ਨਵੀਂ ਦਿੱਲੀ/ਦੁਬਈ : ਦੋ ਵਾਰ ਦੀ ਓਲੰਪਿਕ ਤਗਮਾ ਜੇਤੂ ਪੀ.ਵੀ. ਸਿੰਧੂ ਅਤੇ ਉਨ੍ਹਾਂ ਦੇ ਕੋਚ ਇਰਵਾਂਸਯਾਹ ਆਦਿ ਪ੍ਰਤਾਮਾ ਉਸ ਸਮੇਂ ਵਾਲ-ਵਾਲ ਬਚ ਗਏ, ਜਦੋਂ ਆਲ ਇੰਗਲੈਂਡ ਚੈਂਪੀਅਨਸ਼ਿਪ ਲਈ ਬਰਮਿੰਘਮ ਜਾਂਦੇ ਸਮੇਂ ਦੁਬਈ ਅੰਤਰਰਾਸ਼ਟਰੀ ਹਵਾਈ ਅੱਡੇ 'ਤੇ ਉਨ੍ਹਾਂ ਦੇ ਬਿਲਕੁਲ ਨੇੜੇ ਇੱਕ ਜ਼ਬਰਦਸਤ ਧਮਾਕਾ ਹੋਇਆ। ਪੱਛਮੀ ਏਸ਼ੀਆ ਵਿੱਚ ਵਧਦੇ ਤਣਾਅ ਅਤੇ ਈਰਾਨ 'ਤੇ ਹੋਏ ਮਿਜ਼ਾਈਲ ਹਮਲਿਆਂ ਕਾਰਨ ਦੁਬਈ ਹਵਾਈ ਅੱਡੇ 'ਤੇ ਸਾਰੀਆਂ ਉਡਾਣਾਂ ਅਣਮਿੱਥੇ ਸਮੇਂ ਲਈ ਮੁਅੱਤਲ ਕਰ ਦਿੱਤੀਆਂ ਗਈਆਂ ਹਨ, ਜਿਸ ਕਾਰਨ ਸਿੰਧੂ ਉੱਥੇ ਹੀ ਫਸ ਗਈ ਹੈ।
ਸਿੰਧੂ ਨੇ ਸੁਣਾਈ ਹੱਡ-ਬੀਤੀ: 'ਹਰ ਘੰਟਾ ਹੋ ਰਿਹਾ ਡਰਾਉਣਾ'
ਪੀ.ਵੀ. ਸਿੰਧੂ ਨੇ ਸੋਸ਼ਲ ਮੀਡੀਆ ਪਲੇਟਫਾਰਮ 'ਐਕਸ' (X) 'ਤੇ ਇਸ ਖੌਫ਼ਨਾਕ ਮੰਜ਼ਰ ਬਾਰੇ ਦੱਸਦਿਆਂ ਲਿਖਿਆ ਕਿ ਹਾਲਾਤ ਹਰ ਘੰਟੇ ਡਰਾਉਣੇ ਹੁੰਦੇ ਜਾ ਰਹੇ ਹਨ। ਉਨ੍ਹਾਂ ਦੱਸਿਆ ਕਿ ਜਿੱਥੇ ਉਹ ਰੁਕੇ ਹੋਏ ਸਨ, ਉਸ ਦੇ ਬਿਲਕੁਲ ਨੇੜੇ ਧਮਾਕਾ ਹੋਇਆ। ਸਿੰਧੂ ਨੇ ਲਿਖਿਆ, "ਮੇਰੇ ਕੋਚ ਨੂੰ ਉਸ ਥਾਂ ਤੋਂ ਤੁਰੰਤ ਭੱਜਣਾ ਪਿਆ ਕਿਉਂਕਿ ਉਹ ਧੂਏਂ ਅਤੇ ਮਲਬੇ ਦੇ ਸਭ ਤੋਂ ਨੇੜੇ ਸਨ। ਇਹ ਸਾਡੇ ਸਾਰਿਆਂ ਲਈ ਬੇਹੱਦ ਤਣਾਅਪੂਰਨ ਅਤੇ ਡਰਾਉਣਾ ਪਲ ਸੀ"। ਫਿਲਹਾਲ ਸਿੰਧੂ ਅਤੇ ਉਨ੍ਹਾਂ ਦੇ ਕੋਚ ਨੂੰ ਇੱਕ ਹੋਟਲ ਵਿੱਚ ਰੱਖਿਆ ਗਿਆ ਹੈ ਅਤੇ ਉਹ ਠੀਕ ਹਨ, ਪਰ ਮੌਜੂਦਾ ਸਥਿਤੀ ਕਾਰਨ ਚਿੰਤਤ ਹਨ।
