲਾਵਾ ਮੋਬਾਈਲ ਦੀ ਕਾਲ ਡਿਟੇਲ ਦੀ ਵੀ ਜਾਂਚ ਕੀਤੀ ਜਾ ਰਹੀ ਹੈ। ਹੋਟਲ ਰਿਕਾਰਡ ਮੁਤਾਬਕ ਤਿੰਨੇ ਮੁਲਜ਼ਮ ਸ਼ੁੱਕਰਵਾਰ ਦੁਪਹਿਰ 2 ਤੋਂ 2:30 ਵਜੇ ਦੇ ਵਿਚਕਾਰ ਹੋਟਲ ਪਹੁੰਚੇ ਸਨ। ਕਮਰਾ ਲੈਣ ਤੋਂ ਬਾਅਦ ਸ਼ਾਮ ਨੂੰ ਬਾਹਰ ਗਏ ਤੇ ਥੋੜ੍ਹੀ ਦੇਰ ਬਾਅਦ ਵਾਪਸ ਆ ਗਏ। ਇਸ ਤੋਂ ਬਾਅਦ ਸ਼ਨੀਵਾਰ ਦੁਪਹਿਰ ਲਗਭਗ 12:55 ਵਜੇ ਤਿੰਨਾਂ ਨੇ ਹੋਟਲ ਤੋਂ ਚੈੱਕ ਆਊਟ ਕੀਤਾ। ਹੋਟਲ ਦਾ ਕਿਰਾਇਆ 800 ਰੁਪਏ ਦੇਣ ਦੇ ਬਾਅਦ ਚਲੇ ਗਏ।