ਸੁਨਾਮ (ਰਮੇਸ਼ ਗਰਗ) : ਗਾਂਧੀ ਜਯੰਤੀ ਦੇ ਉਪਲੱਖ ’ਤੇ ਸੁਨਾਮ ਵਿੱਚ ਦੇਸ਼ਭਗਤੀ ਅਤੇ ਸਵਦੇਸੀ ਜਜ਼ਬੇ ਨਾਲ ਭਰਪੂਰ ਇੱਕ ਵਿਸ਼ੇਸ਼ ਰੈਲੀ ਦਾ ਆਯੋਜਨ ਕੀਤਾ ਗਿਆ। ਇਸ ਰੈਲੀ ਦਾ ਮਕਸਦ ਲੋਕਾਂ ਵਿੱਚ ਖਾਦੀ ਦੇ ਮਹੱਤਵ ਨੂੰ ਉਜਾਗਰ ਕਰਨਾ ਅਤੇ ਦੇਸ਼ ਵਿੱਚ ਬਣੇ ਸਮਾਨ ਦੇ ਉਪਯੋਗ ਨੂੰ ਪ੍ਰੋਤਸਾਹਿਤ ਕਰਨਾ ਸੀ।
‘ਸਵਦੇਸੀ ਅਪਣਾਓ, ਖਾਦੀ ਖਰੀਦੋ, ਖਾਦੀ ਪਹਿਨੋ’ ਦੇ ਨਾਰਿਆਂ ਨਾਲ ਗੂੰਜ ਰਹੀ ਇਸ ਰੈਲੀ ਨੇ ਪੂਰੇ ਸ਼ਹਿਰ ਦਾ ਮਾਹੌਲ ਦੇਸ਼ਭਗਤੀ ਨਾਲ ਰੰਗ ਦਿੱਤਾ।
ਰੈਲੀ ਦੀ ਸ਼ੁਰੂਆਤ ਮਾਡਲ ਬੇਸਿਕ ਸਕੂਲ, ਸੁਨਾਮ ਤੋਂ ਹੋਈ, ਜਿੱਥੇ ਖਾਦੀ ਇੰਡੀਆ ਦੀ ਅਧਿਕਾਰੀ ਸ਼ਾਂਤਾ ਫੂਲ ਅਤੇ ਅਧਿਆਪਕਾ ਆਸ਼ਾ ਕਾਂਸਲ ਦੀ ਅਗੁਵਾਈ ਹੇਠ ਸੈਂਕੜੇ ਵਿਦਿਆਰਥੀ, ਸਮਾਜਿਕ ਸੰਗਠਨ, ਅਧਿਆਪਕ ਅਤੇ ਸਥਾਨਕ ਨਾਗਰਿਕ ਸ਼ਾਮਲ ਹੋਏ।
ਭਾਗੀਦਾਰਾਂ ਨੇ ਹੱਥਾਂ ਵਿੱਚ ਬੈਨਰ ਤੇ ਤਖ਼ਤੀਆਂ ਫੜ ਕੇ ਸ਼ਹਿਰ ਦੇ ਮੁੱਖ ਬਾਜ਼ਾਰਾਂ ਰਾਹੀਂ ਮਾਰਚ ਕੀਤਾ ਅਤੇ ਲੋਕਾਂ ਨੂੰ ਅਪੀਲ ਕੀਤੀ ਕਿ ਉਹ ਆਉਣ ਵਾਲੇ ਤਿਉਹਾਰੀ ਮੌਸਮ ਵਿੱਚ ਖਾਦੀ ਉਤਪਾਦਾਂ ਨੂੰ ਪਹਿਲ ਦੇਣ।
ਸ਼ਾਂਤਾ ਫੂਲ, ਖਾਦੀ ਇੰਡੀਆ ਅਧਿਕਾਰੀ ਨੇ ਕਿਹਾ,
