ਕੇਂਦਰੀ ਸੜਕ ਅਤੇ ਆਵਾਜਾਈ ਮੰਤਰੀ ਨਿਤਿਨ ਗਡਕਰੀ ਨੇ ਮੰਗਲਵਾਰ ਨੂੰ ਕਿਹਾ ਕਿ ਪੈਟਰੋਲ ਵਿਚ 20 ਫ਼ੀਸਦੀ ਇਥੇਨੋਲ ਮਿਲਾਉਣ ਨੂੰ ਲੈ ਕੇ ਵਿਰੋਧ ‘ਪੈਸੇ ਦੇ ਕੇ ਚਲਾਇਆ ਗਿਆ ਪ੍ਰੋਪੇਗੰਡਾ’ ਸੀ। ਸਰਕਾਰ ਵੱਲੋਂ ਕੇਂਦਰੀ ਮੋਟਰ ਵਾਹਨ ਨਿਯਮ, 1989 ਵਿਚ ਸੋਧਾਂ ਨੂੰ ਨੋਟੀਫਾਈ ਕੀਤੇ ਜਾਣ ਤੋਂ ਇਕ ਦਿਨ ਬਾਅਦ ਉਨ੍ਹਾਂ ਨੇ ਇਹ ਟਿੱਪਣੀ ਕੀਤੀ ਹੈ। ਇਨ੍ਹਾਂ ਸੋਧਾਂ ਤਹਿਤ ਈ100 (ਲੱਗਭਗ ਸ਼ੁੱਧ ਇਥੇਨੋਲ) ਤੱਕ ’ਤੇ ਚੱਲਣ ਵਾਲੇ ‘ਫਲੈਕਸ-ਫਿਊਲ’ ਵਾਹਨਾਂ ਨੂੰ ਮਨਜ਼ੂਰੀ ਦਿੱਤੀ ਗਈ ਹੈ।
ਭਾਰਤੀ ਉਦਯੋਗ ਸੰਘ (ਸੀ. ਆਈ. ਆਈ.) ਵੱਲੋਂ ਕਰਵਾਏ ਗਏ ਇਕ ਪ੍ਰੋਗਰਾਮ ਨੂੰ ਸੰਬੋਧਨ ਕਰਦਿਆਂ ਗਡਕਰੀ ਨੇ ਕਿਹਾ ਕਿ ਜੈਵਿਕ ਈਂਧਨ ( ਕੋਲਾ, ਕੱਚਾ ਤੇਲ ਆਦਿ) ਦੀ ਦਰਾਮਦ ਘਟਾ ਕੇ ਭਾਰਤ ਕੀਮਤੀ ਵਿਦੇਸ਼ੀ ਮੁਦਰਾ ਬਚਾ ਸਕਦਾ ਹੈ। ਉਨ੍ਹਾਂ ਕਿਹਾ ਕਿ ਤਿੰਨ ਮਹੀਨੇ ਪਹਿਲਾਂ ਈ20 (20 ਫ਼ੀਸਦੀ ਇਥੇਨੋਲ ਮਿਸ਼ਰਤ ਪੈਟਰੋਲ) ਈਂਧਨ ਦੇ ਖ਼ਿਲਾਫ਼ ਕਾਫ਼ੀ ਰੌਲਾ ਪਾਇਆ ਗਿਆ ਸੀ। ਹੁਣ ਈ20 ਈਂਧਨ ਨੂੰ ਲੈ ਕੇ ਨਾਰਾਜ਼ਗੀ ਖ਼ਤਮ ਹੋ ਗਈ ਹੈ... ਇਹ ਪੈਸੇ ਦੇ ਕੇ ਚਲਾਈ ਗਈ ਮੁਹਿੰਮ ਸੀ।
ਗਡਕਰੀ ਨੇ ਕਿਹਾ ਕਿ ਪਿਛਲੇ ਤਿੰਨ ਸਾਲਾਂ ਤੋਂ 20 ਕਰੋੜ ਤੋਂ ਵੱਧ ਦੋਪਹੀਆ ਵਾਹਨ ਅਤੇ 3 ਕਰੋੜ ਤੋਂ ਵੱਧ ਪੈਟਰੋਲ ਕਾਰਾਂ ਈ19-20 ਮਿਸ਼ਰਣ ਵਾਲੇ ਈਂਧਨ ’ਤੇ ਚੱਲ ਰਹੀਆਂ ਹਨ। ਇਥੇਨੋਲ ਮਿਸ਼ਰਣ ਕਾਰਨ ਵੱਡੇ ਪੱਧਰ ’ਤੇ ਇੰਜਣ ਖ਼ਰਾਬ ਹੋਣ ਜਾਂ ਵਾਹਨ ਬੰਦ ਪੈਣ ਦਾ ਕੋਈ ਪ੍ਰਮਾਣਿਤ ਸਬੂਤ ਨਹੀਂ ਮਿਲਿਆ ਹੈ। ਈ20 ਪੈਟਰੋਲ (80 ਫ਼ੀਸਦੀ ਪੈਟਰੋਲ ਅਤੇ 20 ਫ਼ੀਸਦੀ ਇਥੇਨੋਲ) ਦੀ ਸ਼ੁਰੂਆਤ ਦੀ ਵਿਰੋਧੀ ਧਿਰਾਂ ਅਤੇ ਕੁਝ ਖਪਤਕਾਰ ਸਮੂਹਾਂ ਨੇ ਆਲੋਚਨਾ ਕੀਤੀ ਸੀ।