ਮੱਧ ਪੂਰਬ ਵਿੱਚ ਵਧਦੇ ਫੌਜੀ ਤਣਾਅ ਵਿਚਕਾਰ ਈਰਾਨ ਖਾੜੀ ਦੇਸ਼ਾਂ 'ਤੇ ਲਗਾਤਾਰ ਮਿਜ਼ਾਈਲ ਅਤੇ ਡਰੋਨ ਹਮਲੇ ਕਰ ਰਿਹਾ ਹੈ।ਤਾਜ਼ਾ ਜਾਣਕਾਰੀ ਮੁਤਾਬਕ ਸੰਯੁਕਤ ਅਰਬ ਅਮੀਰਾਤ ਦੇ ਦੁਬਈ ਵਿੱਚ ਈਰਾਨ ਨੇ ਮੁੜ ਹਮਲਾ ਕੀਤਾ ਹੈ। ਇੱਕ ਸ਼ੱਕੀ ਈਰਾਨੀ ਡਰੋਨ ਦੁਬਈ ਦੇ ਕਰੀਕ ਹਾਰਬਰ ਖੇਤਰ ਵਿੱਚ ਇੱਕ ਰਿਹਾਇਸ਼ੀ ਟਾਵਰ ਨਾਲ ਟਕਰਾ ਗਿਆ, ਜਿਸ ਨਾਲ ਇਮਾਰਤ ਨੂੰ ਅੱਗ ਲੱਗ ਗਈ । ਘਟਨਾ ਮਗਰੋਂ ਇਮਾਰਤ ਨੂੰ ਤੁਰੰਤ ਖਾਲੀ ਕਰਵਾਇਆ ਗਿਆ।
ਦੁਬਈ ਮੀਡੀਆ ਦਫਤਰ ਦੇ ਅਨੁਸਾਰ ਇਹ ਘਟਨਾ ਬੁੱਧਵਾਰ ਨੂੰ ਵਾਪਰੀ ਜਦੋਂ ਇੱਕ ਈਰਾਨੀ ਡਰੋਨ ਅਚਾਨਕ ਕਰੀਕ ਹਾਰਬਰ ਖੇਤਰ ਵਿੱਚ ਸਥਿਤ ਟਾਵਰ ਨਾਲ ਟਕਰਾ ਗਿਆ। ਦੱਸਿਆ ਗਿਆ ਹੈ ਕਿ ਡਰੋਨ ਦੇ ਟਕਰਾਉਂਦੇ ਹੀ ਇਮਾਰਤ ਦੇ ਉੱਪਰੀ ਹਿੱਸੇ ਵਿਚ ਅੱਗ ਲੱਗ ਗਈ।ਸੋਸ਼ਲ ਮੀਡੀਆ 'ਤੇ ਤਸਵੀਰਾਂ ਵਿੱਚ ਕਈ ਮੰਜ਼ਿਲਾਂ ਉੱਪਰ ਅੱਗ ਦੀਆਂ ਲਪਟਾਂ ਅਤੇ ਕੁਝ ਢਾਂਚਾਗਤ ਨੁਕਸਾਨ ਦਿਖਾਇਆ ਗਿਆ। ਨਿਸ਼ਾਨਾ ਬਣਾਈ ਗਈ ਇਮਾਰਤ ਐਡਰੈੱਸ ਕਰੀਕ ਹਾਰਬਰ 2 ਵਜੋਂ ਪਛਾਣੀ ਗਈ ਹੈ, ਜੋ ਕਿ ਐਮਾਰ ਪ੍ਰਾਪਰਟੀਜ਼ ਦੁਆਰਾ ਵਿਕਸਤ ਕੀਤੇ ਗਏ ਲਗਜ਼ਰੀ ਪ੍ਰੋਜੈਕਟ ਐਡਰੈੱਸ ਗ੍ਰੈਂਡ ਕਰੀਕ ਹਾਰਬਰ ਦਾ ਹਿੱਸਾ ਹੈ। ਅਧਿਕਾਰੀਆਂ ਨੇ ਸੁਰੱਖਿਆ ਕਾਰਨਾਂ ਕਰਕੇ ਪੂਰੀ ਇਮਾਰਤ ਨੂੰ ਖਾਲੀ ਕਰਵਾ ਲਿਆ। ਖੁਸ਼ਕਿਸਮਤੀ ਨਾਲ, ਇਸ ਘਟਨਾ ਵਿੱਚ ਕੋਈ ਜ਼ਖਮੀ ਨਹੀਂ ਹੋਇਆ।
