ਕਿਫਾਇਤੀ ਜਹਾਜ਼ ਸੇਵਾ ਕੰਪਨੀ ਸਪਾਈਸਜੈੱਟ ਨੇ ਆਉਣ ਵਾਲੇ ਵਿੰਟਰ ਸ਼ਡਿਊਲ ਦੌਰਾਨ ਆਪਣੇ ਆਪ੍ਰੇਸ਼ਨ ਨੂੰ ਵੱਡੇ ਪੱਧਰ ’ਤੇ ਵਧਾਉਣ ਦੀ ਤਿਆਰੀ ਤਹਿਤ ਲੀਜ਼ ’ਤੇ 20 ਜਹਾਜ਼ (15 ਬੋਇੰਗ ਅਤੇ 5 ਏਅਰਬੱਸ) ਲੈਣ ਲਈ 3 ਜਹਾਜ਼ ਆਪ੍ਰੇਟਰਾਂ ਨਾਲ ਪੱਕੇ ਡੈਂਪ ਅਤੇ ਵੈੱਟ ਲੀਜ਼ ਸਮਝੌਤੇ ਕੀਤੇ ਹਨ। ਇਹ ਜਹਾਜ਼ ਅਕਤੂਬਰ ਤੋਂ ਨਵੰਬਰ ਵਿਚਾਲੇ ਸਪਾਈਸਜੈੱਟ ਦੇ ਬੇੜੇ ’ਚ ਸ਼ਾਮਲ ਹੋਣਗੇ।
ਸਪਾਈਸਜੈੱਟ ਦੀ ਯੋਜਨਾ ਵਿੰਟਰ ਸ਼ਡਿਊਲ ਦੌਰਾਨ ਆਪਣੇ ਆਪ੍ਰੇਸ਼ਨ ਨੂੰ ਵਧਾ ਕੇ ਰੋਜ਼ਾਨਾ ਲੱਗਭਗ 200 ਉਡਾਣਾਂ ਕਰਨ ਦੀ ਹੈ। ਇਸ ਨਾਲ ਮੁੱਖ ਰੂਟਾਂ ’ਤੇ ਉਡਾਣਾਂ ਦੀ ਗਿਣਤੀ ਵਧੇਗੀ ਅਤੇ ਉਨ੍ਹਾਂ ਬਾਜ਼ਾਰਾਂ ’ਚ ਕੁਨੈਕਟੀਵਿਟੀ ਮਜ਼ਬੂਤ ਹੋਵੇਗੀ, ਜਿੱਥੇ ਮੰਗ ਵੱਧ ਰਹਿਣ ਦੀ ਉਮੀਦ ਹੈ। ਏਅਰਲਾਈਨਜ਼ ਨੇ ਦੱਸਿਆ ਕਿ 5 ਏਅਰਬੱਸ ਜਹਾਜ਼ਾਂ ’ਚ ਏ321 ਵੈਰੀਐਂਟ ਵੀ ਸ਼ਾਮਲ ਹੋਵੇਗਾ।
ਸਪਾਈਸਜੈੱਟ ਦੇ ਮੁੱਖ ਕਾਰੋਬਾਰ ਅਧਿਕਾਰੀ ਦੇਬੋਜੋ ਮਹਾਰਿਸ਼ੀ ਨੇ ਕਿਹਾ,“ਅਸੀਂ ਸਰਦੀਆਂ ਦੇ ਮੌਸਮ ਲਈ ਤਿਆਰੀ ਕਰ ਰਹੇ ਹਾਂ ਅਤੇ ਸਾਡਾ ਮੁੱਖ ਧਿਆਨ ਉੱਥੇ ਸਮਰੱਥਾ ਵਧਾਉਣ ’ਤੇ ਹੈ, ਜਿੱਥੇ ਸਾਡੇ ਯਾਤਰੀਆਂ ਨੂੰ ਇਸ ਦੀ ਸਭ ਤੋਂ ਵੱਧ ਲੋੜ ਹੈ। ਅਸੀਂ ਜੋ 20 ਜਹਾਜ਼ ਲਿਆ ਰਹੇ ਹਾਂ, ਉਨ੍ਹਾਂ ਨਾਲ ਸਾਨੂੰ ਆਪਣੇ ਨੈੱਟਵਰਕ ਨੂੰ ਮਜ਼ਬੂਤ ਕਰਨ, ਉਡਾਣਾਂ ਦੀ ਗਿਣਤੀ ਵਧਾਉਣ ਅਤੇ ਪੀਕ ਸੀਜ਼ਨ ਦੌਰਾਨ ਯਾਤਰਾ ਦੇ ਹੋਰ ਬਦਲ ਦੇਣ ’ਚ ਮਦਦ ਮਿਲੇਗੀ।”