ਖਰੜ (ਪ੍ਰੀਤ ਪੱਤੀ) : ਵਧ ਰਹੀ ਗਰਮੀ ਅਤੇ ਤਪਸ਼ ਨੂੰ ਦੇਖਦੇ ਹੋਏ ਦਾਨਵੀਰ ਫਾਊਂਡੇਸ਼ਨ ਐਨਜੀਓ ਰਜਿ. ਖਰੜ ਵੱਲੋਂ ਇੱਕ ਵਿਸ਼ੇਸ਼ ਸਮਾਜ ਸੇਵੀ ਮੁਹਿੰਮ ਚਲਾਈ ਗਈ। ਇਸ ਮੁਹਿੰਮ ਤਹਿਤ ਖਰੜ ਦੇ ਟੈਗੋਰ ਨਿਕੇਤਨ ਮਾਡਲ ਹਾਈ ਸਕੂਲ ਵਿੱਚ ਬੇਜ਼ੁਬਾਨ ਪੰਛੀਆਂ ਅਤੇ ਜਾਨਵਰਾਂ ਲਈ ਪਾਣੀ ਦੇ ਕਟੋਰੇ (ਸਕੋਰੇ) ਵੰਡੇ ਗਏ।
ਦਾਨਵੀਰ ਫਾਊਂਡੇਸ਼ਨ ਦੇ ਪ੍ਰਧਾਨ ਤਰਨਦੀਪ ਸ਼ਰਮਾ ਨੇ ਦੱਸਿਆ ਕਿ ਗਰਮੀ ਦੇ ਮੌਸਮ ਵਿੱਚ ਪਾਣੀ ਦੀ ਕਮੀ ਕਾਰਨ ਕਈ ਪੰਛੀ ਅਤੇ ਬੇਜ਼ੁਬਾਨ ਜੀਵ ਤੜਫ਼ਦੇ ਹਨ। ਉਨ੍ਹਾਂ ਕਿਹਾ ਕਿ, “ਇਹ ਸਾਡਾ ਨੈਤਿਕ ਫਰਜ਼ ਬਣਦਾ ਹੈ ਕਿ ਅਸੀਂ ਇਨ੍ਹਾਂ ਬੇਜ਼ੁਬਾਨ ਜੀਵਾਂ ਲਈ ਪਾਣੀ ਦਾ ਪ੍ਰਬੰਧ ਕਰੀਏ। ਅਸੀਂ ਲੋਕਾਂ ਨੂੰ ਅਪੀਲ ਕਰਦੇ ਹਾਂ ਕਿ ਉਹ ਆਪਣੇ ਘਰਾਂ ਦੀਆਂ ਛੱਤਾਂ, ਬਾਲਕੋਨੀ ਅਤੇ ਰੁੱਖਾਂ ਉੱਤੇ ਪਾਣੀ ਦੇ ਭਰੇ ਕਟੋਰੇ ਜ਼ਰੂਰ ਰੱਖਣ ਤਾਂ ਜੋ ਪੰਛੀਆਂ ਨੂੰ ਇਸ ਭਿਆਨਕ ਗਰਮੀ ਵਿੱਚ ਰਾਹਤ ਮਿਲ ਸਕੇ।”
ਇਸ ਮੁਹਿੰਮ ਦੌਰਾਨ 200 ਤੋਂ ਵੱਧ ਕਟੋਰੇ ਵੰਡੇ ਗਏ ਤਾਂ ਜੋ ਪੰਛੀ ਅਤੇ ਜਾਨਵਰ ਆਸਾਨੀ ਨਾਲ ਆਪਣੀ ਪਿਆਸ ਬੁਝਾ ਸਕਣ। ਇਸ ਮੌਕੇ ਸਕੂਲ ਦੇ ਪ੍ਰਿੰਸੀਪਲ ਜਤਿੰਦਰ ਗੁਪਤਾ, ਅਨਮੋਲ ਸ਼ਰਮਾ, ਜੈਵਿਨ ਗੁਪਤਾ, ਆਕਾਸ਼ ਮਿੱਤਲ, ਵਰਦਾਨ ਸਿੰਗਲਾ, ਅੰਕਿਤ ਗੋਯਲ, ਰੱਜਤ ਸਚਦੇਵਾ, ਪਰਵੀਨ ਸ਼ਰਮਾ, ਅਰਿਅਨ ਸ਼ਰਮਾ, ਹੇਮੰਤ ਸ਼ਰਮਾ ਅਤੇ ਆਕਾਸ਼ ਜੌਲੀ ਵੀ ਹਾਜ਼ਰ ਸਨ।
ਸੰਸਥਾ ਵੱਲੋਂ ਆਮ ਜਨਤਾ ਨੂੰ ਅਪੀਲ ਕੀਤੀ ਗਈ ਕਿ ਉਹ ਆਪਣੇ ਆਲੇ-ਦੁਆਲੇ ਵੱਧ ਤੋਂ ਵੱਧ ਪਾਣੀ ਦੇ ਭਾਂਡੇ ਰੱਖਣ ਅਤੇ ਉਨ੍ਹਾਂ ਵਿੱਚ ਰੋਜ਼ਾਨਾ ਸਾਫ਼ ਪਾਣੀ ਬਦਲਦੇ ਰਹਿਣ ਤਾਂ ਜੋ ਬੇਜ਼ੁਬਾਨ ਜੀਵਾਂ ਦੀ ਜ਼ਿੰਦਗੀ ਬਚਾਈ ਜਾ ਸਕੇ।