ਕੈਮੂਰ : ਬਿਹਾਰ ਵਿਚ ਹੋਣ ਵਾਲੀਆਂ ਚੋਣਾਂ ਨੂੰ ਲੈ ਕੇ ਮਹਾਂਗਠਜੋੜ ਦੀਆਂ ਮੁਸ਼ਕਲਾਂ ਲਗਾਤਾਰ ਵੱਧ ਰਹੀਆਂ ਹਨ। ਲਾਲੂ ਯਾਦਵ ਦੀ ਆਰਜੇਡੀ ਪਾਰਟੀ ਕੈਮੂਰ ਜ਼ਿਲ੍ਹੇ ਦੀ ਮੋਹਨੀਆ ਵਿਧਾਨ ਸਭਾ ਸੀਟ ਦੀ ਨੁਮਾਇੰਦਗੀ ਕਰਨ ਵਾਲੀ ਆਰਜੇਡੀ ਉਮੀਦਵਾਰ ਸ਼ਵੇਤਾ ਸੁਮਨ ਦੀ ਨਾਮਜ਼ਦਗੀ ਚੋਣ ਕਮਿਸ਼ਨ ਵਲੋਂ ਰੱਦ ਕਰ ਦਿੱਤੀ ਗਈ ਹੈ। ਸ਼ਵੇਤਾ ਸੁਮਨ ਨੇ ਦੋਸ਼ ਲਗਾਇਆ ਹੈ ਕਿ ਉਸਦੀ ਨਾਮਜ਼ਦਗੀ ਜਾਣਬੁੱਝ ਕੇ ਰੱਦ ਕੀਤੀ ਗਈ ਹੈ। ਉਹ ਇਸ ਫੈਸਲੇ ਵਿਰੁੱਧ ਇਤਰਾਜ਼ ਦਾਇਰ ਕਰੇਗੀ।
ਸੂਤਰਾਂ ਮੁਤਾਬਕ ਉਮੀਦਵਾਰ ਨੇ 2020 ਦੀਆਂ ਚੋਣਾਂ ਵਿੱਚ ਆਪਣਾ ਜਨਮ ਸਥਾਨ ਉੱਤਰ ਪ੍ਰਦੇਸ਼ ਦੇ ਚੰਦੌਲੀ ਜ਼ਿਲ੍ਹਾ ਵਜੋਂ ਦਰਜ ਕੀਤਾ ਸੀ ਪਰ 2025 ਦੀਆਂ ਚੋਣਾਂ ਵਿੱਚ ਬਿਹਾਰ ਦੀ ਨਿਵਾਸੀ ਦਰਜ ਕਰਵਾਇਆ ਹੈ। ਇਸ ਗੱਲ ਨੂੰ ਲੈ ਕੇ ਭਾਰਤੀ ਜਨਤਾ ਪਾਰਟੀ (ਭਾਜਪਾ) ਨੇ ਆਰਜੇਡੀ ਉਮੀਦਵਾਰ ਸ਼ਵੇਤਾ ਸੁਮਨ ਵਿਰੁੱਧ ਚੋਣ ਕਮਿਸ਼ਨ ਕੋਲ ਸ਼ਿਕਾਇਤ ਦਰਜ ਕਰਵਾਈ ਅਤੇ ਅੱਜ ਉਸਦੀ ਨਾਮਜ਼ਦਗੀ ਰੱਦ ਕਰ ਦਿੱਤੀ ਗਈ। ਭਾਜਪਾ ਆਗੂਆਂ ਨੇ ਉਸ 'ਤੇ ਦੋਸ਼ ਲਗਾਉਂਦੇ ਹੋਏ ਕਿਹਾ ਕਿ ਦੋ ਵੱਖ-ਵੱਖ ਚੋਣਾਂ ਲਈ ਵੱਖ-ਵੱਖ ਪਤੇ ਦੇਣਾ ਗਲਤ ਜਾਣਕਾਰੀ ਹੈ, ਜੋ ਚੋਣ ਜ਼ਾਬਤੇ ਦੀ ਉਲੰਘਣਾ ਹੈ। ਇਸ ਲਈ ਉਨ੍ਹਾਂ ਨੇ ਉਨ੍ਹਾਂ ਦੀ ਨਾਮਜ਼ਦਗੀ ਰੱਦ ਕਰਨ ਦੀ ਮੰਗ ਕੀਤੀ।
ਦੂਜੇ ਪਾਸੇ ਚੋਣ ਕਮਿਸ਼ਨ ਨੇ ਭਾਜਪਾ ਦੀ ਸ਼ਿਕਾਇਤ ਦਾ ਨੋਟਿਸ ਲਿਆ ਅਤੇ ਉਮੀਦਵਾਰ ਸ਼ਵੇਤਾ ਸੁਮਨ ਦੇ ਦਸਤਾਵੇਜ਼ਾਂ ਦੀ ਮੁੜ ਤੋਂ ਜਾਂਚ ਕੀਤੀ। ਚੋਣ ਕਮਿਸ਼ਨ ਨੇ ਜਾਂਚ ਵਿੱਚ ਪਾਇਆ ਕਿ ਸ਼ਵੇਤਾ ਨੇ 2020 ਦੀਆਂ ਚੋਣਾਂ ਵਿੱਚ ਮੋਹਨੀਆ ਤੋਂ ਵੀ ਆਪਣੀ ਨਾਮਜ਼ਦਗੀ ਦਾਖਲ ਕੀਤੀ ਸੀ, ਜਿਸ ਵਿੱਚ ਉਸਦਾ ਪਤਾ ਉੱਤਰ ਪ੍ਰਦੇਸ਼ ਦੇ ਸਕਲਡੀਹਾ ਵਿਧਾਨ ਸਭਾ ਹਲਕੇ ਦੇ ਚੰਦੌਲੀ ਵਜੋਂ ਦਰਜ ਸੀ। ਹਾਲਾਂਕਿ, ਇਸ ਵਾਰ ਉਸਨੇ ਬਿਹਾਰ ਵਿੱਚ ਰਹਿਣ ਦੀ ਜਾਣਕਾਰੀ ਦਿੱਤੀ। ਇਸ ਸਬੰਧ ਵਿਚ ਕਈ ਪੁਖਤਾ ਸਬੂਤ ਨਾ ਹੋਣ ਕਾਰਨ ਚੋਣ ਕਮਿਸ਼ਨ ਨੇ ਉਸਦੀ ਨਾਮਜ਼ਦਗੀ ਰੱਦ ਕਰ ਦਿੱਤੀ। ਸ਼ਵੇਤਾ ਸੁਮਨ ਤੋਂ ਪਹਿਲਾਂ ਮੋਤੀਹਾਰੀ ਦੀ ਸੁਪੌਲੀ ਸੀਟ ਤੋਂ ਵਿਕਾਸਸ਼ੀਲ ਇਨਸਾਨ ਪਾਰਟੀ (VIP) ਦੇ ਉਮੀਦਵਾਰ ਸ਼ਸ਼ੀ ਭੂਸ਼ਣ ਸਿੰਘ ਦੀ ਨਾਮਜ਼ਦਗੀ ਰੱਦ ਕਰ ਦਿੱਤੀ ਗਈ ਸੀ।