ਘਰ 'ਚ ਫਿਸਲੇ ਅਨਿਲ ਵਿਜ ਨਾਲ ਵਾਪਰਿਆ ਹਾਦਸਾ: ਦੋਵੇਂ ਲੱਤਾਂ ਫ੍ਰੈਕਚਰ, ਡਾਕਟਰਾਂ ਨੇ ਦਿੱਤੀ 'ਬੈੱਡ ਰੈਸਟ' ਦੀ ਸਲਾਹ

ਅੰਬਾਲਾ : ਹਰਿਆਣਾ ਦੇ ਕੈਬਨਿਟ ਮੰਤਰੀ ਅਨਿਲ ਵਿਜ ਇੱਕ ਭਿਆਨਕ ਹਾਦਸੇ ਦਾ ਸ਼ਿਕਾਰ ਹੋ ਗਏ ਹਨ। ਜਾਣਕਾਰੀ ਮੁਤਾਬਕ ਅਨਿਲ ਵਿਜ ਆਪਣੇ ਘਰ ਵਿੱਚ ਅਚਾਨਕ ਫਿਸਲ ਗਏ, ਜਿਸ ਕਾਰਨ ਉਨ੍ਹਾਂ ਦੇ ਦੋਵੇਂ ਪੈਰਾਂ ਵਿੱਚ ਫਰੈਕਚਰ ਹੋ ਗਿਆ ਹੈ। ਇਲਾਜ ਤੋਂ ਬਾਅਦ ਉਨ੍ਹਾਂ ਨੂੰ ਘਰ ਭੇਜ ਦਿੱਤਾ ਗਿਆ ਹੈ। ਇਸ ਦੌਰਾਨ ਡਾਕਟਰਾਂ ਨੇ ਉਨ੍ਹਾਂ ਦੀ ਗੰਭੀਰ ਹਾਲਤ ਨੂੰ ਦੇਖਦੇ ਹੋਏ ਇੱਕ ਮਹੀਨੇ ਲਈ ਮੁਕੰਮਲ 'ਬੈੱਡ ਰੈਸਟ' ਦੀ ਸਲਾਹ ਦਿੱਤੀ ਹੈ।

ਦੋਵਾਂ ਪੈਰਾਂ 'ਤੇ ਚੜ੍ਹਿਆ ਪਲਸਤਰ
ਹਾਦਸੇ ਤੋਂ ਤੁਰੰਤ ਬਾਅਦ ਉਨ੍ਹਾਂ ਨੂੰ ਹਸਪਤਾਲ ਲਿਜਾਇਆ ਗਿਆ, ਜਿੱਥੇ ਐਕਸ-ਰੇਅ ਤੋਂ ਬਾਅਦ ਪੁਸ਼ਟੀ ਹੋਈ ਕਿ ਉਨ੍ਹਾਂ ਦੇ ਗੰਭੀਰ ਸੱਟਾਂ ਲੱਗੀਆਂ ਹਨ। ਹਾਲਾਂਕਿ ਹਸਪਤਾਲ ਤੋਂ ਛੁੱਟੀ ਮਿਲਣ ਤੋਂ ਬਾਅਦ ਉਹ ਘਰ ਆ ਗਏ ਪਰ ਉਨ੍ਹਾਂ ਦੇ ਦੋਵਾਂ ਪੈਰਾਂ 'ਤੇ ਪੱਟੀਆਂ ਅਤੇ ਪਲਸਤਰ ਲਗਾਇਆ ਗਿਆ ਹੈ। ਹੈਰਾਨੀ ਦੀ ਗੱਲ ਇਹ ਹੈ ਕਿ ਇੰਨੀ ਦਰਦਨਾਕ ਸੱਟ ਦੇ ਬਾਵਜੂਦ ਵਿਜ ਦਾ ਇੱਕ ਵੀਡੀਓ ਵਾਇਰਲ ਹੋ ਰਿਹਾ ਹੈ, ਜਿਸ ਵਿੱਚ ਉਹ “ਚੱਲ ਰੀ ਸਜਨੀ ਅਬ ਕਿਆ ਸੋਚੇ…” ਗੀਤ ਗੁਣਗੁਣਾਉਂਦੇ ਨਜ਼ਰ ਆ ਰਹੇ ਹਨ। ਉਨ੍ਹਾਂ ਦੇ ਇਸ ਅੰਦਾਜ਼ ਨੇ ਸਮਰਥਕਾਂ ਵਿੱਚ ਨਵੀਂ ਰੂਹ ਫੂਕ ਦਿੱਤੀ ਹੈ।

