ਸ਼ੁਰੂ ਹੋਣ ਤੋਂ ਪਹਿਲਾਂ ਹੀ ਬਦਲਿਆ ਹਲਵਾਰਾ ਏਅਰਪੋਰਟ ਤੋਂ ਦਿੱਲੀ ਦੀ ਫਲਾਈਟ ਦਾ ਸ਼ਡਿਊਲ

ਲੁਧਿਆਣਾ : ਹਲਵਾਰਾ ਏਅਰਪੋਰਟ ਤੋਂ ਸ਼ੁਰੂ ਹੋਣ ਤੋਂ ਪਹਿਲਾਂ ਹੀ ਦਿੱਲੀ ਦੀ ਫਲਾਈਟ ਦਾ ਸ਼ਡਿਊਲ ਬਦਲ ਗਿਆ ਹੈ। ਇੱਥੇ ਦੱਸਣਾ ਉਚਿਤ ਹੋਵੇਗਾ ਕਿ ਪੀ. ਐੱਮ. ਮੋਦੀ ਵੱਲੋਂ 1 ਫਰਵਰੀ ਨੂੰ ਹਲਵਾਰਾ ਏਅਰਪੋਰਟ ਦਾ ਉਦਘਾਟਨ ਕੀਤਾ ਗਿਆ ਸੀ, ਜਿਸ ਤੋਂ ਬਾਅਦ ਕਦੇ ਮਾਰਚ ਤੇ ਕਦੇ ਅਪ੍ਰੈਲ ਵਿਚ ਫਲਾਈਟ ਸ਼ੁਰੂ ਹੋਣ ਦੇ ਦਾਅਵੇ ਕੀਤੇ ਗਏ ਪਰ ਦੋ ਮਹੀਨੇ ਬਾਅਦ ਇਸ ਮੁੱਦੇ ’ਤੇ ਸਸਪੈਂਸ ਖਤਮ ਹੋ ਗਿਆ ਹੈ। ਇਸ ਤਹਿਤ ਏਅਰ ਇੰਡੀਆ ਵੱਲੋਂ 15 ਮਈ ਤੋਂ ਦਿੱਲੀ ਆਉਣ ਜਾਣ ਲਈ 2 ਫਲਾਈਟਾਂ ਦਾ ਸ਼ਡਿਊਲ ਜਾਰੀ ਕੀਤਾ ਗਿਆ ਹੈ।

ਹਾਲਾਂਕਿ ਇਸ ਫਲਾਈਟ ਦੇ ਲਈ ਬੁਕਿੰਗ 1 ਅਪ੍ਰੈਲ ਤੋਂ ਸ਼ੁਰੂ ਹੋ ਗਈ ਸੀ ਤੇ ਉਸ ਨੂੰ ਭਾਰੀ ਰਿਸਪਾਂਸ ਵੀ ਮਿਲ ਰਿਹਾ ਹੈ ਪਰ ਫਲਾਈਟ ਸ਼ੁਰੂ ਹੋਣ ਤੋਂ ਪਹਿਲਾਂ ਹੀ ਉਸ ਦਾ ਸ਼ਡਿਊਲ ਬਦਲ ਦਿੱਤਾ ਗਿਆ ਹੈ। ਇਸ ਦੀ ਪੁਸ਼ਟੀ ਕੇਂਦਰੀ ਮੰਤਰੀ ਰਵਨੀਤ ਬਿੱਟੂ ਵੱਲੋਂ ਕੀਤੀ ਗਈ ਹੈ, ਜਿਸ ਲਈ ਲੋਕਾਂ ਦੀ ਮੰਗ ਦਾ ਹਵਾਲਾ ਦਿੱਤਾ ਜਾ ਰਿਹਾ ਹੈ।

