ਲਾਹੌਰ : ਪਾਕਿਸਤਾਨ ਸੁਪਰ ਲੀਗ (PSL) 2026 ਦੇ ਆਯੋਜਨ ਨੂੰ ਲੈ ਕੇ ਵੱਡੀਆਂ ਮੁਸ਼ਕਲਾਂ ਸਾਹਮਣੇ ਆ ਰਹੀਆਂ ਹਨ। ਖਿਡਾਰੀਆਂ ਵੱਲੋਂ ਆਪਣੇ ਨਾਮ ਵਾਪਸ ਲੈਣ ਅਤੇ ਕਈ ਦੇਸ਼ਾਂ ਵੱਲੋਂ ਜਾਰੀ ਕੀਤੀਆਂ ਗਈਆਂ 'ਟ੍ਰੈਵਲ ਐਡਵਾਈਜ਼ਰੀਆਂ' (Travel Advisories) ਕਾਰਨ ਹੁਣ ਇਹ ਟੂਰਨਾਮੈਂਟ ਬਹੁਤ ਹੀ ਸੀਮਤ ਦਾਇਰੇ ਵਿੱਚ ਕਰਵਾਇਆ ਜਾਵੇਗਾ। ਪੀਐਸਐਲ ਦੇ ਸਾਰੇ ਮੈਚ ਹੁਣ ਸਿਰਫ਼ ਲਾਹੌਰ ਅਤੇ ਕਰਾਚੀ ਤੱਕ ਹੀ ਸੀਮਤ ਰਹਿਣਗੇ।
ਬੰਦ ਦਰਵਾਜ਼ਿਆਂ ਪਿੱਛੇ ਹੋਣਗੇ ਮੈਚ
ਪੱਛਮੀ ਏਸ਼ੀਆ ਵਿੱਚ ਚੱਲ ਰਹੇ ਵਿਵਾਦ ਅਤੇ ਸੁਰੱਖਿਆ ਕਾਰਨਾਂ ਦੇ ਜਵਾਬ ਵਿੱਚ ਆਯੋਜਕਾਂ ਨੇ ਆਪਣੇ ਪਲਾਨ ਵਿੱਚ ਵੱਡੀ ਕਟੌਤੀ ਕੀਤੀ ਹੈ। ਇਹ ਫੈਸਲਾ ਲਿਆ ਗਿਆ ਹੈ ਕਿ ਸਾਰੇ ਮੈਚ ਦਰਸ਼ਕਾਂ ਦੇ ਬਿਨਾਂ (ਖਾਲੀ ਸਟੇਡੀਅਮਾਂ ਵਿੱਚ) ਖੇਡੇ ਜਾਣਗੇ। ਜਦੋਂ ਤੱਕ ਮੌਜੂਦਾ ਗਲੋਬਲ ਹਾਲਾਤ ਬਣੇ ਰਹਿਣਗੇ, ਉਦੋਂ ਤੱਕ ਇਹ ਮੁਕਾਬਲੇ ਬੰਦ ਦਰਵਾਜ਼ਿਆਂ ਪਿੱਛੇ ਹੀ ਕਰਵਾਏ ਜਾਣਗੇ।
ਓਪਨਿੰਗ ਸੈਰੇਮਨੀ ਰੱਦ, 26 ਮਾਰਚ ਤੋਂ ਹੋਵੇਗਾ ਆਗਾਜ਼
ਪੀਸੀਬੀ (PCB) ਦੇ ਚੇਅਰਮੈਨ ਮੋਹਸਿਨ ਨਕਵੀ ਨੇ ਦੱਸਿਆ ਕਿ ਪਾਕਿਸਤਾਨ ਸੁਪਰ ਲੀਗ ਬਾਰੇ ਪ੍ਰਧਾਨ ਮੰਤਰੀ ਅਤੇ ਸਬੰਧਤ ਸੁਰੱਖਿਆ ਸੰਸਥਾਵਾਂ ਨਾਲ ਲੰਬੀ ਗੱਲਬਾਤ ਤੋਂ ਬਾਅਦ ਇਹ ਫੈਸਲਾ ਲਿਆ ਗਿਆ ਹੈ ਕਿ ਟੂਰਨਾਮੈਂਟ 26 ਮਾਰਚ ਤੋਂ ਸ਼ੁਰੂ ਹੋਵੇਗਾ। ਪਹਿਲਾਂ ਤੋਂ ਤੈਅ ਛੇ ਸ਼ਹਿਰਾਂ ਦਾ ਸ਼ਡਿਊਲ ਰੱਦ ਕਰ ਦਿੱਤਾ ਗਿਆ ਹੈ ਅਤੇ ਲੀਗ ਦੀ ਸ਼ੁਰੂਆਤ ਵਿੱਚ ਹੋਣ ਵਾਲੀ ਓਪਨਿੰਗ ਸੈਰੇਮਨੀ (Opening Ceremony) ਨੂੰ ਵੀ ਰੱਦ ਕਰ ਦਿੱਤਾ ਗਿਆ ਹੈ। ਟੂਰਨਾਮੈਂਟ ਦਾ ਨਵਾਂ ਅਤੇ ਬਦਲਿਆ ਹੋਇਆ ਸ਼ਡਿਊਲ ਜਲਦੀ ਹੀ ਘੋਸ਼ਿਤ ਕੀਤਾ ਜਾਵੇਗਾ।
ਸੁਰੱਖਿਆ ਚੁਣੌਤੀਆਂ ਅਤੇ ਖਿਡਾਰੀਆਂ ਦਾ ਰੁਖ
ਜ਼ਿਕਰਯੋਗ ਹੈ ਕਿ ਕਾਬੁਲ ਹਮਲੇ ਤੋਂ ਬਾਅਦ ਆਸਟ੍ਰੇਲੀਆਈ ਖਿਡਾਰੀਆਂ ਲਈ ਪਹਿਲਾਂ ਹੀ ਚੇਤਾਵਨੀ ਜਾਰੀ ਕੀਤੀ ਗਈ ਸੀ, ਜਿਸ ਕਾਰਨ ਲੀਗ 'ਤੇ ਸੁਰੱਖਿਆ ਦਾ ਸਾਇਆ ਮੰਡਰਾ ਰਿਹਾ ਸੀ। ਇਸ ਦੇ ਨਾਲ ਹੀ ਕੁਝ ਖਿਡਾਰੀਆਂ ਵੱਲੋਂ ਆਈਪੀਐਲ (IPL) ਲਈ ਪੀਐਸਐਲ ਛੱਡਣ ਵਰਗੇ ਮਾਮਲਿਆਂ ਕਾਰਨ ਵੀ ਵਿਵਾਦ ਪੈਦਾ ਹੋਏ ਹਨ।