ਅੱਜ 4 ਦਸੰਬਰ ਨੂੰ ਭਾਰਤੀ ਸਟਾਕ ਮਾਰਕੀਟ ਵਿਚ ਮਿਲਿਆ-ਜੁਲਿਆ ਰੁਝਾਨ ਦੇਖਣ ਨੂੰ ਮਿਲਿਆ ਹੈ। ਸ਼ੁਰੂਆਤੀ ਕਮਜ਼ੋਰੀ ਤੋਂ ਬਾਅਦ, ਬਾਜ਼ਾਰ ਨੇ ਤੇਜ਼ੀ ਰਫ਼ਤਾਰ ਫੜੀ ਅਤੇ ਪਿਛਲੇ ਚਾਰ ਦਿਨਾਂ ਦੀ ਗਿਰਾਵਟ ਨੂੰ ਬ੍ਰੇਕ ਲਗਾਉਣ 'ਚ ਕਾਮਯਾਬ ਰਿਹਾ। ਨਿਫਟੀ 50 ਅਤੇ ਸੈਂਸੈਕਸ ਦੋਵੇਂ ਹਰੇ ਨਿਆਨ 'ਤੇ ਬੰਦ ਹੋਏ । ਆਟੋ ਅਤੇ ਆਈਟੀ ਸਟਾਕਾਂ ਵਿੱਚ ਖਰੀਦਦਾਰੀ ਨੇ ਬਾਜ਼ਾਰ ਨੂੰ ਮਜ਼ਬੂਤੀ ਪ੍ਰਦਾਨ ਕੀਤੀ।
ਸ਼ੁਰੂਆਤੀ ਮਿੰਟਾਂ ਵਿੱਚ ਇਹ ਉਤਰਾਅ-ਚੜ੍ਹਾਅ ਵਿੱਚ ਰਿਹਾ ਪਰ ਬਾਅਦ ਵਿੱਚ ਸੰਭਲ ਗਿਆ
ਬੀਐਸਈ ਸੈਂਸੈਕਸ 158.51 ਅੰਕ ਭਾਵ 0.19% ਦੇ ਵਾਧੇ ਨਾਲ 85,265.32 ਦੇ ਪੱਧਰ 'ਤੇ ਬੰਦ ਹੋਇਆ ਹੈ। ਸੈਂਸੈਕਸ ਦੇ 19 ਸਟਾਕ ਵਾਧੇ ਨਾਲ ਅਤੇ 11 ਸਟਾਕ ਗਿਰਾਵਟ ਨਾਲ ਕਾਰੋਬਾਰ ਕਰਦੇ ਦੇਖੇ ਗਏ।
ਦੂਜੇ ਪਾਸ ਨੈਸ਼ਨਲ ਸਟਾਕ ਐਕਸਚੇਂਜ (ਐਨਐਸਈ) ਨਿਫਟੀ 50 ਵੀ ਗਿਰਾਵਟ ਨਾਲ 25,981 'ਤੇ ਖੁੱਲ੍ਹਿਆ। ਦਿਨ ਭਰ ਦੇ ਕਾਰੋਬਾਰ ਤੋਂ ਬਾਅਦ ਨਿਫਟੀ 47.75 ਅੰਕ ਭਾਵ 0.18% ਵਧ ਕੇ 26,033.75 'ਤੇ ਬੰਦ ਹੋਇਆ ਹੈ।
ਵਿਦੇਸ਼ੀ ਨਿਵੇਸ਼ਕਾਂ ਦੀ ਵਿਕਰੀ
