ਨਵੀਂ ਦਿੱਲੀ : ਪੂਰੀ ਦੁਨੀਆ ’ਚ ਆਈ. ਟੀ. ਕੰਪਨੀਆਂ ਦੇ ਸ਼ੇਅਰਾਂ ’ਚ ਸ਼ੁਰੂ ਹੋਈ ਬਿਕਵਾਲੀ ਦੀਆਂ ਖਬਰਾਂ ਦਰਮਿਆਨ ਬਿਟਕੁਆਇਨ ’ਚ ਨਿਵੇਸ਼ ਕਰਨ ਵਾਲੇ ਨਿਵੇਸ਼ਕ ਬੁਰੀ ਤਰ੍ਹਾਂ ਭਾਰੀ ਨੁਕਸਾਨ ’ਚ ਫਸ ਗਏ ਹਨ। ਬਿਟਕੁਆਇਨ ਨੇ 6 ਅਕਤੂਬਰ ਨੂੰ 1,26,272 ਡਾਲਰ ਪ੍ਰਤੀ ਬਿਟਕੁਆਇਨ ਦਾ ਕੁੱਲ-ਵਕਤੀ ਉੱਚਾ ਪੱਧਰ ਬਣਾਇਆ ਸੀ ਪਰ ਹੁਣ ਇਹ ਟੁੱਟ ਕੇ 90,000 ਡਾਲਰ ਤੋਂ ਹੇਠਾਂ ਆ ਗਿਆ ਹੈ।
ਮੰਗਲਵਾਰ ਨੂੰ ਵੀ ਬਿਟਕੁਆਇਨ ਦੀਆਂ ਕੀਮਤਾਂ ’ਚ ਗਿਰਾਵਟ ਦੇਖਣ ਨੂੰ ਮਿਲੀ ਅਤੇ ਇਹ ਖਬਰ ਲਿਖੇ ਜਾਣ ਤੱਕ 91,428 ਡਾਲਰ ਪ੍ਰਤੀ ਬਿਟਕੁਆਇਨ ਤੱਕ ਆ ਪਹੁੰਚਿਆ। ਪਿਛਲੇ 44 ਕਾਰੋਬਾਰੀ ਸੈਸ਼ਨਾਂ ਦੌਰਾਨ ਬਿਟਕੁਆਇਨ ਦੀ ਕੀਮਤ ਲੱਗਭਗ 30 ਫੀਸਦੀ ਟੁੱਟ ਚੁੱਕੀ ਹੈ ਅਤੇ ਨਿਵੇਸ਼ਕ ਇਸ ’ਚ ਉੱਪਰੀ ਪੱਧਰ ’ਤੇ ਫਸ ਗਏ ਹਨ, ਕਿਉਂਕਿ ਬਿਟਕੁਆਇਨ 22 ਅਪ੍ਰੈਲ ਤੋਂ ਬਾਅਦ ਆਪਣੇ ਸਭ ਤੋਂ ਹੇਠਲੇ ਪੱਧਰ ’ਤੇ ਪਹੁੰਚ ਗਿਆ ਸੀ ਅਤੇ ਇਸ ਸਾਲ ਲਈ ਇਸ ਦੀ ਰਿਟਰਨ ਨੈਗੇਟਿਵ ਜ਼ੋਨ ’ਚ ਆ ਗਈ ਹੈ।
ਫੈਕਟਸੈਟ ਦੇ ਅੰਕੜਿਆਂ ਮੁਤਾਬਕ ਬਿਟਕੁਆਇਨ ’ਚ ਇਸ ਸਾਲ ਹੁਣ ਤੱਕ ਦੀ 2 ਫ਼ੀਸਦੀ ਨੈਗੇਟਿਵ ਰਿਟਰਨ ਹੈ। ਇਹ ਗਿਰਾਵਟ ਇਸ ਲਈ ਵੀ ਆਈ ਹੈ ਕਿਉਂਕਿ ਨਿਵੇਸ਼ਕ ਇਸ ਮਹੀਨੇ ਸ਼ੇਅਰ ਬਾਜ਼ਾਰ ’ਚ ਆਪਣੇ ਏ. ਆਈ. ਨਾਲ ਸਬੰਧਤ ਟੈੱਕ ਸ਼ੇਅਰਾਂ ਨੂੰ ਵੀ ਵੇਚ ਰਹੇ ਹਨ। ਬਿਟਕੁਆਇਨ ਨੇ ਇਸ ਜੋਖਮ ਤੋਂ ਬਚਣ ਵਾਲੀ ਚਾਲ ਦੇ ਸੰਕੇਤ ਪਹਿਲਾਂ ਹੀ ਦੇ ਦਿੱਤੇ ਸਨ। ਅਮਰੀਕਾ ’ਚ ਟੈਕਨਾਲੋਜੀ ਸ਼ੇਅਰਾਂ ’ਤੇ ਆਧਾਰਿਤ ਇੰਡੈਕਸ ਨੈਸਡੇਕ-100 ’ਚ ਵੀ ਇਸ ਮਹੀਨੇ 4 ਫ਼ੀਸਦੀ ਦੀ ਗਿਰਾਵਟ ਆਈ ਹੈ ਅਤੇ ਇਹ ਕ੍ਰਿਪਟੋਕਰੰਸੀ ਦੀ ਗਿਰਾਵਟ ਵਾਂਗ ਚੱਲਦਾ ਨਜ਼ਰ ਆ ਰਿਹਾ ਹੈ।
ਕਈ ਵੱਡੇ ਟੈੱਕ ਨਿਵੇਸ਼ਕਾਂ ਕੋਲ ਕ੍ਰਿਪਟੋਕਰੰਸੀ ’ਚ ਵੀ ਵੱਡਾ ਨਿਵੇਸ਼ ਹੁੰਦਾ ਹੈ, ਇਸ ਲਈ ਦੋਵਾਂ ਬਾਜ਼ਾਰਾਂ ’ਚ ਇਕੋ ਜਿਹੀ ਹਲਚਲ ਦੇਖਣ ਨੂੰ ਮਿਲ ਰਹੀ ਹੈ। ਜੋਨਸ ਟਰੇਡਿੰਗ ਦੇ ਮੁੱਖ ਬਾਜ਼ਾਰ ਰਣਨੀਤੀਕਾਰ ਮਾਇਕ ਓ’ਰੂਰਕੇ ਨੇ ਕਿਹਾ ਕਿ ਬਿਟਕੁਆਇਨ ਅਤੇ ਟੈੱਕ ਸ਼ੇਅਰਾਂ ’ਚ ਇਸ ਹਫਤੇ ਦੀ ਗਿਰਾਵਟ ਦਾ ਆਪਸ ’ਚ ਸਬੰਧ ‘ਅਸਵੀਕਾਰਨਯੋਗ ਤੌਰ ’ਤੇ ਸਪੱਸ਼ਟ’ ਹੈ।
ਉਨ੍ਹਾਂ ਕਿਹਾ, “ਜਦੋਂ 1.8 ਟ੍ਰਿਲੀਅਨ ਡਾਲਰ ਮਾਰਕੀਟ ਕੈਪ ਵਾਲਾ ਸੱਟਾਤਮਕ ਐਸੈੱਟ 32 ਟ੍ਰਿਲੀਅਨ ਡਾਲਰ ਮਾਰਕੀਟ ਕੈਪ ਵਾਲੇ ਸੂਚਕ ਅੰਕ ਨੂੰ ਪ੍ਰਭਾਵਿਤ ਕਰੇ, ਤਾਂ ਇਹ ਵਾਕਈ ਚਿੰਤਾਜਨਕ ਹੈ, ਕਿਉਂਕਿ ਅਮਰੀਕਾ ਦੇ ਸਭ ਤੋਂ ਵੱਡੇ ਅਤੇ ਪ੍ਰਭਾਵਸ਼ਾਲੀ ਕੰਪਨੀਆਂ ਨਾਲ ਭਰੇ ਇਸ ਸੂਚਕ ਅੰਕ ਦੀ ਚਾਲ ਨੂੰ ਬਿਟਕੁਆਇਨ ਦਿਸ਼ਾ ਦੇ ਰਿਹਾ ਹੈ।”
ਬਿਟਕੁਆਇਨ ਖਰੀਦਣ ਲਈ ਲਿਵਰੇਜ ਦੀ ਵਰਤੋਂ ਕਰਨ ਵਾਲਾ ਸਭ ਤੋਂ ਜੋਖਮ ਭਰੇ ਪ੍ਰਾਕਸੀ ਮਾਈਕ੍ਰੋ ਸਟਰੈਟੇਜੀ ਮੰਗਲਵਾਰ ਦੀ ਪ੍ਰੀ-ਮਾਰਕੀਟ ਟਰੇਡਿੰਗ ’ਚ ਗਿਰਾਵਟ ਨਾਲ ਕਾਰੋਬਾਰ ਕਰ ਰਿਹਾ ਸੀ ਅਤੇ ਇਹ ਸ਼ੇਅਰ ਨਵੰਬਰ ’ਚ ਪਹਿਲਾਂ ਹੀ 27 ਫ਼ੀਸਦੀ ਡਿੱਗ ਚੁੱਕਿਆ ਹੈ।