“ਇਸ ਰੈਲੀ ਦਾ ਮਕਸਦ ਲੋਕਾਂ ਨੂੰ ਸਵਦੇਸੀ ਉਤਪਾਦਾਂ ਪ੍ਰਤੀ ਜਾਗਰੂਕ ਕਰਨਾ ਅਤੇ ਦੇਸ਼ ’ਚ ਬਣੇ ਕੱਪੜਿਆਂ ਦੇ ਪ੍ਰਯੋਗ ਨੂੰ ਵਧਾਵਾ ਦੇਣਾ ਹੈ। ਖਾਦੀ ਸਿਰਫ਼ ਕੱਪੜਾ ਨਹੀਂ, ਸਗੋਂ ਆਤਮਨਿਰਭਰਤਾ ਤੇ ਸਵਭਿਮਾਨ ਦਾ ਪ੍ਰਤੀਕ ਹੈ।”
ਅਧਿਆਪਕਾ ਆਸ਼ਾ ਮੈਡਮ ਨੇ ਕਿਹਾ,
“ਗਾਂਧੀ ਜਯੰਤੀ ਸਾਨੂੰ ਇਹ ਯਾਦ ਦਿਲਾਉਂਦੀ ਹੈ ਕਿ ਸਵਦੇਸੀ ਅਪਣਾਉਣਾ ਹੀ ਅਸਲੀ ਦੇਸ਼ਭਕਤੀ ਹੈ। ਵਿਦਿਆਰਥੀਆਂ ਨੂੰ ਖਾਦੀ ਦੀ ਮਹੱਤਤਾ ਬਾਰੇ ਜਾਗਰੂਕ ਕਰਨਾ ਸਮੇਂ ਦੀ ਲੋੜ ਹੈ।”
ਭਰੂਰ ਪਿੰਡ ਦੇ ਸਰਪੰਚ ਹਰਬੰਸ ਸਿੰਘ ਨੇ ਵੀ ਰੈਲੀ ਵਿੱਚ ਹਿੱਸਾ ਲਿਆ ਅਤੇ ਕਿਹਾ,
“ਖਾਦੀ ਸਾਡੇ ਦੇਸ਼ ਦੀ ਪਹਿਚਾਣ ਹੈ। ਇਸ ਨਾਲ ਲੱਖਾਂ ਬੁਨਕਰਾਂ ਅਤੇ ਕਾਰਿਗਰਾਂ ਦੀ ਰੋਜ਼ੀ-ਰੋਟੀ ਜੁੜੀ ਹੈ। ਅਸੀਂ ਖਾਦੀ ਨੂੰ ਅਪਣਾਕੇ ਦੇਸ਼ ਦੀ ਅਰਥਵਿਵਸਥਾ ਨੂੰ ਮਜ਼ਬੂਤ ਕਰ ਸਕਦੇ ਹਾਂ।”
ਰੈਲੀ ਵਿੱਚ ਵਿਦਿਆਰਥੀਆਂ ਨੇ ਉਤਸ਼ਾਹ ਨਾਲ ਭਾਗ ਲਿਆ ਅਤੇ ਨਾਰੇ ਲਗਾਏ —
‘ਖਾਦੀ ਸਾਡਾ ਮਾਨ ਹੈ’, ‘ਦੇਸੀ ਅਪਣਾਓ – ਦੇਸ਼ ਬਣਾਓ’।
ਇਸ ਮੌਕੇ ਤੇ ਆਯੋਜਕਾਂ ਨੇ ਕਿਹਾ ਕਿ ਖਾਦੀ ਅੰਦੋਲਨ ਸਿਰਫ਼ ਕੱਪੜੇ ਤੱਕ ਸੀਮਤ ਨਹੀਂ, ਸਗੋਂ ਇਹ ਆਤਮਨਿਰਭਰ ਭਾਰਤ ਦੀ ਦਿਸ਼ਾ ਵਿੱਚ ਇਕ ਵੱਡਾ ਕਦਮ ਹੈ। ਉਨ੍ਹਾਂ ਸਾਰੇ ਨਾਗਰਿਕਾਂ ਨੂੰ ਅਪੀਲ ਕੀਤੀ ਕਿ ਉਹ ਆਪਣੇ ਰੋਜ਼ਾਨਾ ਜੀਵਨ ਵਿੱਚ ਖਾਦੀ ਉਤਪਾਦਾਂ ਦਾ ਉਪਯੋਗ ਵਧਾਉਣ ਤੇ ‘ਵੋਕਲ ਫ਼ੋਰ ਲੋਕਲ’ ਦੀ ਭਾਵਨਾ ਨੂੰ ਅੱਗੇ ਲੈ ਜਾਣ।