ਚੰਡੀਗੜ੍ਹ 'ਚ ਸ਼ਰਾਬ ਦੇ ਠੇਕਿਆਂ ਨੂੰ ਲੈ ਕੇ ਵੱਡੀ ਅਪਡੇਟ, ਪੜ੍ਹੋ ਕੀ ਹੈ ਪੂਰੀ ਖ਼ਬਰ

ਚੰਡੀਗੜ੍ਹ : ਚੰਡੀਗੜ੍ਹ 'ਚ ਸ਼ਰਾਬ ਦੇ ਠੇਕਿਆਂ ਦੀ ਨਿਲਾਮੀ ਚਾਰ ਵਾਰ ਹੋ ਚੁੱਕੀ ਹੈ ਪਰ ਸਾਰੇ ਠੇਕੇ ਹਾਲੇ ਤੱਕ ਨਹੀਂ ਵਿਕੇ ਹਨ। 11 ਠੇਕਿਆਂ ਨੂੰ ਲੈ ਕੇ ਹਾਲੇ ਤੱਕ ਕਿਸੇ ਨੇ ਬੋਲੀ ਨਹੀਂ ਲਾਈ ਹੈ। ਹੁਣ ਬਾਕੀ ਠੇਕਿਆਂ ਦੀ ਨਿਲਾਮੀ ਸੋਮਵਾਰ ਮਤਲਬ ਕਿ ਅੱਜ ਹੋਵੇਗੀ। 14 ਮਈ ਨੂੰ 17 ’ਚੋਂ ਸਿਰਫ਼ 6 ਠੇਕਿਆਂ ਦੀ ਨਿਲਾਮੀ ਹੋਈ। ਵਿਭਾਗ ਨੂੰ ਇਨ੍ਹਾਂ ਤੋਂ 24.32 ਕਰੋੜ ਰੁਪਏ ਦੀ ਤੈਅ ਕੀਮਤ ਮੁਕਾਬਲੇ 39.60 ਕਰੋੜ ਰੁਪਏ ਦੀ ਕਮਾਈ ਹੋਈ, ਜਦਕਿ 8 ਮਈ ਦੀ ਨਿਲਾਮੀ ’ਚ 21 ’ਚੋਂ 11 ਠੇਕਿਆਂ ਦੀ ਨਿਲਾਮੀ ਹੋਈ ਸੀ। ਵਿਭਾਗ ਨੂੰ 60.76 ਕਰੋੜ ਰੁਪਏ ਮਿਲੇ ਸਨ, ਜਦਕਿ ਰਿਜ਼ਰਵ ਕੀਮਤ 47.97 ਕਰੋੜ ਰੁਪਏ ਸੀ। ਹੁਣ ਵਿਭਾਗ ਨੇ ਸਕਿਓਰਟੀ ਮਨੀ ਜਮ੍ਹਾਂ ਨਾ ਕਰਵਾਉਣ ਵਾਲੇ ਠੇਕੇਦਾਰਾਂ ਤੇ ਕੰਪਨੀਆਂ ਨੂੰ ਬਲੈਕਲਿਸਟ ਕਰ ਦਿੱਤਾ ਹੈ। ਜਿਨ੍ਹਾਂ ਠੇਕਿਆਂ ਦੇ ਲਾਇਸੈਂਸ ਰੱਦ ਕੀਤੇ ਗਏ ਹਨ, ਉਨ੍ਹਾਂ 'ਚ ਸੈਕਟਰ-20 ਡੀ (ਵਿਜੇਂਦਰ), ਸੈਕਟਰ-22ਬੀ 2 (ਕਮਲ ਕਰਕੀ, ਅਜੇ ਮਹਿਰਾ), ਸੈਕਟਰ-22 ਸੀ 2 ਠੇਕੇ (ਕਮਲ ਕਾਰਕੀ, ਅਜੈ ਮਹਿਰਾ), ਇੰਡਸਟਰੀਅਲ ਏਰੀਆ ਫੇਜ਼-1 (ਨਿਸ਼ਾ ਕਾਰਕੀ) ਤੇ ਮਨੀਮਾਜਰਾ ਸ਼ਿਵਾਲਿਕ ਗਾਰਡਨ (ਨੀਰਜ ਸ਼ਰਮਾ) ਸ਼ਾਮਲ ਹਨ।