ਇਸ ਦੌਰਾਨ, ਵਿਦੇਸ਼ੀ ਨਿਵੇਸ਼ਕਾਂ ਨੇ ਆਪਣੀ ਵਿਕਰੀ ਦਾ ਸਿਲਸਿਲਾ ਜਾਰੀ ਰੱਖਿਆ। ਉਨ੍ਹਾਂ ਨੇ ਬੁੱਧਵਾਰ ਨੂੰ 3,207 ਕਰੋੜ ਰੁਪਏ ਦੇ ਸ਼ੇਅਰ ਵੇਚੇ। ਪਿਛਲੇ ਪੰਜ ਸੈਸ਼ਨਾਂ ਵਿੱਚ, ਵਿਦੇਸ਼ੀ ਨਿਵੇਸ਼ਕਾਂ ਨੇ 13,071.4 ਕਰੋੜ ਰੁਪਏ ਦੇ ਭਾਰਤੀ ਸ਼ੇਅਰ ਵੇਚੇ ਹਨ। ਇਸ ਦੌਰਾਨ, ਘਰੇਲੂ ਸੰਸਥਾਗਤ ਨਿਵੇਸ਼ਕਾਂ (DIIs) ਨੇ ਕੱਲ੍ਹ 4,730.4 ਕਰੋੜ ਰੁਪਏ ਦੇ ਸ਼ੇਅਰ ਖਰੀਦੇ।
ਰੁਪਏ ਵਿੱਚ ਗਿਰਾਵਟ ਜਾਰੀ
ਵੀਰਵਾਰ ਨੂੰ ਰੁਪਿਆ ਇੱਕ ਨਵੇਂ ਰਿਕਾਰਡ ਹੇਠਲੇ ਪੱਧਰ 'ਤੇ ਖੁੱਲ੍ਹਿਆ। ਘਰੇਲੂ ਮੁਦਰਾ 22 ਪੈਸੇ ਡਿੱਗ ਕੇ 90.41 ਪ੍ਰਤੀ ਡਾਲਰ 'ਤੇ ਖੁੱਲ੍ਹੀ। ਬੁੱਧਵਾਰ ਨੂੰ ਰੁਪਿਆ 90 ਰੁਪਏ ਪ੍ਰਤੀ ਡਾਲਰ ਦੇ ਮਨੋਵਿਗਿਆਨਕ ਪੱਧਰ ਨੂੰ ਪਾਰ ਕਰ ਗਿਆ। ਪੂੰਜੀ ਦਾ ਲਗਾਤਾਰ ਬਾਹਰ ਨਿਕਲਣਾ, ਅਮਰੀਕਾ ਨਾਲ ਵਪਾਰਕ ਸੌਦੇ 'ਤੇ ਅਨਿਸ਼ਚਿਤਤਾ ਅਤੇ ਪਿਛਲੇ ਹਫ਼ਤੇ ਡਾਲਰ ਦੀ ਮਜ਼ਬੂਤ ਮੰਗ ਨੇ ਰੁਪਏ ਵਿੱਚ ਤੇਜ਼ੀ ਨਾਲ ਗਿਰਾਵਟ ਦਾ ਕਾਰਨ ਬਣਾਇਆ। ਭਾਰਤੀ ਰਿਜ਼ਰਵ ਬੈਂਕ (RBI) ਦੇ ਘੱਟ ਦਖ਼ਲ ਨੇ ਵੀ ਮੁਦਰਾ ਬਾਜ਼ਾਰ ਵਿਚ ਗਿਰਾਵਟ ਨੂੰ ਹਵਾ ਦਿੱਤੀ। ਇਸ ਸਾਲ ਡਾਲਰ ਦੇ ਮੁਕਾਬਲੇ ਰੁਪਿਆ 5% ਤੋਂ ਵੱਧ ਡਿੱਗ ਗਿਆ ਹੈ, ਜਿਸ ਨਾਲ ਇਹ ਸਭ ਤੋਂ ਖਰਾਬ ਪ੍ਰਦਰਸ਼ਨ ਕਰਨ ਵਾਲੀ ਏਸ਼ੀਆਈ ਮੁਦਰਾ ਬਣ ਗਈ ਹੈ। 80 ਤੋਂ 90 ਪ੍ਰਤੀ ਡਾਲਰ ਤੱਕ ਪਹੁੰਚਣ ਲਈ ਸਿਰਫ 773 ਵਪਾਰਕ ਸੈਸ਼ਨ ਲੱਗੇ।