ਹਫ਼ਤੇ ਦੇ ਪਹਿਲੇ ਦਿਨ ਭਾਰਤੀ ਸ਼ੇਅਰ ਬਾਜ਼ਾਰ ਵਿੱਚ ਸ਼ਾਨਦਾਰ ਰਿਕਵਰੀ ਦੇਖਣ ਨੂੰ ਮਿਲੀ ਹੈ। ਸੋਮਵਾਰ ਨੂੰ ਘਰੇਲੂ ਬਾਜ਼ਾਰ ਵੱਡੀ ਬੜ੍ਹਤ ਨਾਲ ਬੰਦ ਹੋਇਆ, ਜਿਸ ਨਾਲ ਨਿਵੇਸ਼ਕਾਂ ਦੇ ਚਿਹਰੇ ਖਿੜ ਗਏ ਹਨ। ਬੀ.ਐੱਸ.ਈ. (BSE) ਸੈਂਸੈਕਸ 938.93 ਅੰਕਾਂ (1.26 ਪ੍ਰਤੀਸ਼ਤ) ਦੀ ਵੱਡੀ ਤੇਜ਼ੀ ਨਾਲ 75,502.85 ਅੰਕਾਂ 'ਤੇ ਬੰਦ ਹੋਇਆ। ਇਸੇ ਤਰ੍ਹਾਂ, ਐੱਨ.ਐੱਸ.ਈ. (NSE) ਨਿਫਟੀ ਵੀ 257.70 ਅੰਕਾਂ (1.11 ਪ੍ਰਤੀਸ਼ਤ) ਦੇ ਉਛਾਲ ਨਾਲ 23,408.80 ਦੇ ਪੱਧਰ 'ਤੇ ਪਹੁੰਚ ਗਿਆ।
ਅਚਾਨਕ ਆਈ ਖਰੀਦਦਾਰੀ ਨੇ ਬਦਲਿਆ ਬਾਜ਼ਾਰ ਦਾ ਰੁਖ
ਬਾਜ਼ਾਰ ਦੀ ਸ਼ੁਰੂਆਤ ਅੱਜ ਬਹੁਤ ਸੁਸਤ ਰਹੀ ਸੀ ਅਤੇ ਦੁਪਹਿਰ 2:15 ਵਜੇ ਤੱਕ ਬਾਜ਼ਾਰ ਫਲੈਟ ਕਾਰੋਬਾਰ ਕਰ ਰਿਹਾ ਸੀ। ਪਰ ਇਸ ਤੋਂ ਬਾਅਦ ਬਾਜ਼ਾਰ ਵਿੱਚ ਅਚਾਨਕ ਖਰੀਦਦਾਰੀ ਹਾਵੀ ਹੋ ਗਈ, ਜਿਸ ਨਾਲ ਸੈਂਸੈਕਸ ਇੱਕ ਸਮੇਂ ਲਗਭਗ 1300 ਅੰਕਾਂ ਦੀ ਉਛਾਲ ਨਾਲ 75,805.27 ਅੰਕਾਂ ਤੱਕ ਪਹੁੰਚ ਗਿਆ ਸੀ।
ਇਨ੍ਹਾਂ ਸ਼ੇਅਰਾਂ ਨੇ ਮਾਰੀ ਬਾਜ਼ੀ
ਸੈਂਸੈਕਸ ਦੀਆਂ 30 ਵਿੱਚੋਂ 24 ਕੰਪਨੀਆਂ ਦੇ ਸ਼ੇਅਰ ਹਰੇ ਨਿਸ਼ਾਨ (ਵਾਧੇ) ਵਿੱਚ ਬੰਦ ਹੋਏ।, ਸਭ ਤੋਂ ਜ਼ਿਆਦਾ ਤੇਜ਼ੀ ਅਲਟਰਾਟੈਕ ਸੀਮਿੰਟ ਵਿੱਚ ਦੇਖੀ ਗਈ, ਜਿਸ ਦਾ ਸ਼ੇਅਰ 4.22 ਪ੍ਰਤੀਸ਼ਤ ਵਧਿਆ। ਇਸ ਤੋਂ ਇਲਾਵਾ ਟ੍ਰੈਂਟ (3.01%), ਐੱਚ.ਡੀ.ਐੱਫ.ਸੀ. ਬੈਂਕ (2.88%), ਮਹਿੰਦਰਾ ਐਂਡ ਮਹਿੰਦਰਾ (2.86%), ਬਜਾਜ ਫਾਈਨਾਂਸ (2.79%) ਅਤੇ ਆਈ.ਟੀ.ਸੀ. (2.22%) ਵਰਗੇ ਸ਼ੇਅਰਾਂ ਵਿੱਚ ਵੀ ਜ਼ੋਰਦਾਰ ਤੇਜ਼ੀ ਦਰਜ ਕੀਤੀ ਗਈ।
ਕੁਝ ਸ਼ੇਅਰਾਂ ਵਿੱਚ ਰਹੀ ਗਿਰਾਵਟ
ਤੇਜ਼ੀ ਦੇ ਬਾਵਜੂਦ ਸੈਂਸੈਕਸ ਦੀਆਂ 6 ਕੰਪਨੀਆਂ ਦੇ ਸ਼ੇਅਰ ਗਿਰਾਵਟ ਨਾਲ ਲਾਲ ਨਿਸ਼ਾਨ ਵਿੱਚ ਬੰਦ ਹੋਏ।, ਬੀ.ਈ.ਐੱਲ. (BEL) ਦਾ ਸ਼ੇਅਰ ਸਭ ਤੋਂ ਵੱਧ 2.32 ਪ੍ਰਤੀਸ਼ਤ ਤੱਕ ਡਿੱਗਿਆ। ਨਿਫਟੀ 50 ਦੀਆਂ ਵੀ 50 ਵਿੱਚੋਂ 20 ਕੰਪਨੀਆਂ ਦੇ ਸ਼ੇਅਰ ਗਿਰਾਵਟ ਨਾਲ ਬੰਦ ਹੋਏ।