ਉਡਾਣਾਂ ਰੱਦ ਹੋਣ ਕਾਰਨ ਖਿਡਾਰੀ ਪ੍ਰੇਸ਼ਾਨ
ਖਾੜੀ ਖੇਤਰ ਵਿੱਚ ਹਵਾਈ ਰਸਤੇ ਬੰਦ ਹੋਣ ਕਾਰਨ ਏਅਰ ਇੰਡੀਆ ਨੇ ਦੁਬਈ, ਅਬੂ ਧਾਬੀ, ਦੋਹਾ ਅਤੇ ਜੇੱਦਾ ਸਮੇਤ ਕਈ ਸ਼ਹਿਰਾਂ ਦੀਆਂ ਉਡਾਣਾਂ ਰੱਦ ਕਰ ਦਿੱਤੀਆਂ ਹਨ। ਭਾਰਤ ਦੀ ਇੱਕ ਹੋਰ ਨੌਜਵਾਨ ਖਿਡਾਰਨ ਉਨਤੀ ਹੁੱਡਾ ਵੀ ਬਰਮਿੰਘਮ ਲਈ ਉਡਾਣ ਰੱਦ ਹੋਣ ਕਾਰਨ ਅਜੇ ਵੀ ਭਾਰਤ ਵਿੱਚ ਹੀ ਹੈ। ਹਾਲਾਂਕਿ, ਸਾਤਵਿਕਸਾਈਰਾਜ ਰੰਕੀਰੇਡੀ, ਚਿਰਾਗ ਸ਼ੈੱਟੀ ਅਤੇ ਲਕਸ਼ੈ ਸੇਨ ਵਰਗੇ ਖਿਡਾਰੀ ਪਹਿਲਾਂ ਹੀ ਬਰਮਿੰਘਮ ਪਹੁੰਚ ਚੁੱਕੇ ਹਨ।
ਬੈਡਮਿੰਟਨ ਸੰਘ ਵੱਲੋਂ ਮਦਦ ਦੀ ਕੋਸ਼ਿਸ਼
ਭਾਰਤੀ ਬੈਡਮਿੰਟਨ ਸੰਘ (BAI) ਦੇ ਸਕੱਤਰ ਸੰਜੇ ਮਿਸ਼ਰਾ ਨੇ ਦੱਸਿਆ ਕਿ ਉਹ ਲਗਾਤਾਰ ਸੰਪਰਕ ਵਿੱਚ ਹਨ ਅਤੇ ਵਿਸ਼ਵ ਬੈਡਮਿੰਟਨ ਸੰਘ (BWF) ਨਾਲ ਗੱਲ ਕਰ ਰਹੇ ਹਨ ਤਾਂ ਜੋ ਸਿੰਧੂ ਦੇ ਮੈਚ, ਜੋ ਕਿ ਬੁੱਧਵਾਰ ਨੂੰ ਹੋਣੇ ਹਨ, ਸ਼ਾਇਦ ਕੁਝ ਦੇਰ ਨਾਲ ਕਰਵਾਏ ਜਾ ਸਕਣ। ਕੋਚ ਇਰਵਾਂਸਯਾਹ ਨੇ ਉਮੀਦ ਜਤਾਈ ਹੈ ਕਿ ਉਹ ਜਲਦੀ ਹੀ ਉਡਾਣ ਭਰ ਸਕਣਗੇ ਕਿਉਂਕਿ ਟੂਰਨਾਮੈਂਟ ਮੰਗਲਵਾਰ ਤੋਂ ਸ਼ੁਰੂ ਹੋਣਾ ਹੈ।