ਵੈਲਿੰਗਟਨ : ਮੌਜੂਦਾ ਦੌਰ ਦੇ ਟੀ-20 ਕ੍ਰਿਕਟ ਵਿੱਚ ਭਾਵੇਂ ਬੱਲੇਬਾਜ਼ਾਂ ਦਾ ਦਬਦਬਾ ਲਗਾਤਾਰ ਵਧ ਰਿਹਾ ਹੈ, ਪਰ ਅਨੁਭਵੀ ਭਾਰਤੀ ਤੇਜ਼ ਗੇਂਦਬਾਜ਼ ਭੁਵਨੇਸ਼ਵਰ ਕੁਮਾਰ ਦਾ ਮੰਨਣਾ ਹੈ ਕਿ ਚੰਗੇ ਗੇਂਦਬਾਜ਼ ਹੁਣ ਵੀ ਮੈਚ 'ਤੇ ਆਪਣਾ ਨਿਯੰਤਰਣ ਰੱਖ ਸਕਦੇ ਹਨ। ਕਰੀਬ ਚਾਰ ਸਾਲ ਬਾਅਦ ਅੰਤਰਰਾਸ਼ਟਰੀ ਕ੍ਰਿਕਟ ਵਿੱਚ ਵਾਪਸੀ ਕਰਨ ਵਾਲੇ 36 ਸਾਲਾ ਭੁਵਨੇਸ਼ਵਰ ਨੇ ਨਿਊਜ਼ੀਲੈਂਡ ਖ਼ਿਲਾਫ਼ ਤੀਜੇ ਟੀ-20 ਮੈਚ ਵਿੱਚ ਭਾਰਤ ਦੀ ਜਿੱਤ ਤੋਂ ਬਾਅਦ ਕਿਹਾ ਕਿ ਗੇਂਦਬਾਜ਼ਾਂ ਲਈ ਚੁਣੌਤੀ ਜ਼ਰੂਰ ਵਧੀ ਹੈ, ਪਰ ਸਹੀ ਰਣਨੀਤੀ ਅਤੇ ਹਾਲਾਤਾਂ ਅਨੁਸਾਰ ਢਲਣ ਦੀ ਸਮਰੱਥਾ ਨਾਲ ਉਹ ਬੱਲੇਬਾਜ਼ਾਂ 'ਤੇ ਲਗਾਮ ਲਗਾ ਸਕਦੇ ਹਨ।
ਆਈ.ਪੀ.ਐੱਲ. ਵਿੱਚ ਸ਼ਾਨਦਾਰ ਪ੍ਰਦਰਸ਼ਨ ਦੇ ਦਮ 'ਤੇ ਭਾਰਤੀ ਟੀਮ 'ਚ ਵਾਪਸੀ ਕਰਨ ਵਾਲੇ ਭੁਵਨੇਸ਼ਵਰ ਨੇ ਕਿਹਾ ਕਿ ਭਾਵੇਂ ਮੈਦਾਨ ਦੀਆਂ ਬਾਊਂਡਰੀਆਂ ਛੋਟੀਆਂ ਹਨ ਅਤੇ ਹਾਲਾਤ ਬੱਲੇਬਾਜ਼ਾਂ ਦੇ ਅਨੁਕੂਲ ਜਾਪਦੇ ਹਨ, ਪਰ ਅੰਤ ਵਿੱਚ ਗੇਂਦਬਾਜ਼ ਹੀ ਬੱਲੇਬਾਜ਼ ਤੱਕ ਗੇਂਦ ਪਹੁੰਚਾਉਂਦਾ ਹੈ। ਉਨ੍ਹਾਂ ਅਨੁਸਾਰ ਗੇਂਦਬਾਜ਼ ਆਪਣੀ ਇੱਛਾ ਮੁਤਾਬਕ ਸਹੀ ਜਗ੍ਹਾ 'ਤੇ ਗੇਂਦ ਸੁੱਟ ਕੇ ਮੈਚ 'ਤੇ ਪ੍ਰਭਾਵ ਛੱਡ ਸਕਦਾ ਹੈ।
2012 ਵਿੱਚ ਟੀ-20 ਅੰਤਰਰਾਸ਼ਟਰੀ ਡੈਬਿਊ ਕਰਨ ਵਾਲੇ ਭੁਵਨੇਸ਼ਵਰ ਨੇ ਮੰਨਿਆ ਕਿ ਹੁਣ ਟੀ-20 ਕ੍ਰਿਕਟ ਪਹਿਲਾਂ ਨਾਲੋਂ ਕਾਫ਼ੀ ਔਖਾ ਹੋ ਗਿਆ ਹੈ ਅਤੇ ਖਿਡਾਰੀਆਂ ਵਿੱਚ ਪਰਿਪੱਕਤਾ ਹੋਣਾ ਜ਼ਰੂਰੀ ਹੈ। ਵਨਡੇ ਟੀਮ ਵਿੱਚ ਵਾਪਸੀ ਦੇ ਸਵਾਲ 'ਤੇ ਉਨ੍ਹਾਂ ਕਿਹਾ ਕਿ ਉਹ ਭਵਿੱਖ ਬਾਰੇ ਜ਼ਿਆਦਾ ਅੱਗੇ ਦੀ ਨਹੀਂ ਸੋਚ ਰਹੇ। ਭਾਰਤ ਲਈ ਦੁਬਾਰਾ ਖੇਡ ਕੇ ਉਹ ਖ਼ੁਸ਼ ਹਨ ਅਤੇ ਸਯਦ ਮੁਸ਼ਤਾਕ ਅਲੀ ਟ੍ਰਾਫੀ ਤੇ ਵਿਜੇ ਹਜ਼ਾਰੇ ਟ੍ਰਾਫੀ ਵਰਗੇ ਘਰੇਲੂ ਟੂਰਨਾਮੈਂਟ ਖੇਡਣਾ ਜਾਰੀ ਰੱਖਣਗੇ।