ਪੱਛਮੀ ਏਸ਼ੀਆ ’ਚ ਜਾਰੀ ਤਣਾਅ ਅਤੇ ਸੁਰੱਖਿਆ ਸਬੰਧੀ ਬੇਯਕੀਨੀਆਂ ਵਿਚਾਲੇ ਏਅਰ ਇੰਡੀਆ ਨੇ ਤੇਲ ਅਵੀਵ-ਨਵੀਂ ਦਿੱਲੀ ਮਾਰਗ ’ਤੇ ਆਪਣੀਆਂ ਉਡਾਣਾਂ ਦਾ ਅਸਥਾਈ ਮੁਅੱਤਲ ਹੁਣ 31 ਜੁਲਾਈ ਤੱਕ ਵਧਾ ਦਿੱਤਾ ਹੈ। ਇਸ ਤੋਂ ਪਹਿਲਾਂ ਏਅਰਲਾਈਨ ਨੇ ਇਸ ਸੇਵਾ ਨੂੰ ਜੂਨ ਦੇ ਅਖੀਰ ਤੱਕ ਮੁਲਤਵੀ ਕਰਨ ਦਾ ਐਲਾਨ ਕੀਤਾ ਸੀ।
ਏਅਰ ਇੰਡੀਆ ਦੇ ਇਜ਼ਰਾਈਲ ਸੰਚਾਲਨ ਨਾਲ ਜੁੜੇ ਇਕ ਸੀਨੀਅਰ ਅਧਿਕਾਰੀ ਨੇ ਦੱਸਿਆ ਕਿ ਸੋਧੇ ਹੋਏ ਉਡਾਣ ਪ੍ਰੋਗਰਾਮ ਦੀ ਜਾਣਕਾਰੀ ਬੁੱਧਵਾਰ ਸ਼ਾਮ ਨੂੰ ਜਾਰੀ ਕੀਤੀ ਗਈ। ਅਧਿਕਾਰੀ ਅਨੁਸਾਰ ਖੇਤਰ ’ਚ ਮੌਜੂਦਾ ਭੂ-ਸਿਆਸੀ ਹਾਲਾਤ ਨੂੰ ਦੇਖਦੇ ਹੋਏ ਇਹ ਫੈਸਲਾ ਲਿਆ ਗਿਆ ਹੈ।
ਪੱਛਮੀ ਏਸ਼ੀਆ ’ਚ ਫਰਵਰੀ ਦੇ ਅਖੀਰ ਤੋਂ ਜਾਰੀ ਸੰਘਰਸ਼ ਕਾਰਨ ਅੰਤਰਰਾਸ਼ਟਰੀ ਹਵਾਬਾਜ਼ੀ ਕੰਪਨੀਆਂ ਨੂੰ ਵਧਦੀ ਈਂਧਨ ਲਾਗਤ, ਹਵਾਈ ਖੇਤਰ ਦੀਆਂ ਪਾਬੰਦੀਆਂ ਅਤੇ ਸੰਚਾਲਨ ਖਰਚ ਵਰਗੀਆਂ ਚੁਣੌਤੀਆਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਇਹੀ ਕਾਰਨ ਹੈ ਕਿ ਕਈ ਵਿਦੇਸ਼ੀ ਏਅਰਲਾਈਨਾਂ ਨੇ ਤੇਲ ਅਵੀਵ ਮਾਰਗ ’ਤੇ ਆਪਣੀਆਂ ਸੇਵਾਵਾਂ ਸੀਮਤ ਜਾਂ ਪੂਰੀ ਤਰ੍ਹਾਂ ਬੰਦ ਕਰ ਦਿੱਤੀਆਂ ਹਨ।
ਹਾਲਾਂਕਿ ਅਮਰੀਕਾ-ਈਰਾਨ ਜੰਗਬੰਦੀ ਕੁਝ ਸਮੇਂ ਤੋਂ ਲਾਗੂ ਹੈ ਪਰ ਖੇਤਰ ’ਚ ਤਣਾਅ ਅਤੇ ਬੇਯਕੀਨੀ ਅਜੇ ਵੀ ਬਣੀ ਹੋਈ ਹੈ।