‘ਵਜ਼ੀਰਐਕਸ’ ਦੁਬਾਰਾ ਸ਼ੁਰੂ ਕਰੇਗਾ ਟ੍ਰੇਡਿੰਗ, ਇਕ ਸਾਲ ਬਾਅਦ ਵਾਪਸੀ ਨੂੰ ਤਿਆਰ

ਕ੍ਰਿਪਟੋ ਐਕਸਚੇਂਜ ਪਲੇਟਫਾਰਮ ਵਜ਼ੀਰਐਕਸ ਨੇ ਵੀਰਵਾਰ ਨੂੰ ਐਲਾਨ ਕੀਤਾ ਕਿ ਉਹ 24 ਅਕਤੂਬਰ ਤੋਂ ਆਪਣੇ ਪਲੇਟਫਾਰਮ ’ਤੇ ਟ੍ਰੇਡਿੰਗ ਦੁਬਾਰਾ ਸ਼ੁਰੂ ਕਰੇਗਾ। ਇਹ ਫੈਸਲਾ ਉਸ ਘਟਨਾ ਦੇ ਇਕ ਸਾਲ ਤੋਂ ਵੱਧ ਸਮਾਂ ਬਾਅਦ ਆਇਆ ਹੈ, ਜਦੋਂ ਕੰਪਨੀ ਨੂੰ ਇਕ ਵੱਡੇ ਸਾਈਬਰ ਹਮਲੇ ’ਚ ਕਰੀਬ 230 ਮਿਲੀਅਨ ਡਾਲਰ (ਲੱਗਭਗ 1,900 ਕਰੋੜ ਰੁਪਏ) ਦਾ ਨੁਕਸਾਨ ਹੋਇਆ ਸੀ। ਭਾਵ ਕੰਪਨੀ ਇਕ ਸਾਲ ਬਾਅਦ ਵਾਪਸੀ ਕਰਨ ਨੂੰ ਤਿਆਰ ਹੈ।

ਕੰਪਨੀ ਨੇ ਦੱਸਿਆ ਕਿ ਸਿੰਗਾਪੁਰ ਹਾਈ ਕੋਰਟ ਨੇ ਅਕਤੂਬਰ ’ਚ ਵਜ਼ੀਰਐਕਸ ਦੀ ‘ਸਕੀਮ ਆਫ ਅਰੇਂਜਮੈਂਟ’ ਨੂੰ ਮਨਜ਼ੂਰੀ ਦਿੱਤੀ ਹੈ। ਇਸ ਫੈਸਲੇ ਤੋਂ ਬਾਅਦ ਪਲੇਟਫਾਰਮ ਨੂੰ ਫਿਰ ਸੰਚਾਲਨ ਦੀ ਆਗਿਆ ਮਿਲੀ ਹੈ, ਜਿਸ ਨਾਲ ਲੱਖਾਂ ਯੂਜ਼ਰਜ਼ ਅਤੇ ਨਿਵੇਸ਼ਕਾਂ ਨੂੰ ਵੱਡੀ ਰਾਹਤ ਮਿਲੀ ਹੈ। ਅਦਾਲਤ ਦੀ ਇਹ ਮਨਜ਼ੂਰੀ ਕੰਪਨੀ ਦੇ ਮੁੜਗਠਨ ਅਤੇ ਸੰਚਾਲਨ ਨੂੰ ਕਾਨੂੰਨੀ ਮਾਨਤਾ ਪ੍ਰਦਾਨ ਕਰਦੀ ਹੈ।

ਵਜ਼ੀਰਐਕਸ ਨੇ ਕਿਹਾ ਕਿ ਉਹ ਟ੍ਰੇਡਿੰਗ ਨੂੰ ਹੌਲੀ-ਹੌਲੀ ਸ਼ੁਰੂ ਕਰੇਗਾ ਤਾਂਕਿ ਪਲੇਟਫਾਰਮ ਸੁਰੱਖਿਅਤ ਅਤੇ ਸਥਿਰ ਬਣਿਆ ਰਹੇ। 24 ਤੋਂ 27 ਅਕਤੂਬਰ ਤੱਕ 4 ਦਿਨਾਂ ਦੌਰਾਨ ਹਰ ਦਿਨ ਕਰੀਬ 25 ਫੀਸਦੀ ਟੋਕਣ ਨੂੰ ਟ੍ਰੇਡਿੰਗ ਲਈ ਖੋਲ੍ਹਿਆ ਜਾਵੇਗਾ। ਇਸ ਪ੍ਰਕਿਰਿਆ ਦੇ ਆਖਿਰ ਤੱਕ ਭਾਵ 27 ਅਕਤੂਬਰ ਤੱਕ ਪੂਰਾ ਪਲੇਟਫਾਰਮ ਪੂਰੀ ਤਰ੍ਹਾਂ ਐਕਟਿਵ ਹੋ ਜਾਵੇਗਾ।

ਕੰਪਨੀ ਨੇ ਇਹ ਵੀ ਐਲਾਨ ਕੀਤਾ ਹੈ ਕਿ ਪਹਿਲਾਂ 30 ਦਿਨਾਂ ਤੱਕ ਯੂਜ਼ਰਜ਼ ਤੋਂ ਕੋਈ ਟ੍ਰੇਡਿੰਗ ਫੀਸ ਨਹੀਂ ਲਈ ਜਾਵੇਗੀ। ਇਹ ਕਦਮ ਯੂਜ਼ਰਜ਼ ਨੂੰ ਪਲੇਟਫਾਰਮ ’ਤੇ ਵਾਪਸ ਲਿਆਉਣ ਅਤੇ ਭਰੋਸਾ ਬਹਾਲ ਕਰਨ ਦੀ ਦਿਸ਼ਾ ’ਚ ਇਕ ਮਹੱਤਵਪੂਰਨ ਪਹਿਲ ਦੇ ਰੂਪ ’ਚ ਵੇਖਿਆ ਜਾ ਰਿਹਾ ਹੈ।