ਵਿਧਾਨ ਸਭਾ ਸੈਸ਼ਨ 'ਚ ਸ਼ਾਮਲ ਹੋਣ 'ਤੇ ਸਸਪੈਂਸ
ਹਰਿਆਣਾ ਵਿਧਾਨ ਸਭਾ ਦਾ ਸੈਸ਼ਨ 20 ਫਰਵਰੀ ਤੋਂ ਸ਼ੁਰੂ ਹੋਣ ਜਾ ਰਿਹਾ ਹੈ। ਸਦਨ ਵਿੱਚ ਆਪਣੇ ਬੇਬਾਕ ਬਿਆਨਾਂ ਲਈ ਜਾਣੇ ਜਾਂਦੇ ਅਨਿਲ ਵਿਜ ਇਸ ਵਾਰ ਸ਼ਾਇਦ ਨਜ਼ਰ ਨਾ ਆਉਣ। ਡਾਕਟਰਾਂ ਦੀ ਸਖ਼ਤ ਹਿਦਾਇਤ ਕਾਰਨ ਉਨ੍ਹਾਂ ਦੇ ਸੈਸ਼ਨ ਵਿੱਚ ਜਾਣ 'ਤੇ ਸਸਪੈਂਸ ਬਣਿਆ ਹੋਇਆ ਹੈ। ਦੱਸਿਆ ਜਾ ਰਿਹਾ ਹੈ ਕਿ ਉਹ ਆਪਣੇ ਘਰ ਤੋਂ ਹੀ ਜ਼ਰੂਰੀ ਮੀਟਿੰਗਾਂ ਅਤੇ ਦਫ਼ਤਰੀ ਕੰਮ ਨਿਪਟਾਉਣਗੇ।

ਪਿਛਲੇ ਦਿਨੀਂ ਮਹਿਲਾ SP ਨਾਲ ਬਹਿਸ ਕਰਕੇ ਚਰਚਾ 'ਚ ਸਨ ਵਿਜ
ਜ਼ਿਕਰਯੋਗ ਹੈ ਕਿ ਹਾਲ ਹੀ ਵਿੱਚ ਅਨਿਲ ਵਿਜ ਕੈਥਲ ਵਿੱਚ ਇੱਕ ਮੀਟਿੰਗ ਦੌਰਾਨ ਮਹਿਲਾ ਐੱਸ.ਪੀ. (SP) ਉਪਾਸਨਾ ਨਾਲ ਹੋਈ ਤਿੱਖੀ ਬਹਿਸ ਕਾਰਨ ਸੁਰਖੀਆਂ ਵਿੱਚ ਸਨ। ਇੱਕ ਪੁਲਸ ਕਰਮਚਾਰੀ ਨੂੰ ਸਸਪੈਂਡ ਕਰਨ ਦੇ ਮੁੱਦੇ 'ਤੇ ਵਿਜ ਇੰਨੇ ਗੁੱਸੇ ਵਿੱਚ ਆ ਗਏ ਸਨ ਕਿ ਉਨ੍ਹਾਂ ਨੇ ਐੱਸ.ਪੀ. ਨੂੰ ਕਹਿ ਦਿੱਤਾ ਸੀ, "ਜਦੋਂ ਮੈਂ ਕਹਿ ਰਿਹਾ ਹਾਂ, ਤਾਂ ਇਸ ਤੋਂ ਵੱਡੀ ਪਾਵਰ ਕੀ ਹੈ? ਜੇ ਤੁਹਾਡੇ ਕੋਲ ਪਾਵਰ ਨਹੀਂ ਤਾਂ ਇੱਥੋਂ ਚਲੇ ਜਾਓ।"

ਪਹਿਲਾਂ ਵੀ ਹੋ ਚੁੱਕੇ ਨੇ ਫਰੈਕਚਰ ਦਾ ਸ਼ਿਕਾਰ
ਇਹ ਪਹਿਲੀ ਵਾਰ ਨਹੀਂ ਹੈ ਜਦੋਂ ਵਿਜ ਨੇ ਸੱਟ ਦੇ ਬਾਵਜੂਦ ਹੌਸਲਾ ਦਿਖਾਇਆ ਹੋਵੇ। ਪਿਛਲੇ ਸਾਲ ਵੀ ਉਨ੍ਹਾਂ ਦੇ ਪੈਰ ਦੇ ਅੰਗੂਠੇ ਵਿੱਚ ਫਰੈਕਚਰ ਹੋ ਗਿਆ ਸੀ, ਪਰ ਉਹ ਦਰਦ ਦੀ ਪਰਵਾਹ ਕੀਤੇ ਬਿਨਾਂ ਪਾਰਟੀ ਪ੍ਰੋਗਰਾਮਾਂ ਅਤੇ ਮੀਟਿੰਗਾਂ ਵਿੱਚ ਸ਼ਾਮਲ ਹੁੰਦੇ ਰਹੇ ਸਨ। ਫਿਲਹਾਲ ਸਾਰੇ ਸਿਆਸੀ ਆਗੂ ਅਤੇ ਸਮਰਥਕ ਉਨ੍ਹਾਂ ਦੇ ਜਲਦ ਸਿਹਤਯਾਬ ਹੋਣ ਦੀ ਦੁਆ ਕਰ ਰਹੇ ਹਨ।