ਟੀ-20 ਵਿਸ਼ਵ ਕੱਪ 2026 ਲਈ ਵੈਸਟਇੰਡੀਜ਼ ਕ੍ਰਿਕਟ ਬੋਰਡ (CWI) ਨੇ ਆਪਣੀ 15 ਮੈਂਬਰੀ ਟੀਮ ਦਾ ਐਲਾਨ ਕਰ ਦਿੱਤਾ ਹੈ। ਇਸ ਸਕੁਐਡ ਵਿੱਚ ਤਜ਼ਰਬੇਕਾਰ ਖਿਡਾਰੀਆਂ ਦੀ ਵਾਪਸੀ ਨੇ ਸਭ ਦਾ ਧਿਆਨ ਖਿੱਚਿਆ ਹੈ, ਖਾਸ ਕਰਕੇ ਜੇਸਨ ਹੋਲਡਰ ਅਤੇ ਰੋਵਮੈਨ ਪੌਵੇਲ ਦੀ ਵਾਪਸੀ ਟੀਮ ਲਈ ਵੱਡਾ ਹੁਲਾਰਾ ਮੰਨੀ ਜਾ ਰਹੀ ਹੈ। ਟੂਰਨਾਮੈਂਟ ਦੀ ਸ਼ੁਰੂਆਤ 7 ਫਰਵਰੀ ਤੋਂ ਹੋਵੇਗੀ ਅਤੇ ਵੈਸਟਇੰਡੀਜ਼ ਆਪਣਾ ਪਹਿਲਾ ਮੁਕਾਬਲਾ ਕੋਲਕਾਤਾ ਦੇ ਈਡਨ ਗਾਰਡਨਜ਼ ਵਿੱਚ ਸਕੌਟਲੈਂਡ ਵਿਰੁੱਧ ਖੇਡੇਗਾ।
ਟੀਮ ਵਿਚ ਨੌਜਵਾਨ ਅਤੇ ਤਜ਼ਰਬੇਕਾਰ ਖਿਡਾਰੀਆਂ ਦਾ ਸੁਮੇਲ
ਟੀਮ ਦੀ ਕਮਾਨ ਸ਼ਾਈ ਹੋਪ ਦੇ ਹੱਥਾਂ ਵਿੱਚ ਹੋਵੇਗੀ। ਚੋਣਕਾਰਾਂ ਨੇ ਕੈਰੇਬੀਅਨ ਪ੍ਰੀਮੀਅਰ ਲੀਗ (CPL) ਵਿੱਚ ਸ਼ਾਨਦਾਰ ਪ੍ਰਦਰਸ਼ਨ ਕਰਨ ਵਾਲੇ ਨੌਜਵਾਨ ਬੱਲੇਬਾਜ਼ ਕੁਵੈਂਟਿਨ ਸੈਂਪਸਨ ਨੂੰ ਟੀਮ ਵਿੱਚ ਸ਼ਾਮਲ ਕਰਕੇ ਵੱਡਾ ਦਾਅ ਖੇਡਿਆ ਹੈ। ਸੈਂਪਸਨ ਨੇ ਸੀਪੀਐਲ 2025 ਵਿੱਚ 151.57 ਦੇ ਸਟ੍ਰਾਈਕ ਰੇਟ ਨਾਲ 241 ਦੌੜਾਂ ਬਣਾਈਆਂ ਸਨ। ਇਸ ਤੋਂ ਇਲਾਵਾ ਰੋਸਟਨ ਚੇਸ, ਅਕੀਲ ਹੋਸੈਨ, ਸ਼ੇਰਫੇਨ ਰਦਰਫੋਰਡ ਅਤੇ ਰੋਮਾਰੀਓ ਸ਼ੈਫਰਡ ਦੀ ਵੀ ਟੀਮ ਵਿੱਚ ਵਾਪਸੀ ਹੋਈ ਹੈ।
