ਨਵੀਂ ਦਿੱਲੀ : ਫਿਚ ਰੇਟਿੰਗਜ਼ ਨੇ ਵੀਰਵਾਰ ਨੂੰ ਚਾਲੂ ਵਿੱਤੀ ਸਾਲ 2025-26 ਲਈ ਭਾਰਤ ਦੀ ਜੀ. ਡੀ. ਪੀ. ਗ੍ਰੋਥ ਦਾ ਅੰਦਾਜ਼ਾ 6.9 ਤੋਂ ਵਧਾ ਕੇ 7.4 ਫੀਸਦੀ ਕਰ ਦਿੱਤਾ ਹੈ। ਰੇਟਿੰਗ ਏਜੰਸੀ ਨੇ ਕਿਹਾ ਕਿ ਵਧਦਾ ਖਪਤਕਾਰ ਖਰਚ, ਬਿਹਤਰ ਸੈਂਟੀਮੈਂਟ ਅਤੇ ਜੀ. ਐੱਸ. ਟੀ. ਸੁਧਾਰਾਂ ਦੇ ਸਾਕਾਰਾਤਮਕ ਪ੍ਰਭਾਵ ਦੌਰਾਨ ਗ੍ਰੋਥ ਦਾ ਅੰਦਾਜ਼ਾ ਵਧਾਇਆ ਗਿਆ ਹੈ।
ਏਜੰਸੀ ਨੇ ਕਿਹਾ ਕਿ ਮਹਿੰਗਾਈ ’ਚ ਗਿਰਾਵਟ ਨਾਲ ਆਰ. ਬੀ. ਆਈ. ਨੂੰ ਦਸੰਬਰ ’ਚ ਰੈਪੋ ਦਰ 5.25 ਫੀਸਦੀ ਤੱਕ ਘਟਾਉਣ ਦੀ ਗੁੰਜਾਇਸ਼ ਮਿਲੇਗੀ। ਰਿਜ਼ਰਵ ਬੈਂਕ 2025 ’ਚ ਹੁਣ ਤੱਕ 100 ਬੇਸਿਸ ਪੁਆਇੰਟ ਦੀ ਕਟੌਤੀ ਕਰ ਚੁੱਕਾ ਹੈ।
ਜੁਲਾਈ–ਸਤੰਬਰ ਤਿਮਾਹੀ ’ਚ ਜੀ. ਡੀ. ਪੀ. ਵਾਧਾ 8.2 ਫੀਸਦੀ ਸੀ
ਫਿਚ ਅਨੁਸਾਰ ਜੁਲਾਈ–ਸਤੰਬਰ ਤਿਮਾਹੀ ’ਚ ਭਾਰਤ ਦੀ ਆਰਥਿਕ ਵਾਧਾ ਦਰ 8.2 ਫੀਸਦੀ ’ਤੇ ਪਹੁੰਚ ਗਈ, ਜੋ ਅਪ੍ਰੈਲ-ਜੂਨ ਦੀ 7.8 ਦੀ ਵਾਧਾ ਦਰ ਤੋਂ ਵੱਧ ਹੈ। ਰਿਪੋਰਟ ’ਚ ਕਿਹਾ ਗਿਆ ਕਿ ਬਾਕੀ ਵਿੱਤੀ ਸਾਲ ਦੌਰਾਨ ਵਾਧਾ ਥੋੜ੍ਹਾ ਸੁਸਤ ਹੋ ਸਕਦਾ ਹੈ ਪਰ ਪੂਰੇ ਸਾਲ ਲਈ ਅੰਦਾਜ਼ੇ ਨੂੰ 7.4 ਫੀਸਦੀ ਕੀਤਾ ਗਿਆ ਹੈ।
ਫਿਚ ਨੇ ਕਿਹਾ ਕਿ ਇਸ ਸਾਲ ਇਕਨਾਮਿਕ ਗ੍ਰੋਥ ਦਾ ਮੁੱਖ ਇੰਜਣ ਪ੍ਰਾਈਵੇਟ ਕੰਜ਼ੰਪਸ਼ਨ ਹੈ, ਜਿਸ ਨੂੰ ਮਜ਼ਬੂਤ ਅਸਲੀ ਇਨਕਮ ਗ੍ਰੋਥ, ਬਿਹਤਰ ਕੰਜ਼ਿਊਮਰ ਸੈਂਟੀਮੈਂਟਸ, 22 ਸਤੰਬਰ ਤੋਂ ਲਾਗੂ ਵਿਆਪਕ ਜੀ. ਐੱਸ. ਟੀ. ਕਟੌਤੀ ਨਾਲ ਫਾਇਦਾ ਹੋਵੇਗਾ। ਸਰਕਾਰ ਨੇ 375 ਵਸਤਾਂ ’ਤੇ ਜੀ. ਐੱਸ. ਟੀ. ਘਟਾਇਆ, ਜਿਸ ਨਾਲ 99 ਫੀਸਦੀ ਤੋਂ ਵੱਧ ਖਪਤਕਾਰ ਵਸਤਾਂ ਸਸਤੀਆਂ ਹੋ ਗਈਆਂ ਹਨ। ਫਿਚ ਨੇ ਵਿੱਤੀ ਸਾਲ 2026-27 ਲਈ ਭਾਰਤ ਦਾ ਜੀ. ਡੀ. ਪੀ. ਵਾਧਾ 6.4 ਫੀਸਦੀ ਰਹਿਣ ਦਾ ਅੰਦਾਜ਼ਾ ਲਾਇਆ ਹੈ।
ਫਿਚ ਨੂੰ ਉਮੀਦ ਹੈ ਕਿ ਫਾਈਨਾਂਸ਼ੀਅਲ ਕੰਡੀਸ਼ਨ ’ਚ ਨਰਮੀ ਆਉਣ ਨਾਲ ਵਿੱਤੀ ਸਾਲ 2026-27 ਦੀ ਦੂਜੀ ਛਿਮਾਹੀ ’ਚ ਨਿੱਜੀ ਨਿਵੇਸ਼ ਵਧਣਾ ਸ਼ੁਰੂ ਹੋਵੇਗਾ। ਉਥੇ ਹੀ, ਅਕਤੂਬਰ ’ਚ ਪ੍ਰਚੂਨ ਮਹਿੰਗਾਈ ਦਰ ਘੱਟ ਕੇ 0.3 ਫੀਸਦੀ, ਜੋ ਹੁਣ ਤੱਕ ਦਾ ਰਿਕਾਰਡ ਹੇਠਲਾ ਪੱਧਰ ਹੈ। ਇਸ ਦੀ ਮੁੱਖ ਵਜ੍ਹਾ ਫੂਡ ਅਤੇ ਬੇਵਰੇਜਿਸ ਦੀਆਂ ਕੀਮਤਾਂ ’ਚ ਕਮੀ ਰਹੀ।
ਫਿਚ ਨੇ ਕਿਹਾ ਕਿ ਘਟਦੀ ਮਹਿੰਗਾਈ ਨਾਲ ਆਰ. ਬੀ. ਆਈ. ਦਸੰਬਰ ’ਚ ਇਕ ਹੋਰ ਦਰ ਕਟੌਤੀ ਕਰ ਸਕਦਾ ਹੈ। ਨਾਲ ਹੀ, ਨਕਦ ਰਿਜ਼ਰਵ ਅਨੁਪਾਤ (ਸੀ. ਆਰ. ਆਰ.) ਨੂੰ 4 ਤੋਂ 3 ਫੀਸਦੀ ਕਰਨ ਦਾ ਵੀ ਪੜਾਅਬੱਧ ਪ੍ਰਭਾਵ ਹੋਵੇਗਾ। ਆਰ. ਬੀ. ਆਈ. ਦੀ ਮੁਦਰਾ ਨੀਤੀ ਕਮੇਟੀ (ਐੱਮ. ਪੀ. ਸੀ.) ਸ਼ੁੱਕਰਵਾਰ ਨੂੰ ਆਪਣੀ ਨੀਤੀ ਸਮੀਖਿਆ ਜਾਰੀ ਕਰੇਗੀ।
ਫਿਚ ਨੇ ਕਿਹਾ ਕਿ ਮੁੱਖ ਮਹਿੰਗਾਈ (ਕੋਰ ਸੀ. ਪੀ. ਆਈ.) ’ਚ ਸੁਧਾਰ ਅਤੇ ਆਰਥਿਕ ਗਤੀਵਿਧੀਆਂ ਦੀ ਮਜ਼ਬੂਤੀ ਨੂੰ ਵੇਖਦੇ ਹੋਏ ਆਰ. ਬੀ. ਆਈ. ਦਾ ਦਰ ਕਟੌਤੀ ਚੱਕਰ ਖਤਮ ਹੋ ਗਿਆ ਹੈ, ਅਗਲੇ 2 ਸਾਲਾਂ ਤੱਕ ਰੈਪੋ ਦਰ 5.25 ਫੀਸਦੀ ਹੀ ਰਹਿਣ ਦੀ ਸੰਭਾਵਨਾ ਹੈ।