ਮੱਧ ਪੂਰਬ (Middle East) ਵਿੱਚ ਚੱਲ ਰਹੇ ਤਣਾਅ ਦਾ ਅਸਰ ਹੁਣ ਵਿਸ਼ਵ ਰਾਜਨੀਤੀ ਦੇ ਨਾਲ-ਨਾਲ ਤੁਹਾਡੀ ਰਸੋਈ ਅਤੇ ਬਾਥਰੂਮ ਦੇ ਬਜਟ 'ਤੇ ਵੀ ਪੈਣ ਵਾਲਾ ਹੈ। ਇਰਾਨ, ਅਮਰੀਕਾ ਅਤੇ ਇਜ਼ਰਾਈਲ ਵਿਚਾਲੇ ਜਾਰੀ ਖਿੱਚੋਤਾਣ ਕਾਰਨ ਕੱਚੇ ਤੇਲ ਦੀਆਂ ਕੀਮਤਾਂ ਵਿੱਚ ਉਛਾਲ ਆਇਆ ਹੈ, ਜਿਸ ਕਾਰਨ ਰੋਜ਼ਾਨਾ ਵਰਤੋਂ ਦਾ ਸਾਮਾਨ ਬਣਾਉਣ ਵਾਲੀਆਂ (FMCG) ਕੰਪਨੀਆਂ 'ਤੇ ਦਬਾਅ ਵਧ ਗਿਆ ਹੈ। ਰਿਪੋਰਟਾਂ ਮੁਤਾਬਕ ਵਿੱਤੀ ਸਾਲ 2027 ਦੀ ਪਹਿਲੀ ਤਿਮਾਹੀ (ਅਪ੍ਰੈਲ-ਜੂਨ) ਤੋਂ ਸਾਬਣ, ਤੇਲ ਅਤੇ ਸ਼ੈਂਪੂ ਵਰਗੀਆਂ ਜ਼ਰੂਰੀ ਚੀਜ਼ਾਂ ਦੀਆਂ ਕੀਮਤਾਂ ਵਧਣਾ ਤੈਅ ਹੈ।
3% ਤੋਂ 4% ਤੱਕ ਵਧ ਸਕਦੀਆਂ ਹਨ ਕੀਮਤਾਂ
ਇੱਕ ਰਿਪੋਰਟ ਅਨੁਸਾਰ, ਕੱਚਾ ਮਾਲ ਮਹਿੰਗਾ ਹੋਣ ਕਾਰਨ ਕੰਪਨੀਆਂ ਹੁਣ ਮੌਜੂਦਾ ਕੀਮਤਾਂ ਨੂੰ ਬਰਕਰਾਰ ਰੱਖਣ ਦੀ ਹਾਲਤ ਵਿੱਚ ਨਹੀਂ ਹਨ। ਅਨੁਮਾਨ ਹੈ ਕਿ ਜੇਕਰ ਕੱਚੇ ਮਾਲ ਦੀਆਂ ਕੀਮਤਾਂ ਵਿੱਚ ਇਸੇ ਤਰ੍ਹਾਂ ਉਛਾਲ ਜਾਰੀ ਰਿਹਾ, ਤਾਂ ਉਤਪਾਦਾਂ ਦੀਆਂ ਕੀਮਤਾਂ 3% ਤੋਂ 4% ਤੱਕ ਵਧਾਈਆਂ ਜਾ ਸਕਦੀਆਂ ਹਨ। ਹਾਲਾਂਕਿ, ਕੰਪਨੀਆਂ ਕੋਲ ਫਿਲਹਾਲ 30 ਤੋਂ 45 ਦਿਨਾਂ ਦਾ ਪੁਰਾਣਾ ਸਟਾਕ ਬਚਿਆ ਹੈ, ਇਸ ਲਈ ਵਿੱਤੀ ਸਾਲ 2026 ਦੀ ਚੌਥੀ ਤਿਮਾਹੀ ਤੱਕ ਰਾਹਤ ਬਣੀ ਰਹਿ ਸਕਦੀ ਹੈ, ਪਰ ਅਸਲੀ ਅਸਰ ਅਪ੍ਰੈਲ ਤੋਂ ਦਿਖਣਾ ਸ਼ੁਰੂ ਹੋਵੇਗਾ।
ਕੱਚੇ ਤੇਲ ਅਤੇ ਪਲਾਸਟਿਕ ਦਾ ਸਬੰਧ
ਆਮ ਤੌਰ 'ਤੇ ਲੋਕਾਂ ਨੂੰ ਲੱਗਦਾ ਹੈ ਕਿ ਕੱਚੇ ਤੇਲ ਦਾ ਅਸਰ ਸਿਰਫ਼ ਪੈਟਰੋਲ-ਡੀਜ਼ਲ 'ਤੇ ਪੈਂਦਾ ਹੈ, ਪਰ FMCG ਸੈਕਟਰ ਇਸ ਨਾਲ ਡੂੰਘੀ ਤਰ੍ਹਾਂ ਜੁੜਿਆ ਹੋਇਆ ਹੈ। ਸਾਬਣ, ਬਿਸਕੁਟ ਅਤੇ ਸ਼ੈਂਪੂ ਦੀ ਪੈਕਿੰਗ ਵਿੱਚ ਵਰਤਿਆ ਜਾਣ ਵਾਲਾ ਪਲਾਸਟਿਕ ਕੱਚੇ ਤੇਲ ਤੋਂ ਹੀ ਬਣਦਾ ਹੈ। ਪੈਕੇਜਿੰਗ ਮਹਿੰਗੀ ਹੋਣ ਦਾ ਸਿੱਧਾ ਬੋਝ ਗਾਹਕਾਂ 'ਤੇ ਪਾਇਆ ਜਾਵੇਗਾ।
ਸਪਲਾਈ ਚੇਨ ਅਤੇ ਮਾਲ ਢੋਆ-ਢੁਆਈ 'ਤੇ ਅਸਰ
ਤੇਲ ਮਹਿੰਗਾ ਹੋਣ ਨਾਲ ਮਾਲ ਢੋਆ-ਢੁਆਈ (Transportation) ਦਾ ਖਰਚਾ ਵੀ ਵਧ ਗਿਆ ਹੈ। ਜਹਾਜ਼ਾਂ ਦਾ ਕਿਰਾਇਆ ਅਤੇ ਬੀਮਾ ਮਹਿੰਗਾ ਹੋਣ ਕਾਰਨ ਸਪਲਾਈ ਚੇਨ ਪ੍ਰਭਾਵਿਤ ਹੋ ਰਹੀ ਹੈ। ਭਾਰਤ ਖਾਣ ਵਾਲੇ ਤੇਲ (Cooking Oil) ਦਾ ਵੱਡਾ ਹਿੱਸਾ ਸਮੁੰਦਰੀ ਰਸਤੇ ਰਾਹੀਂ ਦਰਾਮਦ ਕਰਦਾ ਹੈ, ਅਜਿਹੇ ਵਿੱਚ ਜੰਗ ਵਰਗੇ ਹਾਲਾਤਾਂ ਕਾਰਨ ਸਪਲਾਈ ਚੇਨ ਟੁੱਟਣ ਨਾਲ ਖਾਣ ਵਾਲੇ ਤੇਲ ਦੀਆਂ ਕੀਮਤਾਂ ਵਿੱਚ ਵੀ ਭਾਰੀ ਵਾਧਾ ਹੋ ਸਕਦਾ ਹੈ।