ਓਲੰਪਿਕ ਗੋਲਡ ਜਿੱਤਣਾ ਹੈ ਅਗਲਾ ਟੀਚਾ : ਸੂਰਿਆਕੁਮਾਰ

ਅਹਿਮਦਾਬਾਦ : ਭਾਰਤ ਨੂੰ ਉਸ ਦਾ ਤੀਜਾ ਟੀ-20 ਵਿਸ਼ਵ ਕੱਪ ਖ਼ਿਤਾਬ ਜਿਤਾਉਣ ਤੋਂ ਬਾਅਦ, ਕਪਤਾਨ ਸੂਰਿਆਕੁਮਾਰ ਯਾਦਵ ਨੇ ਹੁਣ ਆਪਣੇ ਅਗਲੇ ਵੱਡੇ ਮਿਸ਼ਨ ਦਾ ਐਲਾਨ ਕਰ ਦਿੱਤਾ ਹੈ। ਐਤਵਾਰ ਨੂੰ ਅਹਿਮਦਾਬਾਦ ਵਿੱਚ ਨਿਊਜ਼ੀਲੈਂਡ ਵਿਰੁੱਧ ਫਾਈਨਲ ਜਿੱਤਣ ਤੋਂ ਬਾਅਦ ਇੱਕ ਪ੍ਰੈੱਸ ਕਾਨਫਰੰਸ ਦੌਰਾਨ ਸੂਰਿਆਕੁਮਾਰ ਨੇ ਕਿਹਾ ਕਿ ਉਨ੍ਹਾਂ ਦਾ ਅਗਲਾ ਟੀਚਾ 2028 ਦੀਆਂ ਲਾਸ ਏਂਜਲਸ ਓਲੰਪਿਕ ਖੇਡਾਂ ਵਿੱਚ ਭਾਰਤ ਲਈ ਸੋਨ ਤਗਮਾ (Gold Medal) ਜਿੱਤਣਾ ਹੈ।

ਓਲੰਪਿਕ ਵਿੱਚ ਕ੍ਰਿਕਟ ਦੀ ਵਾਪਸੀ
ਜ਼ਿਕਰਯੋਗ ਹੈ ਕਿ ਪੈਰਿਸ 1900 ਓਲੰਪਿਕ ਤੋਂ ਬਾਅਦ ਪਹਿਲੀ ਵਾਰ ਅੰਤਰਰਾਸ਼ਟਰੀ ਓਲੰਪਿਕ ਕਮੇਟੀ (IOC) ਨੇ ਕ੍ਰਿਕਟ ਨੂੰ ਓਲੰਪਿਕ ਖੇਡਾਂ ਦਾ ਹਿੱਸਾ ਬਣਾਇਆ ਹੈ। ਸਾਲ 2028 ਵਿੱਚ 14 ਤੋਂ 29 ਜੁਲਾਈ ਦੇ ਵਿਚਕਾਰ ਹੋਣ ਵਾਲੇ ਇਹਨਾਂ ਮੁਕਾਬਲਿਆਂ ਵਿੱਚ ਪੁਰਸ਼ ਅਤੇ ਮਹਿਲਾ ਦੋਵਾਂ ਵਰਗਾਂ ਵਿੱਚ ਛੇ-ਛੇ ਟੀਮਾਂ ਮੈਡਲ ਲਈ ਭਿੜਨਗੀਆਂ। ਮੌਜੂਦਾ ਆਈਸੀਸੀ ਟੀ-20 ਰੈਂਕਿੰਗ ਦੇ ਆਧਾਰ 'ਤੇ ਭਾਰਤ ਦਾ ਏਸ਼ੀਆ ਤੋਂ ਕੁਆਲੀਫਾਈ ਕਰਨਾ ਲਗਭਗ ਤੈਅ ਹੈ। ਇਹ ਸਾਰੇ ਮੈਚ ਲਾਸ ਏਂਜਲਸ ਤੋਂ ਲਗਭਗ 50 ਕਿਲੋਮੀਟਰ ਦੂਰ ਪੋਮੋਨਾ ਸ਼ਹਿਰ ਦੇ ਫੇਅਰਗਰਾਉਂਡਸ ਸਟੇਡੀਅਮ ਵਿੱਚ ਖੇਡੇ ਜਾਣਗੇ।

