ਰਣਜੀ ਟਰਾਫੀ ਸੈਮੀਫਾਈਨਲ: ਕਰਨਾਟਕ ਨੂੰ ਝਟਕਾ, ਦੇਵਦੱਤ ਪੱਡਿਕਲ ਹੋਏ ਜ਼ਖਮੀ

ਲਖਨਊ : ਰਣਜੀ ਟਰਾਫੀ 2025-26 ਦੇ ਸੈਮੀਫਾਈਨਲ ਮੁਕਾਬਲੇ ਵਿੱਚ ਉੱਤਰਾਖੰਡ ਵਿਰੁੱਧ ਕਰਨਾਟਕ ਦੀ ਸਥਿਤੀ ਮਜ਼ਬੂਤ ਹੋਣ ਦੇ ਬਾਵਜੂਦ ਟੀਮ ਲਈ ਇੱਕ ਬੁਰੀ ਖ਼ਬਰ ਸਾਹਮਣੇ ਆਈ ਹੈ। ਕਰਨਾਟਕ ਦੇ ਸਟਾਰ ਬੱਲੇਬਾਜ਼ ਦੇਵਦਤ ਪਡਿੱਕਲ ਮੈਚ ਦੇ ਚੌਥੇ ਦਿਨ ਫੀਲਡਿੰਗ ਕਰਦੇ ਸਮੇਂ ਜ਼ਖ਼ਮੀ ਹੋ ਗਏ, ਜਿਸ ਕਾਰਨ ਉਨ੍ਹਾਂ ਦੀ ਕਰੀਅਰ ਦੀ ਸਰਵੋਤਮ ਪਾਰੀ ਦੀ ਖੁਸ਼ੀ ਫਿੱਕੀ ਪੈ ਗਈ ਹੈ।

ਕੈਚ ਲੈਣ ਦੀ ਕੋਸ਼ਿਸ਼ 'ਚ ਉਂਗਲ 'ਤੇ ਲੱਗੀ ਸੱਟ 
ਇਹ ਘਟਨਾ ਬੁੱਧਵਾਰ ਨੂੰ ਉੱਤਰਾਖੰਡ ਦੀ ਪਹਿਲੀ ਪਾਰੀ ਦੇ 75ਵੇਂ ਓਵਰ ਦੌਰਾਨ ਵਾਪਰੀ। ਪ੍ਰਸਿੱਧ ਕ੍ਰਿਸ਼ਨਾ ਦੀ ਗੇਂਦ 'ਤੇ ਅਭਯ ਨੇਗੀ ਨੇ ਡਰਾਈਵ ਕੀਤਾ ਸੀ, ਜਿਸ ਨੂੰ ਫੜਨ ਲਈ ਗਲੀ ਵਿੱਚ ਖੜ੍ਹੇ ਪਡਿੱਕਲ ਨੇ ਡਾਈਵ ਲਗਾਈ। ਹਾਲਾਂਕਿ ਉਹ ਕੈਚ ਨਹੀਂ ਫੜ ਸਕੇ ਪਰ ਇਸ ਕੋਸ਼ਿਸ਼ ਵਿੱਚ ਉਨ੍ਹਾਂ ਦੀ ਉਂਗਲ 'ਤੇ ਗੰਭੀਰ ਸੱਟ ਲੱਗ ਗਈ। ਉਹ ਤੁਰੰਤ ਮੈਦਾਨ ਤੋਂ ਬਾਹਰ ਚਲੇ ਗਏ ਅਤੇ ਦੂਜੀ ਪਾਰੀ ਵਿੱਚ ਬੱਲੇਬਾਜ਼ੀ ਕਰਨ ਲਈ ਵੀ ਨਹੀਂ ਆਏ।

