ਜਨਵਰੀ 2026 ’ਚ ਇਕਵਿਟੀ ਮਿਊਚੁਅਲ ਫੰਡ ਯੋਜਨਾਵਾਂ ’ਚ ਸ਼ੁੱਧ ਨਿਵੇਸ਼ ਲਗਾਤਾਰ ਦੂਜੇ ਮਹੀਨੇ ਘਟ ਕੇ 24,028 ਕਰੋੜ ਰੁਪਏ ਰਹਿ ਗਿਆ, ਜੋ ਦਸੰਬਰ ਦੇ ਮੁਕਾਬਲੇ ਲੱਗਭਗ 14 ਫੀਸਦੀ ਘੱਟ ਹੈ। ਐਸੋਸੀਏਸ਼ਨ ਆਫ ਮਿਊਚੁਅਲ ਫੰਡਸ ਇਨ ਇੰਡੀਆ (ਐਮਫੀ) ਅਨੁਸਾਰ ਕਮਜ਼ੋਰ ਬਾਜ਼ਾਰ ਹਾਲਾਤ ਅਤੇ ਜਾਰੀ ਭੂ-ਸਿਆਸੀ ਚਿੰਤਾਵਾਂ ਕਾਰਨ ਨਿਵੇਸ਼ਕਾਂ ਦਾ ਰੁਖ਼ ਚੌਕਸ ਰਿਹਾ। ਹਾਲਾਂਕਿ ਇਕਵਿਟੀ ਨਿਵੇਸ਼ ’ਚ ਸੁਸਤੀ ਰਹੀ, ਫਿਰ ਵੀ ਮਿਊਚੁਅਲ ਫੰਡ ਉਦਯੋਗ ਦੀਆਂ ਕੁੱਲ ਪ੍ਰਬੰਧਨ ਅਧੀਨ ਜਾਇਦਾਦਾਂ (ਏ. ਯੂ. ਐੱਮ.) ਵਧ ਕੇ 81.01 ਲੱਖ ਕਰੋੜ ਰੁਪਏ ਹੋ ਗਈਆਂ।
ਇਕਵਿਟੀ ਸ਼੍ਰੇਣੀਆਂ ’ਚ ਫਲੈਕਸੀ ਕੈਪ ਫੰਡ ਸਭ ਤੋਂ ਅੱਗੇ ਰਹੇ। ਇਸ ਤੋਂ ਬਾਅਦ ਮਿਡ ਕੈਪ ਅਤੇ ਲਾਰਜ ਤੇ ਮਿਡ ਕੈਪ ਫੰਡ ਦਾ ਸਥਾਨ ਰਿਹਾ। ਉਥੇ ਹੀ ਟੈਕਸ ਬੱਚਤ ਵਾਲੀਆਂ ਈ. ਐੱਲ. ਐੱਸ. ਐੱਸ. ਯੋਜਨਾਵਾਂ ’ਚ ਸ਼ੁੱਧ ਨਿਕਾਸੀ ਦੇਖੀ ਗਈ। ਦੂਜੇ ਪਾਸੇ ਗੋਲਡ ਈ. ਟੀ. ਐੱਫ. ਅਤੇ ਕਰਜ਼ਾ ਮਿਊਚੁਅਲ ਫੰਡ ਯੋਜਨਾਵਾਂ ’ਚ ਨਿਵੇਸ਼ ’ਚ ਤੇਜ਼ ਸੁਧਾਰ ਦਰਜ ਕੀਤਾ ਗਿਆ, ਜਿਸ ਨਾਲ ਕੁੱਲ ਉਦਯੋਗ ਨਿਵੇਸ਼ ’ਚ ਮਜ਼ਬੂਤੀ ਆਈ।