ਈਟਾਨਗਰ : ਅਰੁਣਾਚਲ ਪ੍ਰਦੇਸ਼ ਦੀਆਂ ਹਸੀਨ ਵਾਦੀਆਂ ਵਿੱਚੋਂ ਕੁਦਰਤ ਦਾ ਇੱਕ ਅਨੋਖਾ ਰੰਗ ਸਾਹਮਣੇ ਆਇਆ ਹੈ। ਵਿਗਿਆਨੀਆਂ ਨੇ ਇੱਥੇ ਤਿਤਲੀ ਦੀ ਇੱਕ ਨਵੀਂ ਪ੍ਰਜਾਤੀ ਦੀ ਖੋਜ ਕੀਤੀ ਹੈ, ਜਿਸ ਦਾ ਨਾਂ ਆਸਾਮ ਦੇ ਮਸ਼ਹੂਰ ਗਾਇਕ ਜ਼ੁਬੀਨ ਗਰਗ ਦੇ ਨਾਂ 'ਤੇ ਰੱਖਿਆ ਗਿਆ ਹੈ। ਜ਼ਿਕਰਯੋਗ ਹੈ ਕਿ ਪ੍ਰਸਿੱਧ ਅਸਾਮੀ ਗਾਇਕ ਜ਼ੁਬੀਨ ਗਰਗ ਦਾ ਪਿਛਲੇ ਸਾਲ 19 ਸਤੰਬਰ ਨੂੰ ਸਿੰਗਾਪੁਰ ਵਿੱਚ ਦੇਹਾਂਤ ਹੋ ਗਿਆ ਸੀ। ਇਹ ਖੋਜ ਜਿੱਥੇ ਖੇਤਰ ਦੀ ਅਮੀਰ ਜੈਵ-ਵਿਭਿੰਨਤਾ ਨੂੰ ਦਰਸਾਉਂਦੀ ਹੈ, ਉੱਥੇ ਹੀ ਗਾਇਕ ਦੀ ਸੱਭਿਆਚਾਰਕ ਵਿਰਾਸਤ ਨੂੰ ਵੀ ਇੱਕ ਸੱਚੀ ਸ਼ਰਧਾਂਜਲੀ ਹੈ।
ਵਿਗਿਆਨਕ ਤੌਰ 'ਤੇ 'ਯੂਥੇਲੀਆ (ਲਿੰਬੂਸਾ) ਜ਼ੁਬੀਨਗਰਗੀ ਵਜੋਂ ਸ਼੍ਰੇਣੀਬੱਧ ਕੀਤੀ ਗਈ ਇਹ ਪ੍ਰਜਾਤੀ ਹਾਲ ਹੀ ਵਿੱਚ ਉੱਤਰ-ਪੂਰਬੀ ਰਾਜ ਦੇ ਲੇਪ੍ਰਾਡਾ ਜ਼ਿਲ੍ਹੇ ਦੇ ਬਸਰ ਖੇਤਰ ਵਿੱਚ ਖੋਜੀ ਗਈ ਸੀ। ਤਿਤਲੀ ਪ੍ਰੇਮੀ ਅਤੇ ਪੁਲਸ ਕਰਮਚਾਰੀ ਰੋਸ਼ਨ ਉਪਾਧਿਆਏ ਨੇ ਖੋਜਕਰਤਾ ਕੇ. ਸਦਾਸ਼ਿਵਨ ਨਾਲ ਮਿਲ ਕੇ ਇਸ ਪ੍ਰਜਾਤੀ ਦੀ ਖੋਜ ਕੀਤੀ। ਖੋਜਕਰਤਾਵਾਂ ਨੇ ਪਹਿਲਾਂ ਇਸ ਦਾ ਨਾਂ 'ਬਾਸਰ ਡਿਊਕ' ਰੱਖਣ ਦੀ ਤਜਵੀਜ਼ ਰੱਖੀ ਸੀ।
ਬੇਹੱਦ ਦੁਰਲੱਭ ਹੈ ਇਹ ਤਿਤਲੀ
ਅਧਿਕਾਰੀਆਂ ਅਨੁਸਾਰ ਇਹ ਪ੍ਰਜਾਤੀ ਬੇਹੱਦ ਦੁਰਲੱਭ ਮੰਨੀ ਜਾ ਰਹੀ ਹੈ। ਕਾਫੀ ਖੋਜ ਤੋਂ ਬਾਅਦ ਵੀ ਹੁਣ ਤੱਕ ਇਸ ਪ੍ਰਜਾਤੀ ਦੀਆਂ ਸਿਰਫ਼ ਦੋ ਤਿਤਲੀਆਂ ਹੀ ਦੇਖਣ ਨੂੰ ਮਿਲੀਆਂ ਹਨ। ਮਾਹਿਰਾਂ ਲਈ ਇਹ ਜਾਂਚ ਦਾ ਵਿਸ਼ਾ ਹੈ ਕਿ ਕੀ ਇਹ ਕੁਦਰਤੀ ਤੌਰ 'ਤੇ ਘੱਟ ਹਨ ਜਾਂ ਸੰਘਣੇ ਜੰਗਲਾਂ ਕਾਰਨ ਨਜ਼ਰ ਨਹੀਂ ਆ ਰਹੀਆਂ।