ਤੀਜੀ ਨਿਲਾਮੀ ’ਚ 28 ’ਚੋਂ ਸਿਰਫ਼ 7 ਠੇਕੇ ਹੋ ਸਕੇ ਸੀ ਨਿਲਾਮ
ਇਸ ਤੋਂ ਪਹਿਲਾਂ 29 ਅਪ੍ਰੈਲ ਨੂੰ ਤੀਜੀ ਨਿਲਾਮੀ ’ਚ 28 ’ਚੋਂ ਸਿਰਫ 7 ਠੇਕੇ ਦੀ ਨਿਲਾਮ ਹੋ ਸਕੇ ਸੀ। ਉੱਥੇ ਹੀ 21 ਅਪ੍ਰੈਲ ਨੂੰ 48 ਠੇਕਿਆਂ ਦੀ ਨਿਲਾਮੀ ਰੱਖੀ ਸੀ, ਜਿਨ੍ਹਾਂ ਦੇ ਲਾਈਸੈਂਸ ਬੈਂਕ ਗਾਰੰਟੀ ਨਾ ਜਮ੍ਹਾਂ ਕਰਨ ਕਾਰਨ ਰੱਦ ਕੀਤੇ ਗਏ ਸੀ ਪਰ ਹੁਣ ਵੀ ਸਿਰਫ਼ 20 ਠੇਕੇ ਹੀ ਵਿਕੇ ਸੀ। 21 ਮਾਰਚ ਨੂੰ ਸਭ ਤੋਂ ਵੱਡੀ ਨਿਲਾਮੀ ’ਚ 97 ’ਚੋਂ 96 ਦੀ ਨਿਲਾਮੀ ਸਫ਼ਲ ਰਹੀ ਸੀ, ਜਿਸ ਤੋਂ ਸਰਕਾਰ ਨੂੰ 606 ਕਰੋੜ ਰੁਪਏ ਦਾ ਆਮਦਨੀ ਹੋਈ ਸੀ।

ਬਕਾਇਆ ਵਸੂਲੀ ਦੇ ਨਿਰਦੇਸ਼
ਆਬਕਾਰੀ ਤੇ ਕਰ ਵਿਭਾਗ ਨੇ ਸਪੱਸ਼ਟ ਕੀਤਾ ਕਿ ਇਹ ਗੈਰ-ਜ਼ਿੰਮੇਵਾਰਾਨਾ ਰਵੱਈਆ ਨਿਲਾਮੀ ਪ੍ਰਕਿਰਿਆ ਨੂੰ ਪ੍ਰਭਾਵਿਤ ਤੇ ਬੋਲੀ ਦੀ ਪਾਰਦਰਸ਼ਤਾ ’ਤੇ ਸਵਾਲ ਖੜ੍ਹੇ ਕਰਦਾ ਹੈ। ਇਹੀ ਕਾਰਨ ਹੈ ਕਿ ਇਨ੍ਹਾਂ ਵਪਾਰੀਆਂ ਨੂੰ ਭਵਿੱਖ ’ਚ ਕਿਸੇ ਵੀ ਨਿਲਾਮੀ ’ਚ ਭਾਗ ਲੈਣ ਤੋਂ ਰੋਕ ਦਿੱਤਾ ਗਿਆ ਹੈ। ਇਸ ਤੋਂ ਇਲਾਵਾ ਹੋਰ ਸੂਬਿਆਂ ਤੇ ਕੇਂਦਰ ਸ਼ਾਸਤ ਪ੍ਰਦੇਸ਼ਾਂ ਨੂੰ ਵੀ ਕਾਰੋਬਾਰੀਆਂ ਨੂੰ ਬਲੈਕਲਿਸਟ ਕਰਨ ਤੇ ਬਕਾਇਆ ਵਸੂਲੀ ਦੇ ਨਿਰਦੇਸ਼ ਦਿੱਤੇ ਗਏ ਹਨ।