ਮੁੰਬਈ : ਗਲੋਬਲ ਨਿਵੇਸ਼ ਬੈਂਕ ਜੇ. ਪੀ. ਮਾਰਗਨ ਦਾ ਕਹਿਣਾ ਹੈ ਕਿ ਭਾਰਤ ’ਚ ਸ਼ੁਰੂਆਤੀ ਜਨਤਕ ਇਸ਼ੂ (ਆਈ. ਪੀ. ਓ.) ਬਾਜ਼ਾਰ ਨਵੀਂ ਉਚਾਈ ’ਤੇ ਪਹੁੰਚ ਚੁੱਕਾ ਹੈ ਅਤੇ ਹੁਣ ਹਰ ਸਾਲ 20 ਅਰਬ ਡਾਲਰ ਦੇ ਆਈ. ਪੀ. ਓ. ਨੂੰ ਆਮ ਪੱਧਰ ਮੰਨਿਆ ਜਾ ਸਕਦਾ ਹੈ। ਬੈਂਕ ਨੇ ਅੰਦਾਜ਼ਾ ਲਾਇਆ ਹੈ ਕਿ ਆਉਣ ਵਾਲੇ ਸਾਲਾਂ ’ਚ ਇਹ ਰੁਝੇਵਾਂ ਲਗਾਤਾਰ ਮਜ਼ਬੂਤ ਬਣਿਆ ਰਹੇਗਾ।
ਜੇ. ਪੀ. ਮਾਰਗਨ ਦੇ ਇਕਵਿਟੀ ਕੈਪੀਟਲ ਮਾਰਕੀਟਸ ਮੁਖੀ ਅਭਿਨਵ ਭਾਰਤੀ ਨੇ ਦੱਸਿਆ ਕਿ ਵਿੱਤੀ ਸਾਲ 2025 ’ਚ ਭਾਰਤ ਹੁਣ ਤੱਕ 21 ਅਰਬ ਡਾਲਰ ਦੇ ਆਈ. ਪੀ. ਓ. ਵੇਖ ਚੁੱਕਾ ਹੈ, ਜੋ ਪਿਛਲੇ ਸਾਲ ਦੇ ਬਰਾਬਰ ਹੈ। ਉਨ੍ਹਾਂ ਕਿਹਾ ਕਿ ਚਾਲੂ ਸਾਲ ਦੇ ਆਖਿਰ ਤੱਕ ਇਹ ਅੰਕੜਾ 23 ਅਰਬ ਡਾਲਰ ਤੋਂ ’ਤੇ ਜਾ ਸਕਦਾ ਹੈ ਕਿਉਂਕਿ ਆਈ. ਸੀ. ਆਈ. ਸੀ. ਆਈ. ਪ੍ਰੋਡੈਂਸ਼ੀਅਲ ਏ. ਐੱਮ. ਸੀ. ਦੀ 10,000 ਕਰੋਡ਼ ਰੁਪਏ ਦੀ ਵੱਡੀ ਆਫਰਿੰਗ ਸਮੇਤ ਕਈ ਇਸ਼ੂ ਪ੍ਰਕਿਰਿਆ ’ਚ ਹਨ।
ਭਾਰਤੀ ਨੇ ਦੱਸਿਆ ਕਿ ਮੌਜੂਦਾ ਸਮੇਂ ’ਚ ਆਈ. ਪੀ. ਓ. ਦੀ ਮੰਗ ਦਾ ਲੱਗਭੱਗ 20 ਫੀਸਦੀ ਹਿੱਸਾ ਕੰਜ਼ਿਊਮਰ ਟੈੱਕ ਅਤੇ ਨਵੇਂ ਜ਼ਮਾਨੇ ਦੇ ਡਿਜੀਟਲ ਕਾਰੋਬਾਰਾਂ ਤੋਂ ਆ ਰਿਹਾ ਹੈ ਅਤੇ ਅਗਲੇ 5 ਸਾਲਾਂ ’ਚ ਇਹ ਵਧ ਕੇ 30 ਫੀਸਦੀ ਤੋਂ ਵੱਧ ਹੋ ਸਕਦਾ ਹੈ।
ਉਨ੍ਹਾਂ ਨੇ ਇਹ ਵੀ ਖੁਲਾਸਾ ਕੀਤਾ ਕਿ ਘੱਟ ਤੋਂ ਘੱਟ 20 ਸਟਾਰਟਅਪ, ਜਿਨ੍ਹਾਂ ਦਾ ਨਿੱਜੀ ਬਾਜ਼ਾਰ ਮੁਲਾਂਕਣ ਸੈਂਕੜੇ ਮਿਲੀਅਨ ਡਾਲਰ ’ਚ ਹੈ, ਆਪਣੇ ਆਈ. ਪੀ. ਓ. ਦੀ ਤਿਆਰੀ ’ਚ ਜੁਟੇ ਹੋਏ ਹਨ।
ਜੇ. ਪੀ. ਮਾਰਗਨ ਦਾ ਅੰਦਾਜ਼ਾ ਹੈ ਕਿ ਇਨ੍ਹਾਂ ’ਚੋਂ 4-5 ਕੰਪਨੀਆਂ ਇਕੱਲੇ ਹੀ 1 ਅਰਬ ਡਾਲਰ ਤੋਂ ਵੱਧ ਦੇ ਇਸ਼ੂ ਲਿਆ ਸਕਦੀਆਂ ਹਨ ਅਤੇ ਸਮੂਹਿਕ ਤੌਰ ’ਤੇ 8 ਅਰਬ ਡਾਲਰ ਤੱਕ ਦੀ ਪੂੰਜੀ ਇਕੱਠੀ ਕਰ ਸਕਦੀਆਂ ਹਨ। ਇਨ੍ਹਾਂ ’ਚੋਂ 2 ਪ੍ਰਮੁੱਖ ਕੰਪਨੀਆਂ ਤਕਨੀਕ ਆਧਾਰਿਤ ਹਨ।
ਜੇ. ਪੀ. ਮਾਰਗਨ ਅਨੁਸਾਰ ਅਗਲੇ 5 ਸਾਲਾਂ ’ਚ ਭਾਰਤ ਦਾ ਕੁਲ ਬਾਜ਼ਾਰ ਮੁੱਲ 10 ਟ੍ਰਿਲੀਅਨ ਡਾਲਰ ਤੱਕ ਪਹੁੰਚ ਸਕਦਾ ਹੈ ਅਤੇ ਅਮਰੀਕਾ ਅਤੇ ਚੀਨ ਤੋਂ ਬਾਅਦ ਤੀਜਾ ਸਭ ਤੋਂ ਵੱਡਾ ਬਾਜ਼ਾਰ ਬਣੇਗਾ। ਜਾਪਾਨ ਅਤੇ ਮੱਧ ਪੂਰਬ ਤੋਂ ਭਾਰਤ ’ਚ ਨਿਵੇਸ਼ ਦੀ ਰੁਚੀ ਲਗਾਤਾਰ ਵੱਧ ਰਹੀ ਹੈ।