ਗੇਂਦਬਾਜ਼ੀ ਵਿਭਾਗ ਅਤੇ ਸੱਟਾਂ ਦੀ ਚਿੰਤਾ
ਤੇਜ਼ ਗੇਂਦਬਾਜ਼ੀ ਦੀ ਅਗਵਾਈ ਸ਼ਮਾਰ ਜੋਸੇਫ ਕਰਨਗੇ, ਜਿਨ੍ਹਾਂ ਦਾ ਸਾਥ ਜੇਸਨ ਹੋਲਡਰ, ਮੈਥਿਊ ਫੋਰਡ ਅਤੇ ਜੇਡਨ ਸੀਲਸ ਦੇਣਗੇ। ਸਪਿਨ ਵਿਭਾਗ ਵਿੱਚ ਅਕੀਲ ਹੋਸੈਨ, ਗੁਡਾਕੇਸ਼ ਮੋਤੀ ਅਤੇ ਰੋਸਟਨ ਚੇਸ ਅਹਿਮ ਭੂਮਿਕਾ ਨਿਭਾਉਣਗੇ। ਹਾਲਾਂਕਿ, ਸੱਟਾਂ ਕਾਰਨ ਐਵਿਨ ਲੁਈਸ ਅਤੇ ਅਲਜ਼ਾਰੀ ਜੋਸੇਫ ਨੂੰ ਟੀਮ ਵਿੱਚ ਜਗ੍ਹਾ ਨਹੀਂ ਮਿਲ ਸਕੀ।
ਟੀ-20 ਵਿਸ਼ਵ ਕੱਪ 2026 ਲਈ ਵੈਸਟਇੰਡੀਜ਼ ਦੀ ਟੀਮ
ਸ਼ਾਈ ਹੋਪ (ਕਪਤਾਨ), ਸ਼ਿਮਰੋਨ ਹੇਟਮਾਇਰ, ਜੌਨਸਨ ਚਾਰਲਸ, ਬ੍ਰੈਂਡਨ ਕਿੰਗ, ਰੋਸਟਨ ਚੇਸ, ਜੇਸਨ ਹੋਲਡਰ, ਰੋਵਮੈਨ ਪੌਵੇਲ, ਸ਼ੇਰਫੇਨ ਰਦਰਫੋਰਡ, ਰੋਮਾਰੀਓ ਸ਼ੈਫਰਡ, ਕੁਵੈਂਟਿਨ ਸੈਂਪਸਨ, ਅਕੀਲ ਹੋਸੈਨ, ਗੁਡਾਕੇਸ਼ ਮੋਤੀ, ਸ਼ਮਾਰ ਜੋਸੇਫ, ਜੇਡਨ ਸੀਲਸ ਅਤੇ ਮੈਥਿਊ ਫੋਰਡ
ਗਰੁੱਪ ਅਤੇ ਸ਼ਡਿਊਲ
ਵੈਸਟਇੰਡੀਜ਼ ਨੂੰ ਗਰੁੱਪ-ਸੀ ਵਿੱਚ ਰੱਖਿਆ ਗਿਆ ਹੈ, ਜਿੱਥੇ ਉਸ ਦੇ ਨਾਲ ਇੰਗਲੈਂਡ, ਸਕਾਟਲੈਂਡ, ਨੇਪਾਲ ਅਤੇ ਇਟਲੀ ਦੀਆਂ ਟੀਮਾਂ ਹਨ। ਜ਼ਿਕਰਯੋਗ ਹੈ ਕਿ ਵੈਸਟਇੰਡੀਜ਼ ਨੇ ਆਪਣਾ ਪਿਛਲਾ ਵਿਸ਼ਵ ਕੱਪ ਖਿਤਾਬ ਵੀ ਈਡਨ ਗਾਰਡਨਜ਼ ਦੇ ਮੈਦਾਨ 'ਤੇ ਹੀ ਜਿੱਤਿਆ ਸੀ।