ਨੈਸ਼ਨਲ ਹਾਈਵੇ ਤੇ ਲੱਗੇ ਕੈਮਰੇ ਉਤਾਰ ਚੋਰੀ ਕਰਨ ਦੇ ਮਾਮਲੇ ਵਿੱਚ ਟਰੱਕ ਚਾਲਕ ਪੁਲਿਸ ਵੱਲੋਂ ਕੀਤਾ ਕਾਬੂ

ਖਰੜ (ਪ੍ਰੀਤ ਪੱਤੀ):-- ਪੁਲਿਸ ਥਾਣਾ ਘੜੂੰਆਂ ਦੀ ਪੁਲਿਸ ਨੇ ਹਾਈਵੇ ਤੇ ਲੱਗੇ ਕੈਮਰੇ ਉਤਾਰ ਕੇ ਚੋਰੀ ਕਰ ਲੈਣ ਦੇ ਮਾਮਲੇ ਵਿੱਚ ਇੱਕ ਟਰੱਕ ਚਾਲਕ ਦੇ ਖਿਲਾਫ ਮਾਮਲਾ ਦਰਜ ਕਰ ਉਸ ਨੂੰ ਕਾਬੂ ਕੀਤਾ। ਇਸ ਬਾਰੇ ਜਾਣਕਾਰੀ ਦਿੰਦਿਆਂ ਡੀਐਸਪੀ ਖਰੜ-1 ਕਰਨ ਸਿੰਘ ਸੰਧੂ ਨੇ ਦੱਸਿਆ ਕਿ ਪੁਲਿਸ ਥਾਣਾ ਘੜੂੰਆਂ ਅਧੀਨ ਇੱਕ ਵਿਅਕਤੀ ਵੱਲੋਂ ਹਾਈਵੇ ਦੇ ਲੱਗੇ ਕੈਮਰੇ ਚੋਰੀ ਕੀਤੇ ਗਏ ਸਨ ਜਿਸ ਸਬੰਧ ਵਿੱਚ ਉਨਾਂ ਦੇ ਐਸਐਚ ਓ ਘੜੂੰਆਂ ਕਮਲ ਤਨੇਜਾ ਦੀ ਅਗਵਾਹੀ ਵਿੱਚ ਪੁਲਿਸ ਪਾਰਟੀ ਏਐਸਆਈ ਕਮਲਜੀਤ ਸਿੰਘ ਸਮੇਤ ਬਸ ਸਟੈਂਡ ਘੜੂੰਆਂ ਵਿਖੇ ਮੌਜੂਦ ਸੀ ਕਿ ਉਹਨਾਂ ਨੂੰ ਇੱਕ ਮੁਖਬਰ ਖਾਸ ਨੇ ਇਤਲਾਹ ਦਿੱਤੀ ਕਿ ਇੱਕ ਟਰੱਕ ਚਾਲਕ ਵੱਲੋਂ ਚੰਡੀਗੜ੍ਹ ਯੂਨੀਵਰਸਿਟੀ ਦੇ ਸਾਹਮਣੇ ਬਣੇ ਪੁੱਲ ਤੋਂ ਅੱਗੇ ਹਾਈਵੇ ਤੇ ਲੱਗੇ ਇੱਕ ਸੀਸੀ ਟੀਵੀ ਕੈਮਰਿਆਂ ਨੂੰ ਇੱਕ ਟਰੱਕ ਚਾਲਕ ਆਪਣੇ ਯੂਪੀ ਨੰਬਰ ਟਰੱਕ ਉੱਤੇ ਚੜਕੇ ਉਤਾਰ ਕੇ ਚੋਰੀ ਕਰ ਲੈ ਗਿਆ ਹੈ। ਉਹਨਾਂ ਦੱਸਿਆ ਕਿ ਉਹਨਾਂ ਤੁਰੰਤ ਕਾਰਵਾਈ ਕਰਦਿਆਂ ਇਸ ਮਾਮਲੇ ਵਿੱਚ ਯੂਪੀ ਨੰਬਰੀ ਟਰੱਕ ਦੇ ਖਿਲਾਫ ਮਾਮਲਾ ਦਰਜ ਕਰ ਉਕਤ ਟਰੱਕ ਚਾਲਕ ਦੀ ਭਾਲ ਕਰਨੀ ਸ਼ੁਰੂ ਕਰ ਦਿੱਤੀ ਜਿਸ ਦੌਰਾਨ ਉਨਾਂ ਵੱਲੋਂ ਟਰੱਕ ਚਾਲਕ ਨੂੰ ਕਾਬੂ ਕਰ ਲਿਆ ਗਿਆ ਜਿਸ ਦੀ ਪਹਿਚਾਣ ਹੂਸੈਨ ਪੁੱਤਰ ਯਾਸੀਨ ਵਾਸੀ ਸਹਾਰਨਪੁਰ ਯੂਪੀ ਵੱਜੋ ਹੋਈ ਹੈ। ਪੁਲਿਸ ਵੱਲੋਂ ਕਾਬੂ ਟਰੱਕ ਚਾਲਕ ਹੁਸੈਨ ਤੋਂ ਉਸ ਵੱਲੋਂ ਚੋਰੀ ਕੀਤੇ ਦੋ ਕੈਮਰੇ ਬਰਾਮਦ ਕਰ ਲਏ ਗਏ ਹਨ ਅਤੇ ਜਿਸ ਨੂੰ ਕੱਲ ਮਾਨਯੋਗ ਅਦਾਲਤ ਵਿੱਚ ਪੇਸ਼ ਕੀਤਾ ਜਾਵੇਗਾ