ਕਰੀਅਰ ਦੀ ਸਰਵੋਤਮ ਪਾਰੀ: ਜੜਿਆ ਦੋਹਰਾ ਸੈਂਕੜਾ 
ਜ਼ਖ਼ਮੀ ਹੋਣ ਤੋਂ ਪਹਿਲਾਂ ਦੇਵਦਤ ਪਡਿੱਕਲ ਨੇ ਲਖਨਊ ਦੇ ਇਕਾਨਾ ਸਟੇਡੀਅਮ ਵਿੱਚ ਸ਼ਾਨਦਾਰ ਬੱਲੇਬਾਜ਼ੀ ਦਾ ਪ੍ਰਦਰਸ਼ਨ ਕੀਤਾ ਸੀ। ਉਨ੍ਹਾਂ ਨੇ ਨੰਬਰ 3 'ਤੇ ਖੇਡਦਿਆਂ 330 ਗੇਂਦਾਂ ਵਿੱਚ 29 ਚੌਕਿਆਂ ਅਤੇ ਤਿੰਨ ਛੱਕਿਆਂ ਦੀ ਮਦਦ ਨਾਲ 232 ਦੌੜਾਂ ਦੀ ਵਿਸ਼ਾਲ ਪਾਰੀ ਖੇਡੀ। ਉਨ੍ਹਾਂ ਦੇ ਇਸ ਪ੍ਰਦਰਸ਼ਨ ਸਦਕਾ ਕਰਨਾਟਕ ਨੇ 736 ਦੌੜਾਂ ਦਾ ਵੱਡਾ ਸਕੋਰ ਖੜ੍ਹਾ ਕੀਤਾ।

IPL ਤੋਂ ਪਹਿਲਾਂ ਵਧੀ ਚਿੰਤਾ
ਪਡਿੱਕਲ ਦੀ ਇਸ ਸੱਟ ਨੇ ਰੌਇਲ ਚੈਲੰਜਰਜ਼ ਬੈਂਗਲੁਰੂ (RCB)ਦੀ ਚਿੰਤਾ ਵਧਾ ਦਿੱਤੀ ਹੈ, ਕਿਉਂਕਿ ਉਹ ਆਗਾਮੀ ਆਈਪੀਐਲ ਸੀਜ਼ਨ ਵਿੱਚ ਇਸ ਟੀਮ ਦੀ ਨੁਮਾਇੰਦਗੀ ਕਰਦੇ ਹਨ। ਕਰਨਾਟਕ ਦੀ ਦੂਜੀ ਪਾਰੀ ਵਿੱਚ ਪਡਿੱਕਲ ਦੀ ਜਗ੍ਹਾ ਸ਼੍ਰੇਅਸ ਗੋਪਾਲ ਨੰਬਰ 3 'ਤੇ ਬੱਲੇਬਾਜ਼ੀ ਲਈ ਆਏ, ਪਰ ਉਹ ਬਿਨਾਂ ਖਾਤਾ ਖੋਲ੍ਹੇ ਹੀ ਆਊਟ ਹੋ ਗਏ।

ਕਰਨਾਟਕ ਦੀ ਮਜ਼ਬੂਤ ਪਕੜ 
ਕਰਨਾਟਕ ਨੇ ਉੱਤਰਾਖੰਡ ਨੂੰ ਪਹਿਲੀ ਪਾਰੀ ਵਿੱਚ 233 ਦੌੜਾਂ 'ਤੇ ਸਮੇਟਣ ਤੋਂ ਬਾਅਦ ਫਾਲੋ-ਆਨ ਦੇਣ ਦੀ ਬਜਾਏ ਦੁਬਾਰਾ ਬੱਲੇਬਾਜ਼ੀ ਕਰਨ ਦਾ ਫੈਸਲਾ ਕੀਤਾ। ਲੰਚ ਤੱਕ ਕਰਨਾਟਕ ਨੇ ਇਕ ਵਿਕਟ ਦੇ ਨੁਕਸਾਨ 'ਤੇ 39 ਦੌੜਾਂ ਬਣਾ ਲਈਆਂ ਸਨ ਅਤੇ ਉਨ੍ਹਾਂ ਦੀ ਕੁੱਲ ਬੜ੍ਹਤ 542 ਦੌੜਾਂ ਤੱਕ ਪਹੁੰਚ ਗਈ ਸੀ। ਦੂਜੇ ਪਾਸੇ, ਜੰਮੂ-ਕਸ਼ਮੀਰ ਨੇ ਬੰਗਾਲ ਨੂੰ ਹਰਾ ਕੇ ਪਹਿਲੀ ਵਾਰ ਰਣਜੀ ਟਰਾਫੀ ਦੇ ਫਾਈਨਲ ਵਿੱਚ ਪਹੁੰਚ ਕੇ ਇਤਿਹਾਸ ਰਚ ਦਿੱਤਾ ਹੈ।