ਨਵੀਂ ਦਿੱਲੀ : ਅੰਤਰਰਾਸ਼ਟਰੀ ਮੁਦਰਾ ਫੰਡ (ਆਈ. ਐੱਮ. ਐੱਫ.) ਦੀ ਸਾਬਕਾ ਮੁੱਖ ਅਰਥਸ਼ਾਸਤਰੀ ਗੀਤਾ ਗੋਪੀਨਾਥ ਨੇ ਕਿਹਾ ਕਿ ਭਾਰਤ ਦੀ ਅਰਥਵਿਵਸਥਾ ਚਾਲੂ ਵਿੱਤੀ ਸਾਲ ’ਚ ਲੱਗਭਗ 7 ਫੀਸਦੀ ਦੀ ਵਾਧਾ ਦਰ ਦਰਜ ਕਰ ਸਕਦੀ ਹੈ। ਇਹ ਅੰਕੜਾ ਅਕਤੂਬਰ ’ਚ ਆਈ. ਐੱਮ. ਐੱਫ. ਦੇ ਅੰਦਾਜ਼ੇ 6.6 ਫੀਸਦੀ ਤੋਂ ਥੋੜ੍ਹਾ ਵੱਧ ਹੈ।
‘ਇੰਡੀਆ ਇਕਨਾਮਿਕ ਕਾਨਕਲੇਵ 2025’ ’ਚ ਉਨ੍ਹਾਂ ਕਿਹਾ ਕਿ ਆਈ. ਐੱਮ. ਐੱਫ. ਨੇ ਭਾਰਤ ਦੇ ਵਾਧੇ ਦਾ ਅੰਦਾਜ਼ਾ ਰਾਸ਼ਟਰੀ ਅੰਕੜਾ ਦਫਤਰ (ਐੱਨ. ਐੱਸ. ਓ.) ਵੱਲੋਂ ਜੁਲਾਈ-ਸਤੰਬਰ ਤਿਮਾਹੀ ’ਚ 8.2 ਫੀਸਦੀ ਵਾਧਾ ਦਰ ਐਲਾਨ ਹੋਣ ਤੋਂ ਪਹਿਲਾਂ ਲਾਇਆ ਸੀ।
ਗੋਪੀਨਾਥ ਨੇ ਕਿਹਾ,‘‘ਆਈ. ਐੱਮ. ਐੱਫ. ਦਾ ਅੰਦਾਜ਼ਾ 6.6 ਫੀਸਦੀ ਸੀ ਪਰ ਦੂਜੀ ਤਿਮਾਹੀ ਦੀ ਅਸਲੀ ਵਾਧਾ ਦਰ 8 ਫੀਸਦੀ ਤੋਂ ਵੱਧ ਹੈ। ਅਜਿਹੇ ’ਚ ਮੈਂ ਮੰਨਦੀ ਹਾਂ ਕਿ ਭਾਰਤ ਦੀ ਜੀ. ਡੀ. ਪੀ. ਵਾਧਾ ਦਰ ਕਰੀਬ 7 ਫੀਸਦੀ ਤੱਕ ਜਾਵੇਗੀ।’’
ਕੇਅਰਐਜ ਦਾ 7.5 ਫੀਸਦੀ ਰਹਿਣ ਦਾ ਅੰਦਾਜ਼ਾ
ਦੇਸ਼ ਦੀ ਅਸਲੀ ਕੁਲ ਘਰੇਲੂ ਉਤਪਾਦ (ਜੀ. ਡੀ. ਪੀ.) ਵਾਧਾ ਦਰ ਵਿੱਤੀ ਸਾਲ 2025-26 ’ਚ 7.5 ਫੀਸਦੀ ਰਹਿ ਸਕਦੀ ਹੈ, ਜਦੋਂਕਿ ਅਗਲੇ ਵਿੱਤੀ ਸਾਲ ’ਚ ਇਸ ਦੇ ਕੁੱਝ ਨਰਮ ਹੋ ਕੇ 7 ਫੀਸਦੀ ’ਤੇ ਆਉਣ ਦਾ ਅੰਦਾਜ਼ਾ ਹੈ। ਘਰੇਲੂ ਰੇਟਿੰਗ ਏਜੰਸੀ ਕੇਅਰਐਜ ਨੇ ਇਹ ਕਿਹਾ।
