ਨਵੀਂ ਦਿੱਲੀ : ਕੇਂਦਰੀ ਜਾਂਚ ਬਿਊਰੋ (CBI) ਨੇ ਤਾਮਿਲਨਾਡੂ ਦੇ ਕਰੂਰ ਭਾਜੜ ਮਾਮਲੇ ਵਿੱਚ ਅਦਾਕਾਰ ਅਤੇ 'ਤਮਿਲਗਾ ਵੇਟਰੀ ਕਜ਼ਗਮ' (TVK) ਦੇ ਮੁਖੀ ਵਿਜੇ ਖ਼ਿਲਾਫ਼ ਸ਼ਿਕੰਜਾ ਕੱਸ ਦਿੱਤਾ ਹੈ। ਜਾਂਚ ਏਜੰਸੀ ਨੇ ਵਿਜੇ ਨੂੰ 15 ਮਾਰਚ ਨੂੰ ਪੁੱਛਗਿੱਛ ਲਈ ਦੁਬਾਰਾ ਤਲਬ ਕੀਤਾ ਹੈ। ਅਧਿਕਾਰੀਆਂ ਨੇ ਮੰਗਲਵਾਰ ਨੂੰ ਦੱਸਿਆ ਕਿ ਵਿਜੇ ਨੂੰ ਦਿੱਲੀ ਸਥਿਤ ਸੀ.ਬੀ.ਆਈ. ਹੈੱਡਕੁਆਰਟਰ ਵਿਖੇ ਪੇਸ਼ ਹੋਣ ਲਈ ਕਿਹਾ ਗਿਆ ਹੈ।
ਵਿਜੇ ਨੇ ਮੰਗਿਆ ਸੀ ਸਮਾਂ
ਜ਼ਿਕਰਯੋਗ ਹੈ ਕਿ ਸੀ.ਬੀ.ਆਈ. ਨੇ ਇਸ ਤੋਂ ਪਹਿਲਾਂ ਜਨਵਰੀ ਵਿੱਚ ਵਿਜੇ ਤੋਂ 2 ਵਾਰ ਪੁੱਛਗਿੱਛ ਕੀਤੀ ਸੀ। ਇਸ ਤੋਂ ਬਾਅਦ ਉਨ੍ਹਾਂ ਨੂੰ 9 ਮਾਰਚ ਨੂੰ ਫਿਰ ਸੱਦਿਆ ਗਿਆ ਸੀ, ਪਰ ਵਿਜੇ ਨੇ ਵਿਧਾਨ ਸਭਾ ਚੋਣਾਂ ਦੀ ਰੁਝੇਵਿਆਂ ਦਾ ਹਵਾਲਾ ਦਿੰਦੇ ਹੋਏ 15 ਦਿਨਾਂ ਦਾ ਸਮਾਂ ਮੰਗਿਆ ਸੀ। ਵਿਜੇ ਨੇ ਇਹ ਵੀ ਬੇਨਤੀ ਕੀਤੀ ਸੀ ਕਿ ਪੁੱਛਗਿੱਛ ਦਿੱਲੀ ਦੀ ਬਜਾਏ ਚੇਨਈ ਜਾਂ ਤਾਮਿਲਨਾਡੂ ਦੇ ਕਿਸੇ ਦਫ਼ਤਰ ਵਿੱਚ ਕੀਤੀ ਜਾਵੇ, ਪਰ ਸੀ.ਬੀ.ਆਈ. ਨੇ ਉਨ੍ਹਾਂ ਨੂੰ 15 ਮਾਰਚ ਨੂੰ ਦਿੱਲੀ ਹੀ ਤਲਬ ਕੀਤਾ ਹੈ।
ਵਿਧਾਇਕ ਸੇਂਥਿਲ ਬਾਲਾਜੀ ਨੂੰ ਵੀ ਸੰਮਨ
ਇਸੇ ਮਾਮਲੇ ਵਿੱਚ ਸੀ.ਬੀ.ਆਈ. ਨੇ ਡੀ.ਐਮ.ਕੇ. (DMK) ਵਿਧਾਇਕ ਸੇਂਥਿਲ ਬਾਲਾਜੀ ਨੂੰ ਵੀ 17 ਮਾਰਚ ਨੂੰ ਪੇਸ਼ ਹੋਣ ਲਈ ਕਿਹਾ ਹੈ। ਸਾਬਕਾ ਮੰਤਰੀ ਬਾਲਾਜੀ ਨੇ ਸੋਸ਼ਲ ਮੀਡੀਆ ਪਲੇਟਫਾਰਮ 'X' 'ਤੇ ਪੋਸਟ ਕਰਦਿਆਂ ਕਿਹਾ ਕਿ ਉਹ 17 ਮਾਰਚ ਨੂੰ ਸੀ.ਬੀ.ਆਈ. ਸਾਹਮਣੇ ਪੇਸ਼ ਹੋ ਕੇ ਕਰੂਰ ਭਾਜੜ ਤ੍ਰਾਸਦੀ ਬਾਰੇ ਆਪਣਾ ਪੱਖ ਰੱਖਣਗੇ।
ਕੀ ਸੀ ਮਾਮਲਾ?
ਸੁਪਰੀਮ ਕੋਰਟ ਦੇ ਹੁਕਮ ਤੋਂ ਬਾਅਦ ਸੀ. ਬੀ. ਆਈ. ਨੇ ਇਸ ਮਾਮਲੇ ਦੀ ਜਾਂਚ ਵਿਸ਼ੇਸ਼ ਜਾਂਚ ਟੀਮ (ਐੱਸ. ਆਈ. ਟੀ.) ਤੋਂ ਆਪਣੇ ਹੱਥਾਂ ’ਚ ਲੈ ਲਈ ਸੀ। ਸੀ. ਬੀ. ਆਈ. 27 ਸਤੰਬਰ 2025 ਨੂੰ ਤਮਿਲਨਾਡੂ ਦੇ ਕਰੂਰ ’ਚ ਵਿਜੇ ਦੀ ਰੈਲੀ ਦੌਰਾਨ ਮਚੀ ਭਾਜੜ ਨਾਲ ਸਬੰਧਤ ਸਬੂਤ ਜੁਟਾ ਰਹੀ ਹੈ। ਇਸ ਭਾਜੜ ’ਚ 41 ਲੋਕਾਂ ਦੀ ਮੌਤ ਹੋ ਗਈ ਸੀ ਅਤੇ 60 ਤੋਂ ਵੱਧ ਲੋਕ ਜ਼ਖਮੀ ਹੋਏ ਸਨ।