ਹੁਣ ਇਸ ਤਰ੍ਹਾਂ ਤੈਅ ਕੀਤਾ ਗਿਆ ਟਾਈਮ ਟੇਬਲ

-ਸਵੇਰੇ 8.35 ’ਤੇ ਦਿੱਲੀ ਤੋਂ ਚੱਲ ਕੇ 9.45 ਹਲਵਾਰਾ ਵਿਚ ਲੈਂਡਿੰਗ

-ਸਵੇਰੇ 10.25 ’ਤੇ ਹਲਵਾਰਾ ਤੋਂ ਚੱਲ ਕੇ 11.40 ’ਤੇ ਦਿੱਲੀ ਵਿਚ ਲੈਂਡਿੰਗ

-ਦੁਪਹਿਰ 12.55 ’ਤੇ ਦਿੱਲੀ ਤੋਂ ਚੱਲ ਕੇ 2.10 ’ਤੇ ਹਲਵਾਰਾ ਵਿਚ ਲੈਂਡਿੰਗ

-ਦੁਪਹਿਰ 2.40 ’ਤੇ ਹਲਵਾਰਾ ਤੋਂ ਚੱਲ ਕੇ 3.55 ’ਤੇ ਦਿੱਲੀ ਵਿਚ ਲੈਂਡਿੰਗ

ਇਸ ਤੋਂ ਪਹਿਲਾਂ ਇਹ ਕੀਤੀ ਜਾ ਰਹੀ ਸੀ ਸ਼ਿਕਾਇਤ

ਏਅਰ ਇੰਡੀਆ ਵੱਲੋਂ ਪਹਿਲਾਂ ਸਵੇਰੇ 5.55 ਵਜੇ ਦਿੱਲੀ ਤੋਂ ਚੱਲ ਕੇ ਫਲਾਈਟ 7.05 ਵਜੇ ਲੁਧਿਆਣਾ ਪੁੱਜਣ ਅਤੇ ਫਿਰ ਸਵੇਰੇ 7.55 ’ਤੇ ਹਲਵਾਰਾ ਤੋਂ ਚੱਲ ਕੇ 9.10 ਵਜੇ ਦਿੱਲੀ ਪੁੱਜਣ ਦਾ ਸ਼ਡਿਊਲ ਜਾਰੀ ਕੀਤਾ ਗਿਆ, ਜਿਸ ਸਬੰਧੀ ਲੋਕਾਂ ਵੱਲੋਂ ਸ਼ਿਕਾਇਤ ਕੀਤੀ ਜਾ ਰਹੀ ਸੀ ਕਿ ਇਸ ਸ਼ਡਿਊਲ ਮੁਤਾਬਕ ਦਿੱਲੀ ਜਾਂ ਲੁਧਿਆਣਾ ਤੋਂ ਪਹਿਲੀ ਫਲਾਈਟ ਫੜਨ ਲਈ ਸਵੇਰ 2 ਘੰਟੇ ਪਹਿਲਾਂ ਘਰੋਂ ਨਿਕਲਣ ਕਾਰਨ ਉਨ੍ਹਾਂ ਨੂੰ ਕਾਫੀ ਪ੍ਰੇਸ਼ਾਨੀ ਹੋਵੇਗੀ।

ਇਸੇ ਤਰ੍ਹਾਂ ਦਿਨ ਦੇ ਕੰਮ ਕਰ ਕੇ ਸ਼ਾਮ ਨੂੰ ਦਿੱਲੀ ਤੋਂ ਵਾਪਸ ਮੁੜਨ ਦੇ ਹਿਸਾਬ ਨਾਲ ਵੀ ਦੁਪਹਿਰ 12.55 ਵਜੇ ਚੱਲਣ ਵਾਲੀ ਫਲਾਈਟ ਵੀ ਲੋਕਾਂ ਵੱਲੋਂ ਪਸੰਦ ਨਹੀਂ ਕੀਤੀ ਜਾ ਰਹੀ ਸੀ। ਇਸ ਸਬੰਧੀ ਫੀਡਬੈਕ ਦੇ ਹਿਸਾਬ ਨਾਲ ਕੀਤੇ ਬਦਲਾਅ ਤੋਂ ਬਾਅਦ ਸਵੇਰ ਲੁਧਿਆਣਾ ਤੋਂ ਦਿੱਲੀ ਜਾਣ ਵਾਲੇ ਲੋਕਾਂ ਨੂੰ ਸਹੂਲਤ ਹੋਵੇਗੀ।