2024 ਦੀ ਜਿੱਤ ਰਹੀ 'ਟਰਨਿੰਗ ਪੁਆਇੰਟ' 
ਆਪਣੇ ਸਫ਼ਰ ਬਾਰੇ ਗੱਲ ਕਰਦਿਆਂ ਸੂਰਿਆਕੁਮਾਰ ਯਾਦਵ ਨੇ ਕਿਹਾ ਕਿ ਪਿਛਲੇ ਇੱਕ ਮਹੀਨੇ ਦਾ ਸਫ਼ਰ ਬਹੁਤ ਸ਼ਾਨਦਾਰ ਰਿਹਾ ਹੈ। ਉਨ੍ਹਾਂ ਨੇ ਰੋਹਿਤ ਸ਼ਰਮਾ ਦੀ ਕਪਤਾਨੀ ਹੇਠ ਬਾਰਬਾਡੋਸ ਵਿੱਚ ਮਿਲੀ 2024 ਦੀ ਵਿਸ਼ਵ ਕੱਪ ਜਿੱਤ ਨੂੰ ਇੱਕ ਵੱਡਾ ਟਰਨਿੰਗ ਪੁਆਇੰਟ ਦੱਸਿਆ। ਸੂਰਿਆ ਅਨੁਸਾਰ, "ਅਸੀਂ 2024 ਵਿੱਚ ਇੱਕ ਵੱਖਰੀ ਤਰ੍ਹਾਂ ਦੀ ਕ੍ਰਿਕਟ ਖੇਡੀ ਅਤੇ ਉੱਥੋਂ ਹੀ ਅਸੀਂ ਸਮਝ ਗਏ ਕਿ ਇਸ ਟੀਮ ਨੇ ਅੱਗੇ ਕਿਵੇਂ ਕੰਮ ਕਰਨਾ ਹੈ। ਅਸੀਂ 2025 ਵਿੱਚ ਚੈਂਪੀਅਨਜ਼ ਟਰਾਫੀ ਜਿੱਤੀ ਅਤੇ ਹੁਣ 2026 ਵਿੱਚ ਆਪਣੇ ਘਰੇਲੂ ਦਰਸ਼ਕਾਂ ਦੇ ਸਾਹਮਣੇ ਕੁਝ ਖ਼ਾਸ (ਵਿਸ਼ਵ ਕੱਪ ਜਿੱਤ) ਕਰ ਵਿਖਾਇਆ ਹੈ।"

ਕਦੇ ਨਾ ਰੁਕਣ ਦਾ ਇਰਾਦਾ 
ਭਾਰਤੀ ਕਪਤਾਨ ਨੇ ਸਾਫ਼ ਕਰ ਦਿੱਤਾ ਕਿ ਉਹ ਜਿੱਤ ਦੇ ਇਸ ਸਿਲਸਿਲੇ ਨੂੰ ਰੋਕਣਾ ਨਹੀਂ ਚਾਹੁੰਦੇ। ਉਨ੍ਹਾਂ ਕਿਹਾ ਕਿ ਟੀਮ ਇੰਡੀਆ 2027, 2028 ਅਤੇ 2029 ਵਿੱਚ ਵੀ ਆਪਣਾ ਦਬਦਬਾ ਬਰਕਰਾਰ ਰੱਖਣਾ ਚਾਹੁੰਦੀ ਹੈ ਅਤੇ ਕਦੇ ਵੀ ਰੁਕਣਾ ਨਹੀਂ ਚਾਹੁੰਦੀ। ਭਾਰਤੀ ਪੁਰਸ਼ ਟੀਮ ਫਿਲਹਾਲ ਚੈਂਪੀਅਨਜ਼ ਟਰਾਫੀ ਅਤੇ ਟੀ-20 ਵਿਸ਼ਵ ਕੱਪ ਦੀ ਮੌਜੂਦਾ ਚੈਂਪੀਅਨ ਹੈ।