ਭਾਰਤੀ ਦਸਤਕਾਰੀ ਅਤੇ ਰਵਾਇਤੀ ਚੀਜ਼ਾਂ ਦੀ ਮਹੱਤਤਾ ਇੱਕ ਵਾਰ ਫਿਰ ਖ਼ਬਰਾਂ ਵਿੱਚ ਹੈ ਅਤੇ ਇਸ ਵਾਰ ਕਾਰਨ ਹੈ ਕੋਲਹਾਪੁਰੀ ਚੱਪਲਾਂ। ਇਹ ਚੱਪਲਾਂ ਸਾਲਾਂ ਤੋਂ ਆਪਣੇ ਦੇਸੀ ਸਟਾਈਲ, ਟਿਕਾਊਪਣ ਅਤੇ ਰਵਾਇਤੀ ਕਾਰੀਗਰੀ ਲਈ ਪ੍ਰਸਿੱਧ ਹਨ। ਪਰ ਹਾਲ ਹੀ ਵਿੱਚ ਇੱਕ ਵਿਵਾਦ ਖੜ੍ਹਾ ਹੋ ਗਿਆ ਜਦੋਂ ਇਟਾਲੀਅਨ ਲਗਜ਼ਰੀ ਫੈਸ਼ਨ ਬ੍ਰਾਂਡ ਪ੍ਰਾਡਾ ਨੇ ਇਨ੍ਹਾਂ ਚੱਪਲਾਂ ਦੀ ਨਕਲ ਕੀਤੀ ਅਤੇ ਉਨ੍ਹਾਂ ਨੂੰ ਆਪਣੇ ਨਵੇਂ ਸੰਗ੍ਰਹਿ ਵਿੱਚ ਸ਼ਾਮਲ ਕੀਤਾ ਅਤੇ ਉਹ ਵੀ ਵੱਡੀ ਕੀਮਤ 'ਤੇ। ਬਾਲੀਵੁੱਡ ਫੈਸ਼ਨ ਆਈਕਨ ਕਰੀਨਾ ਕਪੂਰ ਖਾਨ ਇਸ ਮੁੱਦੇ 'ਤੇ ਆਪਣੀ ਆਵਾਜ਼ ਚੁੱਕਣ ਵਾਲੀ ਸਭ ਤੋਂ ਪਹਿਲਾਂ ਸੀ ਅਤੇ ਹੁਣ ਉਨ੍ਹਾਂ ਦੇ ਰਸਤੇ 'ਤੇ ਚੱਲਦਿਆਂ ਦਿੱਗਜ ਅਦਾਕਾਰਾ ਨੀਨਾ ਗੁਪਤਾ ਨੇ ਵੀ ਆਪਣੀ ਪ੍ਰਤੀਕਿਰਿਆ ਦਿੱਤੀ ਹੈ। ਦੋਵਾਂ ਨੇ ਖੁੱਲ੍ਹ ਕੇ ਦੇਸੀ ਸਟਾਈਲ ਅਤੇ ਭਾਰਤੀ ਕਾਰੀਗਰਾਂ ਦਾ ਸਮਰਥਨ ਕੀਤਾ ਹੈ ਅਤੇ ਇਟਾਲੀਅਨ ਬ੍ਰਾਂਡ ਨੂੰ ਸਬਕ ਸਿਖਾਇਆ ਹੈ।
ਨੀਨਾ ਗੁਪਤਾ ਨੇ ਆਪਣੇ ਇੰਸਟਾਗ੍ਰਾਮ 'ਤੇ ਇੱਕ ਵੀਡੀਓ ਸਾਂਝਾ ਕੀਤਾ,ਜਿਸ ਵਿੱਚ ਉਹ ਕੋਲਹਾਪੁਰੀ ਚੱਪਲਾਂ ਦੀ ਇੱਕ ਜੋੜੀ ਦਿਖਾਉਂਦੀ ਦਿਖਾਈ ਦੇ ਰਹੀ ਸੀ ਜੋ ਉਨ੍ਹਾਂ ਕੋਲ ਹੈ। ਇਹ ਚੱਪਲਾਂ ਉਨ੍ਹਾਂ ਨੂੰ ਮਰਹੂਮ ਅਦਾਕਾਰ ਲਕਸ਼ਮੀਕਾਂਤ ਬਰਡੇ ਨੇ ਤੋਹਫ਼ੇ ਵਜੋਂ ਦਿੱਤੀਆਂ ਸਨ। ਨੀਨਾ ਨੇ ਵੀਡੀਓ ਵਿੱਚ ਕਿਹਾ: "ਇਹ ਹੁਣ ਤੱਕ ਦੀਆਂ ਸਭ ਤੋਂ ਸੁੰਦਰ ਚੱਪਲਾਂ ਹਨ। ਹੱਥ ਨਾਲ ਬਣੀਆਂ, ਪ੍ਰਮਾਣਿਕ ਅਤੇ ਬਹੁਤ ਹੀ ਖਾਸ। ਲਕਸ਼ਮੀਕਾਂਤ ਹੁਣ ਇਸ ਦੁਨੀਆ ਵਿੱਚ ਨਹੀਂ ਹੈ, ਪਰ ਮੈਂ ਉਨ੍ਹਾਂ ਨੂੰ ਬਹੁਤ ਪਿਆਰ ਕਰਦੀ ਹਾਂ। ਇਸ ਤੋਹਫ਼ੇ ਲਈ ਤੁਹਾਡਾ ਧੰਨਵਾਦ।"