ਰਿਪੋਰਟ ਅਨੁਸਾਰ, ਹਾਲ ਹੀ ’ਚ 91 ਰੁਪਏ ਪ੍ਰਤੀ ਡਾਲਰ ਦੇ ਹੇਠਲੇ ਪੱਧਰ ਤੱਕ ਫਿਸਲ ਚੁੱਕਾ ਰੁਪਇਆ ਅੱਗੇ ਚਲ ਕੇ ਮਜ਼ਬੂਤ ਹੋ ਸਕਦਾ ਹੈ। ਇਸ ਨੇ ਵਿੱਤੀ ਸਾਲ 2026-27 ’ਚ ਰੁਪਏ ਦੇ 89-90 ਰੁਪਏ ਪ੍ਰਤੀ ਡਾਲਰ ਦੇ ਘੇਰੇ ’ਚ ਰਹਿਣ ਦਾ ਅੰਦਾਜ਼ਾ ਲਾਇਆ ਹੈ।
ਕੇਅਰਐਜ ਰੇਟਿੰਗਜ਼ ਦੀ ਮੁੱਖ ਅਰਥਸ਼ਾਸਤਰੀ ਰਜਨੀ ਸਿਨ੍ਹਾ ਨੇ ਕਿਹਾ,‘‘ਵਿੱਤੀ ਸਾਲ 2026-27 ਵੱਲ ਕਦਮ ਵਧਾਉਂਦੇ ਸਮੇਂ ਭਾਰਤ ਦਾ ਮਾਈਕ੍ਰੋ ਆਰਥਿਕ ਸਥਿਤੀ ਸਾਕਾਰਾਤਮਕ ਬਣੀ ਹੋਈ ਹੈ। ਬਾਹਰੀ ਬੇਯਕੀਨੀਆਂ ਦੇ ਬਾਵਜੂਦ ਭਾਰਤੀ ਅਰਥਵਿਵਸਥਾ ਅਗਲੇ ਵਿੱਤੀ ਸਾਲ ’ਚ ਕਰੀਬ 7 ਫੀਸਦੀ ਦਾ ਤੰਦਰੁਸਤ ਵਾਧਾ ਦਰਜ ਕਰਨ ’ਚ ਸਮਰੱਥ ਰਹੇਗੀ।’’
ਰਿਪੋਰਟ ਕਹਿੰਦੀ ਹੈ ਕਿ ਕਿਰਤ ਕੋਡ ਵਰਗੇ ਨਵੇਂ ਸੁਧਾਰ ਘਰੇਲੂ ਅਤੇ ਗਲੋਬਲ ਨਿਵੇਸ਼ਕਾਂ ਦਾ ਵਿਸ਼ਵਾਸ ਹੋਰ ਮਜ਼ਬੂਤ ਕਰਨਗੇ। ਹਾਲਾਂਕਿ ਵਿੱਤੀ ਸਾਲ 2025-26 ਦੀ ਦੂਜੀ ਛਿਮਾਹੀ ’ਚ ਬਰਾਮਦ ’ਚ ਐਡਵਾਂਸ ਆਰਡਰਾਂ ਦਾ ਅਸਰ ਘੱਟ ਹੋਣ ਅਤੇ ਤਿਉਹਾਰਾਂ ਤੋਂ ਬਾਅਦ ਖਪਤ ਦੇ ਆਮ ਹੋਣ ਨਾਲ ਵਾਧਾ ਦਰ ਕੁਝ ਸੁਸਤ ਹੋ ਕੇ 7 ਫੀਸਦੀ ਰਹਿ ਸਕਦੀ ਹੈ।