ਨਵੀਂ ਦਿੱਲੀ : ਭਾਰਤ ’ਚ ਥੋਕ ਮੁੱਲ ਸੂਚਕ ਅੰਕ ਭਾਵ ਡਬਲਿਊ.ਪੀ.ਆਈ. ’ਤੇ ਆਧਾਰਿਤ ਮਹਿੰਗਾਈ ਦਰ 2 ਮਹੀਨਿਆਂ ਬਾਅਦ ਅਗਸਤ 2025 ’ਚ ਫਿਰ ਸਕਾਰਾਤਮਕ ਹੋ ਗਈ ਹੈ। ਇਹ 0.52 ਫੀਸਦੀ ਦਰਜ ਕੀਤੀ ਗਈ, ਜਿਸ ਦਾ ਮੁੱਖ ਕਾਰਨ ਖਾਣ-ਪੀਣ ਦੀਆਂ ਵਸਤੂਆਂ ਅਤੇ ਬਣੀਆਂ ਵਸਤੂਆਂ ਦੀਆਂ ਕੀਮਤਾਂ ’ਚ ਵਾਧਾ ਹੈ।
ਇਹ ਜਾਣਕਾਰੀ ਸਰਕਾਰ ਵੱਲੋਂ ਜਾਰੀ ਕੀਤੇ ਗਏ ਅੰਕੜਿਆਂ ਤੋਂ ਪ੍ਰਾਪਤ ਹੋਈ ਹੈ। ਇਸ ਤੋਂ ਪਹਿਲਾਂ ਜੁਲਾਈ ’ਚ ਇਹ ਦਰ (-) 0.58 ਫੀਸਦੀ ਅਤੇ ਜੂਨ ’ਚ (-) 0.19 ਫੀਸਦੀ ਸੀ, ਜੋ ਕਿ ਨਕਾਰਾਤਮਕ (ਡਿਫਲੇਸ਼ਨ) ਰਹੀ ਸੀ। ਉਥੇ ਹੀ ਪਿਛਲੇ ਸਾਲ ਭਾਵ ਅਗਸਤ 2024 ’ਚ ਇਹ ਦਰ 1.25 ਫੀਸਦੀ ਸੀ।
ਖੁਰਾਕੀ ਵਸਤੂਆਂ: ਇਸ ਸ਼੍ਰੇਣੀ ’ਚ ਮਹਿੰਗਾਈ ਦੀ ਦਰ ’ਚ ਗਿਰਾਵਟ ਦੀ ਰਫਤਾਰ ਹੌਲੀ ਹੋ ਗਈ। ਅਗਸਤ ’ਚ 3.06 ਫੀਸਦੀ ਸੀ, ਜਦਕਿ ਜੁਲਾਈ ’ਚ 6.29 ਫੀਸਦੀ ਸੀ। ਖਾਸ ਕਰ ਕੇ ਸਬਜ਼ੀਆਂ ਦੀਆਂ ਕੀਮਤਾਂ ਵਿਚ ਵਾਧਾ ਹੋਇਆ ਹੈ। ਅਗਸਤ ’ਚ ਸਬਜ਼ੀਆਂ ਵਿਚ 14.18 ਫੀਸਦੀ ਦੀ ਗਿਰਾਵਟ ਆਈ, ਜੋ ਜੁਲਾਈ ’ਚ 28.96 ਫੀਸਦੀ ਸੀ।
ਬਣੀਆਂ ਵਸਤੂਆਂ : ਬਣੀਆਂ ਵਸਤੂਆਂ ਦੀ ਮਹਿੰਗਾਈ ਦਰ 2.55 ਫੀਸਦੀ ਹੋ ਗਈ, ਜੋ ਜੁਲਾਈ ’ਚ 2.05 ਫੀਸਦੀ ਸੀ।
ਈਂਧਨ ਅਤੇ ਬਿਜਲੀ : ਇਸ ਸ਼੍ਰੇਣੀ ’ਚ ਨਕਾਰਾਤਮਕ ਮਹਿੰਗਾਈ 3.17 ਫੀਸਦੀ ਦਰਜ ਕੀਤੀ ਗਈ, ਜਦਕਿ ਜੁਲਾਈ ’ਚ ਇਹ 2.43 ਫੀਸਦੀ ਸੀ।
ਪ੍ਰਚੂਨ ਮਹਿੰਗਾਈ ਅਤੇ ਆਰ.ਬੀ.ਆਈ. ਦਾ ਰੁਖ਼
ਥੋਕ ਮਹਿੰਗਾਈ ਦੇ ਨਾਲ ਹੀ ਪ੍ਰਚੂਨ ਮਹਿੰਗਾਈ ਦਰ ’ਚ ਵੀ ਵਾਧਾ ਹੋਇਆ ਹੈ। ਹਾਲ ਹੀ ਦੇ ਅੰਕੜਿਆਂ ਅਨੁਸਾਰ ਅਗਸਤ ’ਚ ਪ੍ਰਚੂਨ ਮਹਿੰਗਾਈ ਵਧ ਕੇ 2.07 ਫੀਸਦੀ ਹੋ ਗਈ, ਜਿਸ ਦਾ ਮੁੱਖ ਕਾਰਨ ਸਬਜ਼ੀਆਂ, ਮਾਸ, ਮੱਛੀ ਅਤੇ ਅਾਂਡੇ ਵਰਗੀਆਂ ਰਸੋਈ ਨਾਲ ਜੁੜੀਆਂ ਚੀਜ਼ਾਂ ਦੀਆਂ ਵਧਦੀਆਂ ਕੀਮਤਾਂ ਹਨ। ਭਾਰਤੀ ਰਿਜ਼ਰਵ ਬੈਂਕ (ਆਰ.ਬੀ.ਆਈ.) ਆਪਣੀ ਮੁਦਰਾ ਨੀਤੀ ਦਾ ਫੈਸਲਾ ਲੈਂਦੇ ਸਮੇਂ ਪ੍ਰਚੂਨ ਮਹਿੰਗਾਈ ’ਤੇ ਵਧੇਰੇ ਧਿਆਨ ਦਿੰਦਾ ਹੈ। ਆਰ. ਬੀ.ਆਈ. ਨੇ ਅਗਸਤ ’ਚ ਰੈਪੋ ਰੇਟ ਨੂੰ 5.5 ਫੀਸਦੀ ’ਤੇ ਸਥਿਰ ਰੱਖਿਆ, ਜਿਸ ਤੋਂ ਪਤਾ ਚੱਲਦਾ ਹੈ ਕਿ ਕੇਂਦਰੀ ਬੈਂਕ ਅਜੇ ਵੀ ਮੰਨਦਾ ਹੈ ਕਿ ਮਹਿੰਗਾਈ ਕੰਟਰੋਲ ’ਚ ਹੈ।