ਵੀਡੀਓ ਦੇ ਕੈਪਸ਼ਨ ਵਿੱਚ ਉਨ੍ਹਾਂ ਨੇ ਲਿਖਿਆ - "ਰੀਅਲ ਤੋ ਰੀਅਲ ਹੁੰਦਾ ਹੈ।" ਇਸ ਇੱਕ ਲਾਈਨ ਵਿੱਚ, ਨੀਨਾ ਗੁਪਤਾ ਨੇ ਨਾ ਸਿਰਫ ਭਾਰਤੀ ਸ਼ਿਲਪਕਾਰੀ ਦੀ ਮਹੱਤਤਾ ਨੂੰ ਪ੍ਰਗਟ ਕੀਤਾ ਸਗੋਂ ਵਿਦੇਸ਼ੀ ਬ੍ਰਾਂਡਾਂ ਦੀ ਨਕਲ ਕਰਨ ਦੀ ਪ੍ਰਵਿਰਤੀ 'ਤੇ ਵੀ ਤਿੱਖਾ ਵਿਅੰਗ ਕੀਤਾ।
ਕਰੀਨਾ ਕਪੂਰ ਨੇ 'ਪ੍ਰਾਡਾ' ਨੂੰ ਕਿਹਾ ਸੀ Sorry
ਇਸ ਤੋਂ ਪਹਿਲਾਂ ਕਰੀਨਾ ਕਪੂਰ ਨੇ ਆਪਣੀ ਇੰਸਟਾਗ੍ਰਾਮ ਸਟੋਰੀ 'ਤੇ ਇੱਕ ਤਸਵੀਰ ਸਾਂਝੀ ਕੀਤੀ ਸੀ, ਜਿਸ ਵਿੱਚ ਉਹ ਰਵਾਇਤੀ ਕੋਲਹਾਪੁਰੀ ਚੱਪਲਾਂ ਪਹਿਨੇ ਦਿਖਾਈ ਦੇ ਰਹੀ ਸੀ। ਇਸ ਦੇ ਨਾਲ ਹੀ ਉਨ੍ਹਾਂ ਨੇ ਮਜ਼ਾਕ ਵਿੱਚ ਲਿਖਿਆ-“ਮਾਫ਼ ਕਰਨਾ ਪ੍ਰਾਡਾ ਨਹੀਂ…ਪਰ ਮੇਰੀ ਓਜੀ ਕੋਲਹਾਪੁਰੀ ਹੈ।
ਪੂਰਾ ਵਿਵਾਦ ਕੀ ਹੈ?
ਇਹ ਮਾਮਲਾ ਉਦੋਂ ਸਾਹਮਣੇ ਆਇਆ ਜਦੋਂ ਪ੍ਰਾਡਾ ਨੇ ਆਪਣੇ ਸਪਰਿੰਗ/ਗਰਮੀਆਂ 2026 ਦੇ ਕਲੈਕਸ਼ਨ ਦੌਰਾਨ ਇੱਕ ਚੱਪਲ ਡਿਜ਼ਾਈਨ ਪੇਸ਼ ਕੀਤਾ ਜੋ ਬਿਲਕੁਲ ਕੋਲਹਾਪੁਰੀ ਚੱਪਲਾਂ ਵਰਗਾ ਸੀ। ਖਾਸ ਗੱਲ ਇਹ ਸੀ ਕਿ ਇਨ੍ਹਾਂ ਚੱਪਲਾਂ ਦੀ ਕੀਮਤ ਲਗਭਗ ₹ 1.25 ਲੱਖ ਰੱਖੀ ਗਈ ਸੀ, ਜਦੋਂ ਕਿ ਅਸਲੀ ਕੋਲਹਾਪੁਰੀ ਚੱਪਲਾਂ ਆਮ ਤੌਰ 'ਤੇ ਸਸਤੀਆਂ ਕੀਮਤਾਂ 'ਤੇ ਉਪਲਬਧ ਹੁੰਦੀਆਂ ਹਨ।
ਭਾਰਤੀ ਕਾਰੀਗਰਾਂ ਅਤੇ ਸਮਾਜ ਦੇ ਇੱਕ ਵੱਡੇ ਵਰਗ ਨੇ ਇਸ 'ਤੇ ਨਾਰਾਜ਼ਗੀ ਪ੍ਰਗਟ ਕੀਤੀ। ਉਨ੍ਹਾਂ ਕਿਹਾ ਕਿ ਪ੍ਰਾ਼ਡਾ ਨੇ ਭਾਰਤੀ ਰਵਾਇਤੀ ਡਿਜ਼ਾਈਨ ਦੀ ਨਕਲ ਕੀਤੀ ਪਰ ਨਾ ਤਾਂ ਕਾਰੀਗਰਾਂ ਨੂੰ ਸਿਹਰਾ ਦਿੱਤਾ ਅਤੇ ਨਾ ਹੀ ਭਾਰਤ ਦੀ ਸੱਭਿਆਚਾਰਕ ਵਿਰਾਸਤ ਦਾ ਸਤਿਕਾਰ ਕੀਤਾ। ਜਿਵੇਂ-ਜਿਵੇਂ ਵਿਵਾਦ ਵਧਦਾ ਗਿਆ, ਪ੍ਰਾਡਾ ਨੂੰ ਸਪੱਸ਼ਟੀਕਰਨ ਦੇਣਾ ਪਿਆ ਅਤੇ ਮੰਨਿਆ ਕਿ ਉਨ੍ਹਾਂ ਦਾ ਡਿਜ਼ਾਈਨ ਭਾਰਤੀ ਕੋਲਹਾਪੁਰੀ ਚੱਪਲਾਂ ਤੋਂ ਪ੍ਰੇਰਿਤ ਸੀ।