ਪੁਣੇ : ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਮੰਗਲਵਾਰ ਨੂੰ ਕਿਹਾ ਕਿ ਸਾਲ 2014 ਤੋਂ ਪਹਿਲਾਂ ਦੇਸ਼ 'ਚ 248 ਕਿਲੋਮੀਟਰ ਲੰਬਾ ਮੈਟਰੋ ਨੈੱਟਵਰਕ ਸੰਚਾਲਨ 'ਚ ਸੀ, ਜਦੋਂ ਕਿ ਹੁਣ ਇਹ 1,200 ਕਿਲੋਮੀਟਰ ਹੋ ਗਿਆ ਹੈ। ਉਨ੍ਹਾਂ ਨੇ ਇਸ ਗੱਲ 'ਤੇ ਜ਼ੋਰ ਦਿੱਤਾ ਕਿ ਬਿਹਤਰ ਸ਼ਹਿਰੀ ਬੁਨਿਆਦੀ ਢਾਂਚਾ ਦੇਸ਼ ਦੇ ਆਰਥਿਕ ਵਿਕਾਸ ਨੂੰ ਤੇਜ਼ ਕਰੇਗਾ। ਵੀਡੀਓ ਕਾਨਫਰੰਸ ਰਾਹੀਂ ਪੁਣੇ ਮੈਟਰੋ ਲਾਈਨ 3 (ਪਿੰਕ ਲਾਈਨ) ਦਾ ਉਦਘਾਟਨ ਕਰਦੇ ਹੋਏ ਪੀਐੱਮ ਮੋਦੀ ਨੇ ਕਿਹਾ,"ਜਦੋਂ ਦੇਸ਼ ਨੇ 2014 'ਚ ਐੱਨਡੀਏ ਨੂੰ ਸੇਵਾ ਕਰਨ ਦਾ ਮੌਕਾ ਦਿੱਤਾ, ਤਾਂ ਅਸੀਂ ਸ਼ਹਿਰਾਂ 'ਚ ਰਹਿਣ ਵਾਲੇ ਮੱਧ ਵਰਗ ਲਈ ਜੀਵਨ ਨੂੰ ਆਸਾਨ ਅਤੇ ਆਵਾਜਾਈ ਨੂੰ ਪਹੁੰਚਯੋਗ ਬਣਾਉਣ ਦੇ ਸੰਕਲਪ ਨਾਲ ਕੰਮ ਸ਼ੁਰੂ ਕੀਤਾ।"
ਪੀਐੱਮ ਮੋਦੀ ਨੇ ਦੂਜੇ ਪੜਾਅ ਦੇ ਤਹਿਤ ਚਾਰ ਨਵੇਂ ਮੈਟਰੋ ਕੋਰੀਡੋਰਾਂ ਦਾ ਨੀਂਹ ਪੱਥਰ ਵੀ ਰੱਖਿਆ, ਜਿਸ 'ਚ ਲਗਭਗ 21,800 ਕਰੋੜ ਰੁਪਏ ਦਾ ਕੁੱਲ ਨਿਵੇਸ਼ ਸ਼ਾਮਲ ਹੈ। ਪੀਐੱਮ ਮੋਦੀ ਨੇ 23 ਕਿਲੋਮੀਟਰ ਲੰਬੀ 'ਪਿੰਕ ਲਾਈਨ' ਦਾ ਉਦਘਾਟਨ ਕੀਤਾ, ਜਿਸ ਨੂੰ 8,300 ਕਰੋੜ ਤੋਂ ਵੱਧ ਦੀ ਲਾਗਤ ਨਾਲ ਬਣਾਇਆ ਗਿਆ ਹੈ। ਇਹ ਕੋਰੀਡੋਰ ਹਿੰਜਵਾੜੀ ਆਈਟੀ ਹੱਬ ਨੂੰ ਜ਼ਿਲ੍ਹਾ ਅਦਾਲਤ ਮੈਟਰੋ ਸਟੇਸ਼ਨ ਨਾਲ ਜੋੜੇਗਾ। ਇਸ ਨਾਲ ਹਜ਼ਾਰਾਂ ਆਈਟੀ ਪੇਸ਼ੇਵਰਾਂ ਲਈ ਰੋਜ਼ਾਨਾ ਆਉਣ-ਜਾਣ ਦੀ ਸਹੂਲਤ, ਆਵਾਜਾਈ ਦੀ ਭੀੜ ਘਟਾਉਣ ਅਤੇ ਨਿੱਜੀ ਵਾਹਨਾਂ 'ਤੇ ਨਿਰਭਰਤਾ ਘਟਾਉਣ ਦੀ ਉਮੀਦ ਹੈ।
ਪਿੰਕ ਲਾਈਨ ਦਾ ਸੰਚਾਲਨ ਮਹਿਲਾ ਆਪਰੇਟਰਾਂ ਦੁਆਰਾ ਕੀਤਾ ਜਾਵੇਗਾ। ਇਸ ਦੀ ਬਿਜਲੀ ਦੀ ਲਗਭਗ 30 ਫੀਸਦੀ ਜ਼ਰੂਰਤਾਂ ਸੂਰਜੀ ਊਰਜਾ ਨਾਲ ਪੂਰੀਆਂ ਕੀਤੀਆਂ ਜਾਣਗੀਆਂ। ਪੀਐੱਮ ਮੋਦੀ ਨੇ ਪੁਣੇ ਮੈਟਰੋ ਦੇ ਦੂਜੇ ਪੜਾਅ ਦਾ ਨੀਂਹ ਪੱਥਰ ਵੀ ਰੱਖਿਆ, ਜਿਸ ਦੀ ਲਾਗਤ ਲਗਭਗ 13,500 ਕਰੋੜ ਰੁਪਏ ਹੋਣ ਦਾ ਅਨੁਮਾਨ ਹੈ। ਇਸ ਪੜਾਅ 'ਚ ਚਾਰ ਕੋਰੀਡੋਰ- ਲਾਈਨ 2A, 2B, 4, ਅਤੇ 4A - ਸ਼ਾਮਲ ਹੋਣਗੇ, ਜੋ ਸ਼ਹਿਰ ਦੇ ਪ੍ਰਮੁੱਖ ਰਿਹਾਇਸ਼ੀ, ਵਪਾਰਕ ਅਤੇ ਆਈਟੀ ਕੇਂਦਰਾਂ ਨੂੰ ਜੋੜਣਗੇ।