ਟੀ-20 ਵਿਸ਼ਵ ਕੱਪ 2026 ਤੋਂ ਬਾਹਰ ਹੋਣ ਤੋਂ ਤੁਰੰਤ ਬਾਅਦ ਬੰਗਲਾਦੇਸ਼ ਕ੍ਰਿਕਟ ਬੋਰਡ (BCB) ਨੇ ਸਖ਼ਤ ਕਦਮ ਚੁੱਕਦਿਆਂ ਅਗਲੇ ਸੀਜ਼ਨ ਲਈ ਖਿਡਾਰੀਆਂ ਦੇ ਸੈਂਟਰਲ ਕੰਟਰੈਕਟ ਦਾ ਐਲਾਨ ਕਰ ਦਿੱਤਾ ਹੈ। ਇਸ ਵਾਰ ਬੋਰਡ ਨੇ ਕੁੱਲ 28 ਖਿਡਾਰੀਆਂ ਨੂੰ ਕੰਟਰੈਕਟ ਵਿੱਚ ਜਗ੍ਹਾ ਦਿੱਤੀ ਹੈ, ਪਰ ਸਭ ਤੋਂ ਹੈਰਾਨੀਜਨਕ ਗੱਲ ਇਹ ਹੈ ਕਿ ਕਿਸੇ ਵੀ ਖਿਡਾਰੀ ਨੂੰ 'A+' ਕੈਟੇਗਰੀ ਵਿੱਚ ਸ਼ਾਮਲ ਨਹੀਂ ਕੀਤਾ ਗਿਆ।
ਸੀਨੀਅਰ ਖਿਡਾਰੀਆਂ ਨੂੰ ਲੱਗਾ ਝਟਕਾ
ਨਵੇਂ ਕੰਟਰੈਕਟ ਵਿੱਚ ਦੋ ਸਭ ਤੋਂ ਸੀਨੀਅਰ ਖਿਡਾਰੀਆਂ ਦਾ ਡੀਮੋਸ਼ਨ (ਦਰਜਾ ਘਟਾਉਣਾ) ਕੀਤਾ ਗਿਆ ਹੈ। ਤੇਜ਼ ਗੇਂਦਬਾਜ਼ ਤਸਕੀਨ ਅਹਿਮਦ, ਜੋ ਪਹਿਲਾਂ 'A+' ਕੈਟੇਗਰੀ ਵਿੱਚ ਸਨ, ਹੁਣ 'A' ਕੈਟੇਗਰੀ ਵਿੱਚ ਆ ਗਏ ਹਨ। ਇਸੇ ਤਰ੍ਹਾਂ ਤਜ਼ਰਬੇਕਾਰ ਵਿਕਟਕੀਪਰ ਬੱਲੇਬਾਜ਼ ਮੁਸ਼ਫਿਕੁਰ ਰਹੀਮ ਨੂੰ 'A' ਕੈਟੇਗਰੀ ਤੋਂ ਹਟਾ ਕੇ 'B' ਕੈਟੇਗਰੀ ਵਿੱਚ ਭੇਜ ਦਿੱਤਾ ਗਿਆ ਹੈ। ਇਸ ਤੋਂ ਇਲਾਵਾ ਟੈਸਟ ਸਲਾਮੀ ਬੱਲੇਬਾਜ਼ ਮਹਿਮੂਦੁਲ ਹਸਨ ਜੌਏ ਆਪਣੀ ਜਗ੍ਹਾ ਬਣਾਉਣ ਵਿੱਚ ਅਸਫਲ ਰਹੇ ਹਨ।
ਕਿਸ ਨੂੰ ਮਿਲੀ ਕਿਹੜੀ ਜਗ੍ਹਾ?
ਬੋਰਡ ਨੇ ਕੰਟਰੈਕਟ ਨੂੰ ਚਾਰ ਸ਼੍ਰੇਣੀਆਂ— A, B, C ਅਤੇ D ਵਿੱਚ ਵੰਡਿਆ ਹੈ।
• ਗ੍ਰੇਡ A: ਨਜਮੁਲ ਹੁਸੈਨ ਸ਼ਾਂਤੋ, ਮੇਹਦੀ ਹਸਨ ਮਿਰਾਜ, ਲਿਟਨ ਦਾਸ ਅਤੇ ਤਸਕੀਨ ਅਹਿਮਦ।
• ਗ੍ਰੇਡ B: ਮੁਸ਼ਫਿਕੁਰ ਰਹੀਮ ਸਮੇਤ 11 ਖਿਡਾਰੀ, ਜਿਨ੍ਹਾਂ ਵਿੱਚ ਮੁਸਤਫਿਜ਼ੁਰ ਰਹਿਮਾਨ ਵੀ ਸ਼ਾਮਲ ਹਨ।
• ਗ੍ਰੇਡ C: ਸੌਮਿਆ ਸਰਕਾਰ, ਸ਼ੋਰੀਫੁਲ ਇਸਲਾਮ ਸਮੇਤ 6 ਖਿਡਾਰੀ।
• ਗ੍ਰੇਡ D: 7 ਖਿਡਾਰੀਆਂ ਨੂੰ ਇਸ ਸ਼੍ਰੇਣੀ ਵਿੱਚ ਰੱਖਿਆ ਗਿਆ ਹੈ।
ਕਿੰਨੀ ਮਿਲੇਗੀ ਸੈਲਰੀ?
ਸੈਲਰੀ ਦੇ ਲਿਹਾਜ਼ ਨਾਲ 'A' ਕੈਟੇਗਰੀ ਦੇ ਖਿਡਾਰੀਆਂ ਨੂੰ ਹਰ ਮਹੀਨੇ ਲਗਭਗ 6 ਲੱਖ ਭਾਰਤੀ ਰੁਪਏ (8 ਲੱਖ ਟਕਾ) ਮਿਲਣਗੇ। 'B' ਕੈਟੇਗਰੀ ਲਈ 4.5 ਲੱਖ ਰੁਪਏ, 'C' ਲਈ 2.9 ਲੱਖ ਰੁਪਏ ਅਤੇ 'D' ਕੈਟੇਗਰੀ ਦੇ ਖਿਡਾਰੀਆਂ ਨੂੰ ਲਗਭਗ ਡੇਢ ਲੱਖ ਭਾਰਤੀ ਰੁਪਏ ਮਾਸਿਕ ਤਨਖਾਹ ਦਿੱਤੀ ਜਾਵੇਗੀ। ਬੋਰਡ ਦੇ ਇਸ ਸਖ਼ਤ ਫੈਸਲੇ ਨੇ ਬੰਗਲਾਦੇਸ਼ੀ ਕ੍ਰਿਕਟ ਜਗਤ ਵਿੱਚ ਹਲਚਲ ਮਚਾ ਦਿੱਤੀ ਹੈ।