ਇਸ ਟਾਵਰ ਦਾ ਨਿਰਮਾਣ ਜੂਨ 2017 ਵਿੱਚ ਸ਼ੁਰੂ ਹੋਇਆ ਸੀ ਅਤੇ ਅਪ੍ਰੈਲ 2023 ਵਿੱਚ ਪੂਰਾ ਹੋਇਆ ਸੀ। ਇਸਨੂੰ ਦੁਬਈ ਦੇ ਸਭ ਤੋਂ ਆਧੁਨਿਕ ਵਾਟਰਫਰੰਟ ਰਿਹਾਇਸ਼ੀ ਪ੍ਰੋਜੈਕਟਾਂ ਵਿੱਚੋਂ ਇੱਕ ਮੰਨਿਆ ਜਾਂਦਾ ਹੈ। ਯੂ.ਏ.ਈ ਦੇ ਰੱਖਿਆ ਮੰਤਰਾਲੇ ਅਨੁਸਾਰ ਦੇਸ਼ ਦੇ ਹਵਾਈ ਰੱਖਿਆ ਪ੍ਰਣਾਲੀ ਨੇ ਹਾਲ ਹੀ ਦੇ ਹਮਲਿਆਂ ਵਿੱਚ 268 ਬੈਲਿਸਟਿਕ ਮਿਜ਼ਾਈਲਾਂ, 15 ਕਰੂਜ਼ ਮਿਜ਼ਾਈਲਾਂ ਅਤੇ 1,514 ਡਰੋਨ (UAV) ਨੂੰ ਰੋਕਿਆ ਹੈ। ਮੰਤਰਾਲੇ ਦਾ ਕਹਿਣਾ ਹੈ ਕਿ ਹੁਣ ਤੱਕ ਇਨ੍ਹਾਂ ਹਮਲਿਆਂ ਵਿੱਚ 6 ਲੋਕਾਂ ਦੀ ਮੌਤ ਹੋ ਗਈ ਹੈ, ਜਿਨ੍ਹਾਂ ਵਿੱਚ ਅਮੀਰਾਤ, ਪਾਕਿਸਤਾਨੀ, ਨੇਪਾਲੀ ਅਤੇ ਬੰਗਲਾਦੇਸ਼ੀ ਨਾਗਰਿਕ ਸ਼ਾਮਲ ਹਨ, ਜਦੋਂ ਕਿ 131 ਲੋਕ ਜ਼ਖਮੀ ਹੋਏ ਹਨ। ਇਹ ਹਮਲਾ ਅਜਿਹੇ ਸਮੇਂ ਹੋਇਆ ਹੈ ਜਦੋਂ ਅਮਰੀਕਾ ਅਤੇ ਇਜ਼ਰਾਈਲ ਦੇ ਸਾਂਝੇ ਫੌਜੀ ਆਪ੍ਰੇਸ਼ਨ ਤੋਂ ਬਾਅਦ ਖੇਤਰ ਵਿੱਚ ਤਣਾਅ ਕਾਫ਼ੀ ਵੱਧ ਗਿਆ ਹੈ। ਇਸ ਆਪ੍ਰੇਸ਼ਨ ਵਿੱਚ ਈਰਾਨ ਦੇ ਸੁਪਰੀਮ ਲੀਡਰ ਅਲੀ ਖਮੇਨੀ ਦੀ ਮੌਤ ਦੀ ਖ਼ਬਰ ਤੋਂ ਬਾਅਦ, ਪੂਰੇ ਖੇਤਰ ਵਿੱਚ ਡਰੋਨ ਅਤੇ ਮਿਜ਼ਾਈਲ ਹਮਲਿਆਂ ਦੀ ਲੜੀ ਤੇਜ਼ ਹੋ ਗਈ ਹੈ।