ਅਮਰੀਕਾ ਵੱਲੋਂ ਰੂਸ ਤੋਂ ਤੇਲ ਖਰੀਦਣ ’ਤੇ ਭਾਰਤ ਲਈ 25 ਫੀਸਦੀ ਵਾਧੂ ਟੈਰਿਫ ਲਾਏ ਜਾਣ ਤੋਂ ਬਾਅਦ ਭਾਰਤੀ ਰਿਫਾਇਨਰੀਆਂ ਨੇ ਸਪਲਾਈ ਰਣਨੀਤੀ ’ਚ ਬਦਲਾਅ ਸ਼ੁਰੂ ਕਰ ਦਿੱਤਾ ਹੈ। ਇਸ ਤਹਿਤ ਰੂਸ ਤੋਂ ਕੱਚੇ ਤੇਲ ਦੀ ਖਰੀਦ ’ਚ ਕਟੌਤੀ ਕੀਤੀ ਗਈ ਹੈ ਅਤੇ ਬਦਲਵੇਂ ਦੇਸ਼ਾਂ ਤੋਂ ਦਰਾਮਦ ਵਧਾਈ ਜਾ ਰਹੀ ਹੈ। ਇਸੇ ਸਿਲਸਿਲੇ ’ਚ ਭਾਰਤ ਨੇ ਲੱਗਭਗ 2 ਸਾਲਾਂ ਦੇ ਵਕਫੇ ਤੋਂ ਬਾਅਦ ਗੁਆਨਾ ਤੋਂ ਕੱਚੇ ਤੇਲ ਦੀ ਪਹਿਲੀ ਸ਼ਿਪਮੈਂਟ ਪ੍ਰਾਪਤ ਕੀਤੀ ਹੈ।
ਇਕ ਰਿਪੋਰਟ ਅਨੁਸਾਰ ਜਨਵਰੀ ਦੇ ਪਹਿਲੇ ਪੰਦਰਵਾੜੇ ’ਚ ਭਾਰਤ ਨੇ ਗੁਆਨਾ ਤੋਂ ਔਸਤਨ 2.97 ਲੱਖ ਬੈਰਲ ਪ੍ਰਤੀ ਦਿਨ ਕੱਚਾ ਤੇਲ ਦਰਾਮਦ ਕੀਤਾ। ਗਲੋਬਲ ਪੱਧਰੀ ਡਾਟਾ ਪ੍ਰਦਾਤਾ ਕੈਪਲਰ ਮੁਤਾਬਕ ਰੂਸ ਤੋਂ ਸਪਲਾਈ ਘਟਣ ਕਾਰਨ ਗੁਆਨਾ ਹੁਣ ਭਾਰਤ ਲਈ ਇਕ ਉੱਭਰਦੇ ਬਦਲ ਵਜੋਂ ਦੇਖਿਆ ਜਾ ਰਿਹਾ ਹੈ, ਭਾਵੇਂ ਕਿ ਦੂਰੀ ਜ਼ਿਆਦਾ ਹੋਣ ਕਾਰਨ ਟਰਾਂਸਪੋਰਟ ਲਾਗਤ ਜ਼ਿਆਦਾ ਹੋਵੇ।
ਇਸ ਮਿਆਦ ’ਚ ਸਾਊਦੀ ਅਰਬ, ਇਰਾਕ, ਨਾਈਜੀਰੀਆ ਅਤੇ ਅੰਗੋਲਾ ਤੋਂ ਵੀ ਦਰਾਮਦ ’ਚ ਕਾਫੀ ਵਾਧਾ ਦਰਜ ਕੀਤਾ ਗਿਆ ਹੈ।
ਰੂਸ ਤੋਂ ਦਰਾਮਦ ’ਚ 3 ਫੀਸਦੀ ਦੀ ਗਿਰਾਵਟ
ਜਨਵਰੀ ਦੇ ਪਹਿਲੇ ਪੰਦਰਵਾੜੇ ’ਚ ਰੂਸ ਤੋਂ ਰੋਜ਼ਾਨਾ ਲੱਗਭਗ 1.179 ਮਿਲੀਅਨ ਬੈਰਲ ਤੇਲ ਆਇਆ, ਜੋ ਪਿਛਲੇ ਮਹੀਨੇ ਦੀ ਤੁਲਨਾ ’ਚ ਲੱਗਭਗ 3 ਫੀਸਦੀ ਘੱਟ ਹੈ। ਇਹ 2025 ਦੇ ਔਸਤ ਨਾਲੋਂ ਲੱਗਭਗ 30 ਫੀਸਦੀ ਘੱਟ ਹੈ।
ਕੈਪਲਰ ਦੇ ਅੰਕੜਿਆਂ ਮੁਤਾਬਕ ਇਰਾਕ ਤੋਂ ਦਰਾਮਦ 18 ਫੀਸਦੀ ਵਧ ਕੇ ਰੋਜ਼ਾਨਾ ਲੱਗਭਗ 1.071 ਮਿਲੀਅਨ ਬੈਰਲ ਹੋ ਗਈ ਹੈ। ਉੱਥੇ ਹੀ ਸਾਊਦੀ ਅਰਬ ਤੋਂ ਰੋਜ਼ਾਨਾ ਦਰਾਮਦ 36 ਫੀਸਦੀ ਵਧ ਕੇ ਲੱਗਭਗ 9,54,000 ਬੈਰਲ ਤੱਕ ਪਹੁੰਚ ਗਈ।