ਸੁਨਾਮ (ਰਮੇਸ਼ ਗਰਗ) : ਰਾਸ਼ਟਰੀ ਸਵਯੰਸੇਵਕ ਸੰਘ ਸੁਨਾਮ ਨਗਰ ਵੱਲੋਂ ਸੰਘ ਦੇ ਸ਼ਤਾਬਦੀ ਵਰ੍ਹੇ ਦੇ ਉਪਲੱਖ ਵਿੱਚ ਇਸ ਸਾਲ ਦਾ ਵਿਜੈ ਦਸ਼ਮੀ ਉਤਸਵ ਦਾ ਸ਼ਾਨਦਾਰ ਆਯੋਜਨ ਕੀਤਾ ਜਾ ਰਿਹਾ ਹੈ। ਇਹ ਸਮਾਗਮ ਐਤਵਾਰ, 5 ਅਕਤੂਬਰ 2025 ਸਵੇਰੇ 10:30 ਵਜੇ ਸ਼ਿਵ ਨਿਕੇਤਨ ਧਰਮਸ਼ਾਲਾ, ਸਿਨੇਮਾ ਚੌਂਕ, ਸੁਨਾਮ ਵਿੱਚ ਹੋਵੇਗਾ।
ਨਗਰ ਕਾਰਜ਼ਵਾਹ ਮੁਕੇਸ਼ ਗੋਇਲ ਨੇ ਦੱਸਿਆ ਕਿ ਹਿੰਦੂ ਸਮਾਜ ਵਿੱਚ ਪੌਰੁਸ਼ ਅਤੇ ਸ਼ਕਤੀ ਦਾ ਜਾਗਰਣ ਵਿਜੈ ਦਸ਼ਮੀ ਦੇ ਪਾਵਨ ਪਵਿੱਤਰ ਦਿਨ ’ਤੇ ਹੁੰਦਾ ਹੈ। ਓਸੇ ਦਿਨ ਤੋਂ ਸੰਘ ਦੇ ਕਾਰਜ ਦੀ ਸ਼ੁਰੂਆਤ ਹੋਈ ਸੀ ਅਤੇ ਹੁਣ ਸੰਘ ਆਪਣੀ 100 ਸਾਲਾਂ ਦੀ ਗੌਰਵਮਈ ਯਾਤਰਾ ਪੂਰੀ ਕਰ ਰਿਹਾ ਹੈ। ਇਹ ਉਤਸਵ ਸਮਾਜ ਦੀ ਏਕਤਾ ਤੇ ਰਾਸ਼ਟਰੀ ਪੁਨਰਜਾਗਰਣ ਲਈ ਵਿਸ਼ੇਸ਼ ਮਹੱਤਵ ਰੱਖਦਾ ਹੈ।
ਇਸ ਮੌਕੇ ਸ਼੍ਰੀ ਸ਼੍ਰੀ 1008 ਮਹੰਤ ਸਵਾਮੀ ਦਾਮੋਦਰ ਸ਼ਰਨ ਦਾਸ ਜੀ ਮਹਾਰਾਜ (ਸੰਸਥਾਪਕ: ਸ਼੍ਰੀ ਮਹਾਰਿਸ਼ੀ ਬ੍ਰਹਮ ਹਰੀ ਉਦਾਸੀਨ ਆਸ਼ਰਮ) ਸਮਾਗਮ ਦੀ ਪ੍ਰਧਾਨਗੀ ਕਰਨਗੇ। ਡਾ. ਮੋਹਿਤ ਜਿੰਦਲ, ਡਾਇਰੈਕਟਰ ਜਿੰਦਲ ਮੈਡੀਹਾਰਟ ਹਸਪਤਾਲ, ਸੁਨਾਮ, ਮੁੱਖ ਮਹਿਮਾਨ ਵਜੋਂ ਸ਼ਿਰਕਤ ਕਰਨਗੇ। ਜਦਕਿ ਸ਼੍ਰੀ ਰਾਮ ਕੁਮਾਰ ਵਿਆਸ, ਪ੍ਰਾਂਤ ਸੰਯੋਜਕ, ਵਿਰਸਾ ਸੰਭਾਲ ਮੰਚ, ਪੰਜਾਬ ਸਮਾਗਮ ਦੇ ਮੁੱਖ ਵਕਤਾ ਹੋਣਗੇ। ਇਸ ਤੋਂ ਇਲਾਵਾ ਸ਼੍ਰੀ ਅਮਰ ਨਾਥ ਕਾਂਸਲ, ਨਗਰ ਸੰਘ ਚਾਲਕ, ਵਿਸ਼ੇਸ਼ ਤੌਰ ’ਤੇ ਮੌਜੂਦ ਰਹਿਣਗੇ।
ਪ੍ਰੋਗਰਾਮ ਦੇ ਬਾਅਦ ਸੀਤਾ ਮਾਤਾ ਦੀ ਰਸੋਈ ਦਾ ਪ੍ਰਸਾਦ ਵੀ ਵੰਡਿਆ ਜਾਵੇਗਾ। ਆਯੋਜਕਾਂ ਨੇ ਨਗਰ ਨਿਵਾਸੀਆਂ ਨੂੰ ਅਪੀਲ ਕੀਤੀ ਹੈ ਕਿ ਉਹ ਸਪਰਿਵਾਰ ਸਮੇਂ ਤੋਂ ਪਹਿਲਾਂ ਪਹੁੰਚ ਕੇ ਇਸ ਇਤਿਹਾਸਕ ਮੌਕੇ ਦੇ ਸਾਕਸ਼ੀ ਬਣਨ।